ପୁରୀ ଅଫିସ, ୬।୧୧: ମହାପ୍ରଭୁ ଶ୍ରୀଜଗନ୍ନାଥ ହିଁ କୋଟି କୋଟି ମଣିଷଙ୍କ ଦେବତା। ତାଙ୍କ ବିନା ପୁରୀ, ଓଡ଼ିଶା କିମ୍ବା ଭାରତର ପରିଚୟ ନାହିଁ। ତେଣୁ ପୁରୀର ନାମ ଜଗନ୍ନାଥ ପୁରୀ ନାମରେ ନାମିତ କରାଯିବାକୁ ଦାବି କରି ସାଧୁସନ୍ଥ, ବୁଦ୍ଧିଜୀବୀ ଏବଂ ବିଭିନ୍ନ ସଙ୍ଗଠନର କର୍ମକର୍ତ୍ତା ଏକାଠି ହୋଇଛନ୍ତି। ଏ ନେଇ ଶୁକ୍ରବାର ଶ୍ରୀ ଶ୍ରୀକ୍ଷେତ୍ର ସୂଚନା ପକ୍ଷରୁ ହୋଟେଲ ନାୟକ ପ୍ଲାଜାରେ ଆୟୋଜିତ ବୈଠକରେ ବିଭିନ୍ନ ସଙ୍ଗଠନର କର୍ମକର୍ତ୍ତା, ସାଧୁସନ୍ଥ, ସେବାୟତ ଓ ବୁଦ୍ଧିଜୀବୀ ଯୋଗ ଦେଇଥିଲେ। ସେମାନେ କହିଥିଲେ, ଦେଶ ବିଦେଶରେ ପୁରୀକୁ ଜଗନ୍ନାଥ ପୁରୀ ଭାବେ ପରିଚୟ ମିଳିଥାଏ। ପୂର୍ବରୁ ପୌରାଣିକ ତଥ୍ୟରେ ଏହା ଜଗନ୍ନାଥ ପୁରୀ ଭାବେ ପରିଚିତ ଥିଲା। ଜୟଦେବଙ୍କ ଗୀତଗୋବିନ୍ଦ ଠାରୁ ୧୮୨୩ ମସିହାର ସରକାରୀ କାଗଜପତ୍ରରେ ପୁରୀର ନାମ ଜଗନ୍ନାଥ ପୁରୀ ବୋଲି ଉଲ୍ଲେଖ ରହିଛି। ଭାରତବର୍ଷର ବିଭିନ୍ନ ଧାର୍ମିକ ସ୍ଥାନ ପୁରୀ ନଗରୀ ଯୁକ୍ତ। ଯେପରିକି ଦ୍ୱାରିକା, କାଞ୍ଚତ୍, ମାୟା ଓ ଅବନ୍ତୀ ପୁରୀ। ଏହି ଦୃଷ୍ଟିରୁ ପୁରୀ ନାମକୁ ପରିପୂର୍ଣ୍ଣତା ଓ ଆଧ୍ୟାତ୍ମିକତାଯୁକ୍ତ କରିବା ପାଇଁ ଜଗନ୍ନାଥ ପୁରୀ ନାମରେ ନାମିତ କରାଯିବା ଉଚିତ। ଏ ନେଇ ପ୍ରଧାନମନ୍ତ୍ରୀ, ରାଜ୍ୟପାଳ, ମୁଖ୍ୟମନ୍ତ୍ରୀ, ପୁରୀ ଏମ୍ପି, ସମସ୍ତ ବିଧାୟକ ଓ ଜିଲାପାଳଙ୍କୁ ଦାବିପତ୍ର ଦିଆଯିବ। ବିଭିନ୍ନ ବ୍ୟକ୍ତି ବିଶେଷଙ୍କୁ ନେଇ ଏକ କ୍ରିୟାନୁଷ୍ଠାନ କମିଟି ଗଠନ ହେବ ବୋଲି ଶ୍ରୀ ଶ୍ରୀକ୍ଷେତ୍ର ସୂଚନା ସମ୍ପାଦକ ରାଜେଶ ମହାନ୍ତି କହିଛନ୍ତି। ବୈଠକରେ ଡ. ହରେକୃଷ୍ଣ ଶତପଥୀ, ପଣ୍ଡିତ ସୂର୍ଯ୍ୟନାରାୟଣ ରଥଶର୍ମା, ମହନ୍ତ ରାମକୃଷ୍ଣ ଦାସ, ଗବେଷକ ନରେଶ ଚନ୍ଦ୍ର ଦାଶ, ବଦ୍ରି ମିଶ୍ର, କୈଳାଶ ଚନ୍ଦ୍ର ଟିକାୟତରାୟ, ଚକ୍ରଧର ମହାପାତ୍ର, ହୋଟେଲ ହୋଲି ଡେ ରିସର୍ଟ ପରିଚାଳନା ନିର୍ଦ୍ଦେଶକ ରାଜକିଶୋର ପାତ୍ର, ନାୟକ ବିଚ୍ ରିସୋର୍ଟ ପରିଚାଳନା ନିର୍ଦ୍ଦେଶକ ଗିରିଶ ନାୟକ, ରାମଚରଣ ଦାସ, ଶ୍ୟାମପ୍ରକାଶ ସେନାପତି, କୃଷ୍ଣଚନ୍ଦ୍ର ରଥ, ବିପିନ ଦଳେଇ, ମନୋଜ ରଥ, ମଧୁସୂଦନ ମିଶ୍ର ପ୍ରମୁଖ ଉପସ୍ଥିତ ଥିଲେ।
ସେହିପରି ପୁରୀର ନାମ ବଦଳାଯାଇ ଶ୍ରୀଜଗନ୍ନାଥ ଧାମ ପୁରୀ ଓ ରେଳ ଷ୍ଟେଶନ ନାମ ଶ୍ରୀଜଗନ୍ନାଥ ଧାମ ପୁରୀ ରେଳଷ୍ଟେଶନ ରଖାଯାଉ ବୋଲି ଶ୍ରୀଜଗନ୍ନାଥ ସେନା ଦାବି କରିଛି। ଏ ନେଇ ସେନା ପକ୍ଷରୁ ଆବାହକ ପ୍ରିୟଦର୍ଶନ ପଟ୍ଟନାୟକଙ୍କ ନେତୃତ୍ୱରେ ପୁରୀ ଷ୍ଟେଶନ ସମ୍ମୁଖରେ ଧାରଣା ଦିଆଯିବା ସହ ରେଳମନ୍ତ୍ରୀଙ୍କ ଉଦ୍ଦେଶ୍ୟରେ ଷ୍ଟେଶନ ମ୍ୟାନେଜରଙ୍କୁ ଦାବିପତ୍ର ଦିଆଯାଇଛି।
