ପୁରୀ ଅଫିସ,୨୨।୨: ପୁରୀର ବହୁ ପୁରାତନ କଲେଜ ସାମନ୍ତ ଚନ୍ଦ୍ରଶେଖର(ଏସ୍ସିଏସ୍) ସ୍ବୟଂଶାସିତ ମହାବିଦ୍ୟାଳୟକୁ ସରକାର ବିଶ୍ୱବିଦ୍ୟାଳୟ ଘୋଷଣା କରିବାକୁ ବିଧାୟକ ଜୟନ୍ତ କୁମାର ଷଡଙ୍ଗୀ ଦାବି କରିଛନ୍ତି। ଏହି ପରିପ୍ରେକ୍ଷୀରେ ବିଧାୟକ ଷଡ଼ଙ୍ଗୀ ମଙ୍ଗଳବାର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲାପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି। ବିଧାନସଭାର ବଜେଟ ଅଧିବେଶନରେ ଯୋଗଦେବା ପୂର୍ବରୁ ବିଧାୟକ ଷଡଙ୍ଗୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ଦେଶ୍ୟରେ ଜିଲାପାଳ ସମର୍ଥ ବର୍ମାଙ୍କୁ ଦାବିପତ୍ର ପ୍ରଦାନ କରିଥିବା କହିଛନ୍ତି। ବିଧାୟକ ଦାବିପତ୍ରରେ ଉଲ୍ଲେଖ କରିଛନ୍ତି କି, ଭାରତବର୍ଷର ଶ୍ରୀକ୍ଷେତ୍ର ଧାମ ତଥା ପୁରୀ ଜିଲାର ସର୍ବପ୍ରାଚୀନ ମହାବିଦ୍ୟାଳୟ ସାମନ୍ତଚନ୍ଦ୍ର ଶେଖର ସ୍ବୟଂଶାସିତ ମହାବିଦ୍ୟାଳୟ ଅଟେ। ବିଶ୍ୱବିଖ୍ୟାତ ଅନ୍ତରୀକ୍ଷ ବୈଜ୍ଞାନିକ ସାମନ୍ତ ଚନ୍ଦ୍ରଶେଖର ବା ପଠାଣି ସାମନ୍ତଙ୍କ ନାମରେ ନାମିତ ଅଟେ। ୧୯୪୪ ମସିହାରୁ ପ୍ରାୟ ୭ରୁ ଆଠ ଦଶନ୍ଧି ଧରି କେବଳ ପୁରୀ ନୁହେଁ ଓଡ଼ିଶା ଏବଂ ଭାରତ ବର୍ଷରେ ଗୁଣାମତ୍କ ଉଚ୍ଚ ଶିକ୍ଷା ପ୍ରଚାର ପ୍ରସାର କ୍ଷେତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ବର୍ତ୍ତମାନ ମହାବିଦ୍ୟାଳୟରେ କଳା, ବିଜ୍ଞାନ ଏବଂ ବାଣିଜ୍ୟର ୩ଟି ବିଷୟରେ ପ୍ରାୟ ୩୦ଟି ବିଭାଗ ମାଧ୍ୟମରେ ଶିକ୍ଷା ପ୍ରଦାନ କରୁଛି। ମହାବିଦ୍ୟାଳୟର ଛାତ୍ରୀଛାତ୍ର ସଂଖ୍ୟା ୪ହଜାରରୁ ଅଧିକ। ମହାବିଦ୍ୟାଳୟରୁ ଉତ୍ତୀର୍ଣ୍ଣ ଛାତ୍ରୀଛାତ୍ର ରାଜ୍ୟ ତଥା ରାଜ୍ୟ ବାହାରେ ବିଭିନ୍ନ ଉଚ୍ଚ ପଦବୀରେ ଅବସ୍ଥିତ ହୋଇଛନ୍ତି। ସେହିପରି ମହାବିଦ୍ୟାଳୟରେ ସ୍ନାତକ ଶିକ୍ଷା ସହିତ ଓଡ଼ିଆ, ଇଂଲିଶ, ଅର୍ଥନୀତି, ଭୂଗୋଳ, ବାଣିଜ୍ୟ, କମ୍ପୁଟର ବିଜ୍ଞାନ, ଜୀବ ବିଜ୍ଞାନ ଓ ରସାୟନ ବିଜ୍ଞାନ ଆଦି ବିଭିନ୍ନ ବିଷୟରେ ଶିକ୍ଷା ପ୍ରଦାନ କରାଯାଉଛି। ଅପରପକ୍ଷେ ମହାବିଦ୍ୟାଳୟରେ ଦକ୍ଷତା ଭିତ୍ତିକ ପାଠ୍ୟକ୍ରମ ଏବଂ ଶାରୀରିକ ଶିକ୍ଷା ପ୍ରଶିକ୍ଷଣ କାର୍ଯକ୍ରମ ମଧ୍ୟ ରହିଛି। ମହାବିଦ୍ୟାଳୟର ଉଚ୍ଚ ଶିକ୍ଷା ଓ ଗବେଷଣା କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଅବଦାନ ପାଇଁ ଏବଂ ଏହାର ଭୌଗୋଳିକ ଅବସ୍ଥିତି ଓ ପର୍ଯ୍ୟାପ୍ତ ଭିତ୍ତିଭୂମିକୁ ବିଚାରକୁ ନେଇ ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ଏବଂ ରାଷ୍ଟ୍ରୀୟ ପ୍ରତ୍ୟାୟନ ଓ ମୂଲ୍ୟାୟନ ପରିଷଦ (ନାକ୍୍) ଦ୍ୱାରା ଉକ୍ତ ସ୍ବୟଂଶାସିତ ମହାବିଦ୍ୟାଳୟକୁ ଏ ଗ୍ରେଡ୍ ଦିଆଯାଇଛି, ଯାହା ମହାବିଦ୍ୟାଳୟର ଶିକ୍ଷାର ପ୍ରଚାର ପ୍ରସାର କ୍ଷେତ୍ରରେ ଏକ ଗୁରୁତ୍ୱପୂଣ୍ଣ ସଫଳତା।
ତେବେ ସରକାର ରାଜ୍ୟର ବିଭିନ୍ନ ଜିଲାର ଅଗ୍ରଣୀ ମହାବିଦ୍ୟାଳୟଗୁଡିକୁ ବିଶ୍ୱବିଦ୍ୟାଳୟର ମାନ୍ୟତା ଦେଉଛନ୍ତି। ଯାହା ପ୍ରଶଂସନୀୟ ଓ ସ୍ବାଗତଯୋଗ୍ୟ। ସରକାରଙ୍କ ଏହି ପଦକ୍ଷେପ ଦ୍ୱାରା ଶିକ୍ଷା ଓ ଅନୁସନ୍ଧାନର ଗୁଣାମତ୍କ ବିକାଶ ହେବା ସଙ୍ଗେ ସଙ୍ଗେ ଉଚ୍ଚ ଶିକ୍ଷାର ପ୍ରସାର ହୋଇପାରିବ। ତେଣୁ ଶିକ୍ଷାର ବିକାଶକୁ ଦୃଷ୍ଟି ତଥା ପୁରୀବାସୀଙ୍କ ଅନୁରୋଧକୁ ରକ୍ଷା କରି ଏସ୍ସିଏସ୍ କଲେଜକୁ ବିଶ୍ୱବିଦ୍ୟାଳୟର ମାନ୍ୟତା ପ୍ରଦାନ କରାଯାଉ ବୋଲି ବିଧାୟକ ଷଡଙ୍ଗୀ ଦାବି କରିଛନ୍ତି। ଦାବିପତ୍ର ପ୍ରଦାନ ବେଳେ ପ୍ରତିନିଧି ଦଳରେ ତିରୁପତି ସଂସ୍କୃତ ବିଶ୍ୱବିଦ୍ୟାଳୟର ପୂର୍ବତନ କୁଳପତି ପ୍ରଫେସର ହରେକୃଷ୍ଣ ଶତପଥୀ, ପୁରୀ କଲେଜର ପୂର୍ବତନ ଛାତ୍ର ନେତା ତଥା ଓଡ଼ିଶା ଯୁବ ଚେତନା ସଂଗଠନ ରାଜ୍ୟ ସଭାପତି ବଦ୍ରି ମିଶ୍ର, ଶ୍ରୀଶ୍ରୀ କ୍ଷେତ୍ର ସୂଚନାର ସମ୍ପାଦକ ରାଜେଶ ମହାନ୍ତି, ଛାତ୍ର ନେତା ମଧୁସୂଦନ ମିଶ୍ର, ଜୟନ୍ତ ଦାସ, ଉମାକାନ୍ତ ନାୟକ, ସୋନି ପଣ୍ଡା, ସଂଗ୍ରାମ କାନୁନଗୋ, ବିଦ୍ରୋହ ସିଂହ, ଭାଜପା ଜିଲା ସଭାପତି ଜୟନ୍ତ ଦାଶ, ବିଶ୍ୱଜିତ ମହାନ୍ତି, ଅଭିଜିତ ପଣ୍ଡା, ମିଥୁନ ଜେନା, ସୁମନ୍ତ ମହାରଣା, ଅନିକେତ କର, କାମାକ୍ଷା ସାମନ୍ତରାୟ, ସଞ୍ଜୟ ପ୍ରଧାନ ଏବଂ ପଦିଆ ନାୟକ ପ୍ରମୁଖ ଉପସ୍ଥିତ ଥିଲେ।
