ଦଶମନ୍ତପୁର,୮ା୧୦ (ଡି.ଏନ.ଏ.): ମୁଣ୍ଡ ଗୁଞ୍ଜିବାକୁ ପକ୍କାଘର ଖଣ୍ଡିଏ ନାହିଁ । ଭଙ୍ଗା ଦଦରା ପଲିଥିନଟଣା ଛପରଘରେ ମୁଣ୍ଡ ଗୁଞ୍ଜିଛନ୍ତି ୨ ପ୍ରାଣୀ। ଘର ଭିତରୁ ଚାହିଁଲେ ଦିନରେ ସୂର୍ଯ୍ୟ, ରାତିରେ ତାରା ଦେଖାଯାଉଛି। ବର୍ଷାଦିନେ ଅବସ୍ଥା ନ କହିବା ଭଲ। ବର୍ଷାପାଣି ଗଳିବାରୁ ଚଳିବା ହୋଇପଡୁଛି କଷ୍ଟକର। ଟିକେ ପବନ ହେଲେ କାନ୍ଥରୁ ମାଟି ଖସୁଛି ।
ଏପରି ଦେଖିବାକୁ ମିଳିଛି କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ଲୁଲ୍ଲା ପଞ୍ଚାୟତର ମରିଚମାଳ ଗ୍ରାମରେ। ଗ୍ରାମରେ ରେଲି ସାଉନ୍ତା (୯୦) ପରିବାର ସହ ରହନ୍ତି। ଝିଅ ବାହାହୋଇ ଚାଲିଯିବା ପରେ ଏବେ ସ୍ତ୍ରୀସ୍ବାମୀ ଦୁଇପ୍ରାଣୀ ଉଭୟେ ଉଭୟଙ୍କ ଭରସା। ସରକାରୀ ସୁବିଧା ସେପରି କିଛି ଏଯାଏ ଏମାନଙ୍କୁ ମିଳିନି। ରାଶନ କାର୍ଡ ଓ ମିଳୁଥିବା ଭତ୍ତା ଉଭୟଙ୍କ ଭରସା। ଦୀର୍ଘବର୍ଷ ହେଲା ଉଭୟେ ଭଙ୍ଗା ଦଦରା ଛଣ ଛପର ଘରେ ଦୟନୀୟ ଅବସ୍ଥାରେ ଦିନ କାଟୁଛନ୍ତି । ଗତବର୍ଷ ଝଡ଼ ତୋଫାନରେ ଘର ଭାଙ୍ଗିଥିଲା। ଏ ବିଷୟରେ ଆର୍ଆଇଙ୍କୁ ଲିଖିତ ଭାବେ ଜଣାଇଥିଲି, ହେଲେ ପଲିଥିନ ଖଣ୍ଡେ ଦେଲେ ନାହିଁ, ମୁଁ ନିଜେ ପଲିଥିନ କିଣି ଘର ଉପରେ ଢାଙ୍କିଛି ବୋଲି କହନ୍ତି ରେଲି। ଆବାସ ଘର ପାଇଁ ଅନେକଥର ସରପଞ୍ଚ ଓ ପିଇଓଙ୍କୁ ଲିଖିତ ଭାବେ ଜଣାଇଛି, ମାତ୍ର କିଛି ସୁଫଳ ମିଳିନି ବୋଲି କହନ୍ତି ସେ। ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଆମକୁ ସହାୟତା କରନ୍ତୁ ନଚେତ୍ ଆମ ପରିବାରର ସମସ୍ତେ ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣା ଦେବୁ ବୋଲି କହିଛନ୍ତି ସେ। ଏ ସମ୍ପର୍କରେ ପିଇଓ କେତନ ହାଲଓ୍ବାଙ୍କୁ ପଚାରିବାରୁ ମୁଁ ଏହାର ତଦନ୍ତକରି ପଦକ୍ଷେପ ନେବି। ଯଦି ତାଙ୍କର ତାଲିକାରେ ନାମ ଥିବ ତେବେ ମୁଁ ବ୍ୟବସ୍ଥା କରିବି ବୋଲି କହିଥିଲେ।
