ନୂଆଦିଲ୍ଲୀ,୯।୧: ଭାରତୀୟ ଜୀବନ ବୀମା ନିଗମ(ଏଲ୍ଆଇସି) ଦ୍ୱାରା ଆରମ୍ଭ କରାଯାଇଛି ବୀମା ସଖି ଯୋଜନା। ଏହା ଆରମ୍ଭ ହେବାର ଏକ ମାସ ମଧ୍ୟରେ ୫୦ ହଜାରରୁ ଅଧିକ ରେଜିଷ୍ଟ୍ରେଶନ ହୋଇଥିବା ଏଲ୍ଆଇସି ପକ୍ଷରୁ ବୁଧବାର ସୂଚନା ଦିଆଯାଇଛି। ତେବେ ଏହି ଯୋଜନା ଅଧିନରେ ସାରା ଦେଶରେ ୧ ଲକ୍ଷ ମହିଳାଙ୍କୁ ଏଲ୍ଆଇସି ଏଜେଣ୍ଟ ଭାବେ ୩ ବର୍ଷ ଯାଏ ଟ୍ରେନିଂ ଦିଆଯିବ।
ଏଲ୍ଆଇସି ବୀମା ସଖି ଯୋଜନା ୧୮ରୁ ୭୦ ବର୍ଷ ମହିଳାଙ୍କୁ ସଶକ୍ତ କରିବା ଲାଗି ଆରମ୍ଭ କରାଯାଇଛି, ଯେଉଁମାନେ ଅତି କମ୍ରେ ୧୦ମ ଶ୍ରେଣୀ ପାଠ ପଢ଼ିଥିବେ। ଏହି ଯୋଜନାରେ ମହିଳାଙ୍କୁ ବିଶେଷ ଟ୍ରେନିଂ ଦିଆଯିବ। ଏହାଦ୍ୱାରା ସେ ଆର୍ଥିକ ସାକ୍ଷରତା ଏବଂ ବୀମା ସଚେତନତାରେ ଅଭିଜ୍ଞ ହୋଇପାରିବେ। ଟ୍ରେନିଂ ସମୟରେ ସଖିମାନଙ୍କୁ ପ୍ରଥମ ବର୍ଷ ପ୍ରତି ମାସରେ ୭୦୦୦ ଟଙ୍କା, ଦ୍ୱିତୀୟ ବର୍ଷ ୬୦୦୦ ଏବଂ ତୃତୀୟ ବର୍ଷ ପ୍ରତି ମାସରେ ୫୦୦୦ ଟଙ୍କା ଲେଖାଏ ଆର୍ଥିକ ସହାୟତା ମିଳିବ।
ବୀମା ସଖୀ ଯୋଜନା ଅଧୀନରେ ସାରା ଦେଶରେ ଏକ ଲକ୍ଷ ମହିଳାଙ୍କୁ ଏଲ୍ଆଇସି ଏଜେଣ୍ଟ ଭାବେ ଟ୍ରେନିଂ ଦିଆଯିବ।
ଟ୍ରେନିଂ ପରେ ସେ ଏଲ୍ଆଇସି ଏଜେଣ୍ଟ ଭାବେ କାମ କରନ୍ତି। କେବଳ ଏତିକି ନୁହେଁ ଗ୍ରାଜୁଏଟ୍ ବୀମା ସଖିଙ୍କୁ ଏଲ୍ଆଇସିରେ ଡେଭେଲପ୍ମେଣ୍ଟ ଅଫିସର ହେବାର ସୁଯୋଗ ମିଳିବ। ଏଲ୍ଆଇସି ଆଗାମୀ ୧୨ ମାସରେ ୧,୦୦,୦୦୦ ବୀମା ସଖୀଙ୍କ ନାମାଙ୍କନ କରିବା ଲକ୍ଷ୍ୟ ରହିଛି। ଆସନ୍ତା ୩ ବର୍ଷରେ ଏହି ସଂଖ୍ୟା ୨,୦୦,୦୦୦ ଯାଏ ବଢ଼ାଇବାର ଯୋଜନା ରହିଛି।
କିଭଳି କରିବେ ଆବେଦନ:
-ଆଗ୍ରହୀ ପ୍ରାର୍ଥୀମାନେ ଏବେ ଏହି ଯୋଜନା ପାଇଁ ଅନଲାଇନରେ ଆବେଦନ କରିପାରିବେ।
-ଆବେଦନ କରିବା ପାଇଁ, ଆପଣଙ୍କୁ LIC ର ଅଫିସିଆଲ ୱେବସାଇଟ https://licindia.in/test2 ପରିଦର୍ଶନ କରିବାକୁ ପଡିବ।
-ଏଠାରୁ ଆପଣଙ୍କୁ ’ବୀମା ସଖି ପାଇଁ ଏଠାରେ କ୍ଲିକ କରନ୍ତୁ’ ଉପରେ କ୍ଲିକ୍ କରିବାକୁ ପଡିବ।
-ନୂତନ ଭାବରେ ଖୋଲିଥିବା ପୃଷ୍ଠାରେ, ଆପଣଙ୍କୁ ଆପଣଙ୍କର ନାମ, ଜନ୍ମ ତାରିଖ, ମୋବାଇଲ ନମ୍ବର, ଇମେଲ ଆଇଡି ଏବଂ ଠିକଣା ଭଳି ସୂଚନା ଦେବାକୁ ପଡିବ।
-ଯଦି ଆପଣ ପୂର୍ବରୁ କୌଣସି LIC ଏଜେଣ୍ଟ, ବିକାଶ ଅଧିକାରୀ, କର୍ମଚାରୀ କିମ୍ବା ଡାକ୍ତରୀ ପରୀକ୍ଷକଙ୍କ ସହ ଜଡିତ, ତେବେ ଆପଣ ସେ ବିଷୟରେ ମଧ୍ୟ ସୂଚନା ଦେଇପାରିବେ।
-ଶେଷରେ କ୍ୟାପଚା ପୂରଣ କରନ୍ତୁ ଏବଂ ଏହାକୁ ଦାଖଲ କରନ୍ତୁ।
