ପୁରୀ ଅଫିସ,୧୧।୫: ଅକ୍ଷୟ ତୃତୀୟାରେ ଚନ୍ଦନଯାତ୍ରା ଓ ରଥ ନିର୍ମାଣ କାର୍ଯ୍ୟ ଆରମ୍ଭ ହେବ। ଏ ନେଇ ସୋମବାର ଗଜପତି ମହାରାଜା ଦିବ୍ୟସିଂହ ଦେବଙ୍କ ସଭାପତିତ୍ୱରେ ଏକ ସ୍ବତନ୍ତ୍ର ଭିଡିଓ କନଫରେନ୍ସ ବୈଠକ ଅନୁଷ୍ଠିତ ହୋଇଛି। ଛତିଶା ନିଯୋଗ ବୈଠକର ଚୂଡ଼ାନ୍ତ ନିଷ୍ପତ୍ତି ଆସିବା ପୂର୍ବରୁ ଏହି ବୈଠକରେ ରଥଯାତ୍ରା ଓ ୨୧ ଦିନିଆ ଚନ୍ଦନଯାତ୍ରା ପରିଚାଳନାକୁ ନେଇ ଥିବା ପ୍ରସଙ୍ଗ ଉପରେ ଆଲୋଚନା ହୋଇଛି। ବୈଠକରେ ଆଲୋଚନା ହୋଇଛି ଯେ, ରଥ, ବାହୁଡ଼ା, ରଥଖଳା ଓ ପହଣ୍ଡି ସମୟରେ କୌଣସି ଅଘଟଣ ଘଟିଲେ ସମ୍ପୃକ୍ତ ମହାରଣା କିମ୍ବା ସେବାୟତମାନଙ୍କୁ ବୀମା ରାଶି ପ୍ରଦାନ କରାଯିବ। ଗତବର୍ଷ ସେବାୟତ ଓ ମହାରଣାମାନେ ରଥକାର୍ଯ୍ୟ ଓ ରଥଯାତ୍ରା ସମୟରେ ଅଘଟଣରେ ପ୍ରାଣ ହରାଇଲେ ସେମାନଙ୍କୁ ୫ଲକ୍ଷ ଟଙ୍କା ପର୍ଯ୍ୟନ୍ତ ବୀମା ରାଶି ମିଳିଆସୁଥିଲା। ଚଳିତବର୍ଷ ମଧ୍ୟ ଏହି ୫ ଲକ୍ଷ ଟଙ୍କାର ବୀମା ରାଶି ମିଳିବା ନେଇ ଆପାତତଃ ନିଷ୍ପତ୍ତି ହୋଇଥିବା ସେବାୟତ ମାଧବ ପୂଜାପଣ୍ଡା କହିଛନ୍ତି। କିନ୍ତୁ ଏହାର ଚୂଡ଼ାନ୍ତ ନିଷ୍ପତ୍ତି ମଙ୍ଗଳବାର ଛତିଶା ନିଯୋଗ ବୈଠକ ପରେ ଜଣାପଡ଼ିବ ବୋଲି ସେ କହିଛନ୍ତି। ରଥଖଳା, ରଥପହଣ୍ଡି, ରଥଦାଣ୍ଡ ଓ ମନ୍ଦିର ଭିତରେ ସେବାୟତଙ୍କର ଅଘଟଣରେ ବିୟୋଗ ହେଲେ କିଭଳି ଭାବେ ଜୀବନ ବୀମା ସୁବିଧା ମିଳିପାରିବ ସେନେଇ ଟେଣ୍ଡର ଆହ୍ବାନ ହୋଇଥିଲା। ଓରିଏଣ୍ଟାଲ୍ ଇନସୁରାନ୍ସ ବୀମା ଦାୟିତ୍ୱ ନେଇଛି। ତେବେ ଏହି ଜୀବନ ବୀମାରେ କେଉଁ କେଉଁ ସୁବିଧା ରହିବ ସେନେଇ ସ୍ପଷ୍ଟ କୌଣସି ସୂଚନା ଦେଇନାହାନ୍ତି। ଅନ୍ୟପକ୍ଷେ ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି, ଏଯାବତ୍ ୧୮୬ଜଣ ସଂକ୍ରମିତ ହୋଇଥିବା ବେଳେ ୧୩୪ ସେବାୟତ ଓ ୫୨ଜଣ ଶ୍ରୀମନ୍ଦିର କାର୍ଯ୍ୟାଳୟର କର୍ମଚାରୀ ରହିଛନ୍ତି। ସେହିଭଳି ଏମାନଙ୍କ ମଧ୍ୟରୁ ୧୦୬ଜଣ ସୁସ୍ଥ ହୋଇସାରିଥିବା ବେଳେ ୭୮ଜଣ ହୋମ୍ ଆଇସୋଲେଶନ ଓ ନୀଳାଚଳ ଭକ୍ତ ନିବାସରେ ଆଇସୋଲେଶନ୍ରେ ରହିଛନ୍ତି। ସେବାୟତ ସଂକ୍ରମିତଙ୍କ ସଂଖ୍ୟା ୮୪ ହୋଇଥିବା ବେଳେ ସେମାନଙ୍କ ପରିବାର ସଦସ୍ୟ ୫୦ଜଣ ରହିଛନ୍ତି। ଭ୍ୟାକ୍ସିନେସନ୍ ପ୍ରକ୍ରିୟା ଚାଲୁ ରହିଛି। ୩୩୧୦ ଭ୍ୟାକ୍ସିନେସନ୍ ଡୋଜ୍ ଦିଆସରିଛି। ଏଥିରୁ ୨୪୧୮ ପ୍ରଥମ ଡୋଜ୍ ନେଇଥିବା ବେଳେ ୮୯୨ଜଣ ୨ୟ ଡୋଜ୍ ନେଇସାରିଲେଣି। ଏବେ କେବଳ ୪୫ ବର୍ଷରୁ ଊର୍ଦ୍ଧ୍ୱ ବୟସ୍କ ସେବାୟତଙ୍କ ଟିକାକରଣ ଚାଲିଛି। ଟେଷ୍ଟିଂ ପାଇଁ ଉତ୍କଳ ହିନ୍ଦୀ ବିଦ୍ୟାପୀଠରେ ସ୍ବତନ୍ତ୍ର କ୍ୟାମ୍ପର ଆୟୋଜନ ହୋଇଛି। ୫୬୨ ଜଣଙ୍କ ଟେଷ୍ଟିଂ ହୋଇଛି। ସେମାନଙ୍କ ମଧ୍ୟରୁ ୧୪୬ ପଜିଟିଭ୍ ହୋଇଛନ୍ତି। ସେହିଭଳି ନୀଳାଚଳ ଭକ୍ତ ନିବାସରେ ହୋଇଥିବା କୋଭିଡ୍ କେୟାର ସେଣ୍ଟରରେ ୪୬ଜଣ ସେବାୟତଙ୍କୁ ୨୬ଟି ସ୍ବତନ୍ତ୍ର ରୁମ୍ରେ ରଖାଯାଇ ଚିକିତ୍ସା କରାଯାଉଛି। ରଥ ନିର୍ମାଣ କାର୍ଯ୍ୟରେ ନିୟୋଜିତ ହେବାକୁ ଥିବା ମହାରଣା ସେବାୟତମାନଙ୍କର ଟେଷ୍ଟିଂ ଅକ୍ଷୟତୃତୀୟାର ୭୨ଘଣ୍ଟା ପୂର୍ବରୁ ହେବ, ଯାହାଦ୍ୱାରା ସଂକ୍ରମଣ ମୁକ୍ତ ସେବାୟତଙ୍କୁ ଚିହ୍ନଟ କରିବା ସହଜ ହେବ। ସେହିଭଳି ଚନ୍ଦନଯାତ୍ରା ଓ ରଥଯାତ୍ରାରେ ନିୟୋଜିତ ହେବାକୁ ଥିବା ସେବାୟତମାନେ କିଭଳି ଭାବେ ସଂକ୍ରମଣର ଶିକାର ହେବେ ନାହିଁ ସେନେଇ ପ୍ରଶାସନ ଯଥାସମ୍ଭବ ପ୍ରୟାସ କରୁଥିବା ଅଜୟ କୁମାର ଜେନା କହିଛନ୍ତି। ଅନ୍ୟପକ୍ଷରେ ରଥ ଓ ଚନ୍ଦନଯାତ୍ରାର ପ୍ରସ୍ତୁତି ଓ ପରିଚାଳନାକୁ ନେଇ ସ୍ପଷ୍ଟ ଚିତ୍ର ମଙ୍ଗଳବାର ଛତିଶା ନିଯୋଗ ବୈଠକ ପରେ ମିଳିପାରିବ।
