ମୋହନା,୨।୮(ମନ୍ମଥ ମିଶ୍ର): ସରକାର ଗ୍ରାମାଞ୍ଚଳର ବିକାଶ ପାଇଁ ବିଭିନ୍ନ ଯୋଜନା ମାଧ୍ୟମରେ କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ଗଜପତି ମୋହନା ବ୍ଲକ ବୁଢ଼ାପଙ୍କା ଉରା ନାଳରେ ଆଜି ଯାଏ ହୋଇ ପାରୁନି ପୋଲ। ଫଳରେ ଛାତ୍ରୀଛାତ୍ରମାନେ ସେହି ନାଳ ଅତିକ୍ରମ କରି ନିକଟସ୍ଥ ଖଜରିପଦା ବିଦ୍ୟାଳୟକୁ ଯାଉଛନ୍ତି। ହେଲେ ଜଳ ସ୍ତର ବୃଦ୍ଧି ହେଲେ ମଧ୍ୟ ଜୀବନକୁ ବାଜି ଲଗାଇ ବିଦ୍ୟାଳୟ ଯାଉଛନ୍ତି ଛାତ୍ରୀଛାତ୍ର। କାରଣ ପାଠ ପଢିବେ ଦେଶ ଗଢିବେ। ହେଲେ ଏମାନଙ୍କ ଦେଶ ଗଢିବା ନିଶାକୁ ଯେମିତି ଶାକାର କରୁନାହାନ୍ତି ସରକାର। ଯଦି ନାଳରେ ପାଣି ବଢିଯାଏ ତା ହେଲେ ପାଠପଢା ବନ୍ଦ ବୋଲି କହୁଛନ୍ତି ଛାତ୍ରୀଛାତ୍ର। ବୁଢ଼ା ଛୁଆ ଯାଏ ୧୦୦ ରୁ ଊଦ୍ଧର୍ବ ପରିବାର ଏହି ରାସ୍ତା ଦେଇ ଦୈନନ୍ଦିନ କାର୍ଯ୍ୟ ପାଇଁ ମୋହନା ଉପରେ ନିର୍ଭର କରନ୍ତି। କିନ୍ତୁ ଏହି ଅଞ୍ଚଳର ବିକାଶ ପାଇଁ କେହି ଦୃଷ୍ଟି ଦେଉନଥିବା ଗ୍ରାମବାସୀ ଅଭିଯୋଗ କରିଛନ୍ତି। ଅପରପକ୍ଷେ ଛାତ୍ରୀଛାତ୍ର କହୁଛନ୍ତି ସରକାର ବ୍ରିଜ୍ ଦିଅ ଆମେ ଯିବୁ ସ୍କୁଲ୍। ହେଲେ ଏଥିପ୍ରତି ସରକାର ଦୃଷ୍ଟି ଦେଉନଥିବାରୁ ଜୀବନକୁ ବାଜି ଲଗାଇ ଏମିତି ନାଳ ପାର ହୋଇ ଛାତ୍ରୀଛାତ୍ର ଯାଉଛନ୍ତି ବିଦ୍ୟାଳୟ। ସରୀସୃପ କାମୁଡିବା ଭୟ ସାଙ୍ଗକୁ ହଠାତ୍ ଜଳସ୍ତର ବଢ଼ିଗଲେ ଭାସିଯିବାର ଭୟ ମଧ୍ୟ ରହିଛି। ହେଲେ ତାହାକୁ ଖାତିର ନକରି ଏମିତି ଅବସ୍ଥାରେ ଯାଉଛନ୍ତି ବିଦ୍ୟାଳୟ। କିନ୍ତୁ ସରକାର ଏହି ନାଳ ଉପରେ ଖଣ୍ଡିଏ ସେତୁ ନିର୍ମାଣ କରୁନାହାନ୍ତି। ଏମିତିକି କାଦୁଅ ରାସ୍ତାରେ ଯାନବାହନ ଚଳାଚଳ ତ ଦୂରର କଥା ଚାଲି ଚାଲି ଯିବା ବି ମୁସ୍କିଲ। ଏହି ରାସ୍ତା ଉପରେ ବୁଢାପଙ୍କା, ଲୁଦୀହୁଏରୀ ଓ ରାଜିମେରା ଗ୍ରାମର ଶତାଧିକ ପରିବାରର ୭ ଶହରୁ ଉଦ୍ଧର୍ବ ଜନସାଧାରଣ ଶିକ୍ଷା, ସ୍ବାସ୍ଥ୍ୟ ଭଳି ଦୈନନ୍ଦିନ କାର୍ଯ୍ୟ ପାଇଁ ମୋହନା ସହର ଉପରେ ନିର୍ଭର କରନ୍ତି। କିନ୍ତୁ ପ୍ରଶାସନକୁ ଏହି ରାସ୍ତାକୁ ପକ୍କା ରାସ୍ତା ଓ ଏହି ଉରା ନାଳ ଉପରେ ସେତୁ ନିର୍ମାଣ ବାରମ୍ବାର ଅଭିଯୋଗ ଜଣାଇଆସୁଥିଲେ ମଧ୍ୟ କୌଣସି ସୁଫଳ ମିଳିନଥିବା ଗ୍ରାମବାସୀ କରିଥିବା ବେଳେ ଉରା ନାଳ ଉପରେ ସରକାର ପୋଲ ନିର୍ମାଣ କରିବା ନିହାତି ଆବଶ୍ୟକ ବୋଲି କହିଛନ୍ତି ଖଜୁରିପଦା ବିଦ୍ୟାଳୟର ପ୍ରଧାନ ଶିକ୍ଷକ ଦିବାକର ନାୟକ।
