କଟକ ଅଫିସ,୯।୪: ଭଗବାନଙ୍କ ସୃଷ୍ଟିରେ ମନୁଷ୍ୟକୁ ଅମୃତମୟ ଦୃଷ୍ଟିରେ ଦେଖିବା, ମଧୁର ବାଣୀ ବିତରଣ କରିବା ଏକାନ୍ତ ଆବଶ୍ୟକ। ନିଜ ସୁଖସ୍ବାଚ୍ଛନ୍ଦ୍ୟ ସହିତ ଅନ୍ୟର ସୁଖଦୁଃଖରେ ଭାଗିଦାର ହେବା ଉଚିତ୍। ଏଥିସହ ମଣିଷ ସତ୍ୟର ସନ୍ଧାନୀ ହେବାକୁ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ପରାମର୍ଶ ଦେଇଛନ୍ତି। କଟକ ବିଡ଼ାନାସୀସ୍ଥିତ ଶୋଭନୀୟ ଆନ୍ଦୋଳନ କାର୍ଯ୍ୟାଳୟ ପରିସରରେ ୬୧ତମ ଆନ୍ତର୍ଜାତିକ ଅଶୋଭନୀୟତା ନିରୋଧ ଦିବସ ଓ ଏହାର ପ୍ରତିଷ୍ଠାତା କୁମାର ଭାଇଙ୍କ ୭୬ତମ ଜୟନ୍ତୀ ଉତ୍ସବ ଶନିବାର ଅନୁଷ୍ଠିତ ହୋଇଯାଇଛି। ଏହାକୁ ରାଜ୍ୟପାଳ ଉଦ୍ଘାଟନ କରି ଭଲ ମଣିଷ ହେବା ନିମନ୍ତେ ସମସ୍ତଙ୍କୁ ପରାମର୍ଶ ଦେଇଥିଲେ। ଏଥିସହ ରାଜ୍ୟ, ଦେଶ, ବିଦେଶରେ ଅଶୋଭନୀୟତାର ନିବାରଣ ଓ ଶୋଭନୀୟତାର ବିକାଶ ପାଇଁ ଏପ୍ରିଲ ୮ ତାରିଖରୁ ବିଭିନ୍ନ ସ୍ଥାନରେ ପାଳିତ ହେଉଥିବା ଏହି ୧୫ ଦିନିଆ କାର୍ଯ୍ୟକ୍ରମକୁ ରାଜ୍ୟପାଳ ଶୁଭାରମ୍ଭ କରିଥିଲେ। ଆନ୍ଦୋଳନର ନିର୍ଦ୍ଦେଶିକା ତଥା ସମ୍ପାଦିକା ଡ. ଅରୁନ୍ଧତୀ ଦେବୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ଉତ୍ତର ପ୍ରଦେଶର ସନାତନ ଧର୍ମ ପରିଷଦନ୍ୟାସର ଅଧ୍ୟକ୍ଷ ସନ୍ଥ ଅବଧ ବିହାରୀ ଦାସଜୀ ଯୋଗଦେଇ କହିଥିଲେ, ପ୍ରତ୍ୟେକ ନାରୀ ଦେବୀ ସ୍ବରୂପା ଏବଂ ଶୋଭନୀୟ ଆଚରଣ ଦ୍ୱାରା ସୁଖୀ ସମାଜ ଗଠନ ସମ୍ଭବ ହୁଏ। ସମ୍ମାନିତ ଅତିଥି ଭାରତର ନିର୍ବାଚନ କମିଶନଙ୍କ ପୂର୍ବତନ ମୁଖ୍ୟ ଉପଦେଷ୍ଟା ଡ. ଭଗବାନ ପ୍ରକାଶ ଶୋଭନୀୟ ଆନ୍ଦୋଳନ ଓ ଶିକ୍ଷାଶ୍ରମରେ ଦିଆଯାଉଥିବା ନୈତିକ ଶିକ୍ଷା ଅନ୍ୟ କେଉଁଠି ନାହିଁ ବୋଲି କହିଥିଲେ। ଏହି ଅବସରରେ ପୂର୍ବତନ ସ୍ବାସ୍ଥ୍ୟ ନିର୍ଦ୍ଦେଶିକା ଡ. ସେବା ମହାପାତ୍ରଙ୍କୁ ଶୋଭନୀୟ ସେବା ସମ୍ମାନ ଓ ପ୍ରଫେସର ଡାକ୍ତର ଇନ୍ଦିରାଜୀଙ୍କୁ ଶୋଭନୀୟ ସମାଜସେବୀ ସମ୍ମାନ ପ୍ରଦାନ କରାଯାଇଥିଲା।
ଓଡ଼ିଶୀ ସଙ୍ଗୀତଜ୍ଞ ପଦ୍ମଶ୍ରୀ ଶ୍ୟାମାମଣୀ ଦେବୀ ପୂର୍ବାହ୍ନରେ ଚେତନାଯାତ୍ରାକୁ ଉଦ୍ଘାଟନ କରିଥିଲେ। ଏହି ଉପଲକ୍ଷେ ଅନୁଷ୍ଠିତ ରକ୍ତଦାନ ଶିବିର ଓ କବିତାପାଠ କାର୍ଯ୍ୟକ୍ରମରେ ପ୍ରଫେସର ଯୁଧିଷ୍ଠିର ଖଟୁଆ, ଶିଶୁ ସାହିତି୍ୟକ ରବୀନ୍ଦ୍ରନାଥ ମାଝି, ମହିଜା ଦଳବେହେରା, ରାଜ୍ୟବର୍ଦ୍ଧନ ଧଳମହାପାତ୍ର, ବିଜୟ କୁମାର ନାଥ, ମିନତୀ ଦେବୀ, ଡ. ବନଲତା ଦେବୀ, ଅଧ୍ୟାପିକା ଜ୍ୟୋତିର୍ମୟୀ ପ୍ରମୁଖ ଯୋଗଦେଇଥିଲେ। ଶୋଭନୀୟ ବାହିନୀ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ପରିବେଷିତ ହୋଇଥିଲା। ବରଦା ମହାନ୍ତି, ମମତା ପ୍ରଧାନ, ଊର୍ମିଳା ବେହେରା, ଅଧ୍ୟାପକ ନିଖିଳେଶ ମହାନ୍ତି, ଅଧ୍ୟାପକ ଇନ୍ଦ୍ରମଣି ନାୟକ, ରାଜାରାଣୀ ତ୍ରିପାଠୀ, ମା’ ଶାରଦା ଦେବୀ, ନିରାକାର ବେଉରା, ଇଂ. ଦୟାନିଧି ରାଉତ, ମାନସ ମଲ୍ଲିକଙ୍କ ସହ ଅନ୍ୟମାନେ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ବିଭିନ୍ନ ସ୍ଥାନରୁ ଆସିଥିବା ବହୁସଂଖ୍ୟକ ଭକ୍ତ ଓ ସଭ୍ୟାସଭ୍ୟ ଏଥିରେ ଯୋଗଦେଇଥିଲେ।
