ମହାକାଳପଡ଼ା, ୧୮ା୧୦ (ଡି.ଏନ୍.ଏ.): ପାରାଦୀପ ବନ୍ଦରକୁ ଟ୍ରେନ୍ ଯୋଗେ କୋଇଲା ଆସିଥାଏ। ପରେ ଏହି କୋଇଲାକୁ ବିଦେଶକୁ ରପ୍ତାନି ହେଉଥିବା ଜାହାଜରେ ଭର୍ତ୍ତି ସମୟରେ ଗୁଣ୍ଡସବୁ ବର୍ଷା ପାଣିରେ ଗଡି ଗଡି ନିକଟ ନଦୀଜଳରେ ମିଶି ସମୁଦ୍ରକୁ ବୋହି ଯାଇଥାଏ। ପେଟ ପୋଷିବା ପାଇଁ ଜୀବନକୁ ବିପଦମୁହଁକୁ ଠେଲି ଦେଇ ଘନଗଳିଆ ନଦୀକୁ ଆସିଥିବା ଗୁଣ୍ଡ କୋଇଲାକୁ ୫ରୁ ୧୦ ଫୁଟ ଗଭୀର ପାଣିରେ ବୁଡ଼ି ଛାଣିଥାଉ। ଏଭଳି କହିଛନ୍ତି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗର ପଞ୍ଚାୟତ ଅଧୀନ ପିତାପାଟ ଗାଁର ଗରିବ ବଙ୍ଗୀୟ ସମ୍ପ୍ରଦାୟର ଲୋକେ। ସେମାନଙ୍କ ମଧ୍ୟରେ ଠାକୁର ସର୍ଦ୍ଦାର, ପୁଷ୍ପ ସର୍ଦ୍ଦାର, ପବିତ୍ର ସର୍ଦ୍ଦାର ପ୍ରମୁଖଙ୍କ କହିବା କଥା ବର୍ଷା ପାଣି ଅଧିକ ହେଲେ ଗୁଣ୍ଡ କୋଇଲାଗୁଡ଼ିକ ପାରାଦୀପରୁ ବୋହି ଘନଗଳିଆ ନଦୀକୁ ଆସିଥାଏ। ଏହି ଗୁଣ୍ଡ ପାଣିରେ ବୁଡ଼ି ରହିଥାଏ। ଜୁଆର ସମୟରେ କୋଇଲା ଗୁଣ୍ଡ ସମୁଦ୍ରକୁ ଭାସିଯାଏ। ଆମେମାନେ ଡଙ୍ଗା ନେଇ ନଦୀରୁ କୋଇଲାକୁ ସଂଗ୍ରହ କରିଥାଉ। କୋଇଲା ଗୁଣ୍ଡକୁ ପାଣିରେ ବୁଡ଼ି ଆଣିବା ସମୟରେ ପାଟି ଓ ନାକରେ ପଶିଯାଏ। ଏହି କାମ ବିପଦ ସତ୍ତ୍ୱେ ପରିବାର ପ୍ରତିପୋଷଣ ପାଇଁ କରିବାକୁ ପଡିଥାଏ। ଏହି ଅଞ୍ଚଳର ଖରିନାସୀ, ବତିଘର, ଜମ୍ବୁ ଓ ରମନଗର ପଞ୍ଚାୟତର ବହୁ ଗରିବ ପରିବାର ଲୋକଙ୍କ ମଧ୍ୟରେ ନମିତା ମଣ୍ଡଳ, ସରସ୍ବତୀ ମଣ୍ଡଳ, କବିତା ମଣ୍ଡଳ, ବିଶ୍ୱନାଥ ମଣ୍ଡଳ ପ୍ରମୁଖ କୁହନ୍ତି, ଘନଗଳିଆ ନଦୀକୁ ଡଙ୍ଗା ସାହାଯ୍ୟରେ ଯାଉ। ପାଣିରେ ବୁଡି କୋଇଲା ଗୁଣ୍ଡକୁ ଜାଲି ରସ ପାତ୍ରରେ ଛାଣି ଆଣି ଡଙ୍ଗାରେ ଥିବା ଜରି ବସ୍ତାରେ ରଖୁ। ପରେ ପାରାଦୀପରୁ ମହାନଦୀରେ ଡଙ୍ଗାରେ ସଂଗ୍ରହ ହୋଇଥିବା କୋଇଲା ଗୁଣ୍ଡକୁ ମା’ ମନସା ଦେବୀ ଘାଟ ଯାଏ ଆଣିଥାଉ। ସେଠାରୁ ଗୁଣ୍ଡ କୋଇଲାକୁ ଆଣି ଘରେ ରଖି ଗୁଳା ଗୁଳା କରି ଜାଳେଣି ଭାବେ ବ୍ୟବହାର କରୁ। ବଳକା କୋଇଲା ଗୁଳାକୁ ଜଳଖିଆ ଓ ହୋଟେଲରେ ବିକ୍ରି କରି ଯାହା ଟଙ୍କା ମିଳେ ସେଥିରେ ପରିବାର ପ୍ରତିପୋଷଣ କରିଥାଉ।
