ଖୋର୍ଦ୍ଧା ଅଫିସ,୨୩ା୧୧: ଓଡ଼ିଆ ଝିଅ ଦ୍ରୌପଦୀ ମୁର୍ମୁ ରାଷ୍ଟ୍ରପତି ହେବା ପରେ ଓଡ଼ିଶାର ସୁଖ୍ୟାତି ବଢ଼ିଛି। ସେ ପିଲାଙ୍କୁ ଭଲ ପାଉଥିବା ତାଙ୍କ ପ୍ରଥମ ଓଡ଼ିଶା ଗସ୍ତ ଅବସରରେ ପ୍ରମାଣିତ ହୋଇଛି। ଖୋର୍ଦ୍ଧା ବିଡିଏ କଲୋନୀର ବାସିନ୍ଦା ତଥା ପାନବରଜସ୍ଥିତ ଏକ ଘରୋଇ ଇଂଲିଶ ମିଡିୟମ ସ୍କୁଲର ଚତୁର୍ଥଶ୍ରେଣୀ ଛାତ୍ର ସମ୍ଭବ ବଳିଆରସିଂହ ସମ୍ପ୍ରତି ରାଷ୍ଟ୍ରପତିଙ୍କୁ ୫ପୃଷ୍ଠା ସମ୍ବଳିତ ଏକ ଚିଠି ଲେଖିଛନ୍ତି। ଚିଠିରେ ସେ ରାଷ୍ଟ୍ରପତିଙ୍କୁ ଜେଜେମା’ ବୋଲି ସମ୍ବୋଧନ କରିବା ସହ ବରୁଣେଇ ଓ ଖୋର୍ଦ୍ଧାର ବିଭିନ୍ନ ଦର୍ଶନୀୟ ସ୍ଥାନ ବୁଲିଆସିବା ପାଇଁ ଅନୁରୋଧ କରିଛନ୍ତି।
ଲେଖିଛନ୍ତି, ‘ଆପଣ ଆମର ଗର୍ବ ଓ ଗୌରବ। ବିଶ୍ୱରେ ଆପଣଙ୍କ ଯୋଗୁ ଆମର ସୁନାମ ବଢ଼ିଛି। ଆପଣ ଓଡ଼ିଶା ଗସ୍ତରେ ଥିବାବେଳେ ଶ୍ରୀକ୍ଷେତ୍ରର ବଡ଼ଦାଣ୍ଡରେ ଚାଲି ଚାଲି ଶ୍ରୀମନ୍ଦିର ଦର୍ଶନ କରିବାକୁ ଯାଇଥିଲେ। ଏହା ଟିଭିରୁ ଦେଖି ବହୁତ ଖୁସି ଲାଗିଥିଲା। ମୋ’ଜେଜେ ଏବଂ ଆମଘର ଲୋକେ ଆପଣଙ୍କର ବହୁତ ପ୍ରଶଂସା କରନ୍ତି। ରାଷ୍ଟ୍ରପତି ହେବା ପରେ ଆପଣ ନିଜ ଭାଷଣରେ ପ୍ରଥମ ସ୍ବାଧୀନତା ସଂଗ୍ରାମ ପାଇକ ବିଦ୍ରୋହର କଥା କହିଥିଲେ। ଲାଲ୍ମାଟି ଖୋର୍ଦ୍ଧାର ପିଲା ହିସାବରେ ଏଥିପାଇଁ ଆମେ ଗର୍ବ କରୁଛୁ। ଖୋର୍ଦ୍ଧାଗଡ଼ ହେଉଛି ଭାରତବର୍ଷର ଶେଷ ସ୍ବାଧୀନ ଦୁର୍ଗ। ଏଠାକାର ବୀର ପାଇକମାନେ ଇଂରେଜମାନଙ୍କୁ ପାଣି ପିଆଇଦେଇଥିଲେ। ବୀର ସେନାପତି ବକ୍ସି ଜଗବନ୍ଧୁଙ୍କ ନେତୃତ୍ୱରେ ପାଇକମାନେ ଗେରିଲା ଯୁଦ୍ଧ କରିଥିଲେ। ସେଥିପାଇଁ ପାଇକ ବିଦ୍ରୋହ ଭାରତ ଇତିହାସର ଏକ ବଡ଼ ଘଟଣା। ସେଇ ପାଇକ ବିଦ୍ରୋହର ସ୍ମୃତିରକ୍ଷା ପାଇଁ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ବରୁଣେଇ ଆସି ପାଇକ ସ୍ମାରକୀର ଶୁଭ ଦେଇଥିଲେ। ପୁରାଣରେ ବରୁଣେଇ ପାହାଡ଼କୁ ବାରୁଣୀ ପର୍ବତ ଓ ବାରୁଣାବନ୍ତ ବୋଲି କୁହାଯାଉଥିଲା। ତ୍ରେତୟା ଯୁଗରେ ପ୍ରଭୁ ରାମଚନ୍ଦ୍ର, ଲକ୍ଷ୍ମଣ ଓ ସୀତା ଏବଂ ଦ୍ୱାପର ଯୁଗରେ ପାଣ୍ଡବମାନେ ବରୁଣେଇ ପାହାଡ଼ରେ ବନବାସ କରିଥିଲେ। ସେହିପରି ରାଷ୍ଟ୍ରପତିଙ୍କୁ ଅନ୍ୟାନ୍ୟ ଦର୍ଶନୀୟ ସ୍ଥାନ ବୁଲି ଆସିବାକୁ ମଧ୍ୟ ନିମନ୍ତ୍ରଣ କରିଛନ୍ତି। ‘ଆପଣ ମୋ’ ଜେଜେମାଙ୍କ ବୟସର। ସେଥିପାଇଁ ଆପଣଙ୍କୁ ଜେଜେମା ବୋଲି ଲେଖିଲି। ମହାପ୍ରଭୁ ଶ୍ରୀଜଗନ୍ନାଥ ଆପଣଙ୍କୁ ଭଲରେ ରଖନ୍ତୁ’ ବୋଲି ସେ ଲେଖିଛନ୍ତି। ଶିକ୍ଷାବିତ୍ ସତ୍ୟବାଦୀ ବଳିଆରସିଂହଙ୍କ ନାତି ତଥା ଖବରଦାତା ସମରେନ୍ଦ୍ର ବଳିଆରସିଂହ ଓ ଶୁଭ୍ରାଙ୍କ ପୁତ୍ର ସମ୍ଭବ ଗତ ୧୦ତାରିଖରେ ରେଜିଷ୍ଟ୍ରି ପୋଷ୍ଟ ମାଧ୍ୟମରେ ଏହି ଚିଠି ରାଷ୍ଟ୍ରପତି ଭବନକୁ ପଠାଇଛନ୍ତି। ରାଷ୍ଟ୍ରପତି ତାଙ୍କ ନିମନ୍ତ୍ରଣ ରକ୍ଷା କରିବେ ବୋଲି ସେ ଆଶା ରଖିଛନ୍ତି।
