ନୂଆଦିଲ୍ଲୀ,୪।୨: କୃଷକ ଆନ୍ଦୋଳନ ଉପରେ ସୋସିଆଲ ମିଡିଆରେ ପପ ଷ୍ଟାର ରିହାନାଙ୍କ ଟୁଇଟକୁ ନେଇ ଏକ ବିତର୍କ ଚାଲିଛି। ବହୁ ବିଦେଶୀ ସେଲିବ୍ରିଟି କୃଷକ ଆନ୍ଦୋଳନକୁ ସମର୍ଥନ ଜଣାଇଛନ୍ତି। ଭାରତ ଏହି ପଦକ୍ଷେପକୁ ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ ବୋଲି କହିଛି। ଭାରତୀୟ ବୈଦେଶିକ ମନ୍ତ୍ରଣାଳୟ କହିଛି ଯେ, କେତେକ ସ୍ବାର୍ଥପର ଗୋଷ୍ଠୀ ଏହି ପ୍ରଦର୍ଶନ ଉପରେ ନିଜର ଏଜେଣ୍ଡା ଲଗାଇବାକୁ ଚେଷ୍ଟା କରୁଛନ୍ତି। ଏହି ପ୍ରସଙ୍ଗରେ ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ମଧ୍ୟ ନିଜର ମତ ଦେଇଛନ୍ତି। ବିରାଟ କୋହଲି ଟୁଇଟ୍ କରି କହିଛନ୍ତି, ଏହି ମତଭେଦ ସମୟରେ ଆମେ ସମସ୍ତେ ଏକଜୁଟ ହେବା। କୃଷକମାନେ ଆମ ଦେଶର ଏକ ଅବିଚ୍ଛେଦ୍ୟ ଅଙ୍ଗ ଏବଂ ମୁଁ ନିଶ୍ଚିତ ଯେ ସମସ୍ତ ଦଳ ମଧ୍ୟରେ ଏକ ବନ୍ଧୁତ୍ୱପୂର୍ଣ୍ଣ ସମାଧାନ ମିଳିବ ଯାହା ଦ୍ୱାରା ଶାନ୍ତି ପ୍ରତିଷ୍ଠା ହୋଇପାରିବ ଏବଂ ସମସ୍ତେ ଏକାଠି ଆଗକୁ ବଢିପାରିବେ। ବିରାଟଙ୍କ ବ୍ୟତୀତ ଅନେକ ଭାରତୀୟ ଖେଳାଳି କୃଷକ ଆନ୍ଦୋଳନକୁ ନେଇ ପ୍ରତିକ୍ରିୟା ଦେଇଛନ୍ତି। ସଚିନ ତେନ୍ଦୁଲକର, ସୁରେଶ ରାଇନା, ଶିଖର ଧାଓ୍ବନ, ରବି ଶାସ୍ତ୍ରୀଙ୍କ ଭଳି ଖେଳାଳି ଟୁଇଟ୍ କରି ନିଜ ପ୍ରତିକ୍ରିୟା ଦେଇଛନ୍ତି।
