ନୂଆଦିଲ୍ଲୀ,୧୩ା୪ : ଭାରତରେ ୩ ବର୍ଷ ମଧ୍ୟରେ ପ୍ରଥମ ଥର ପାଇଁ ଚଳିତ ବର୍ଷ ସ୍ବାଭାବିକଠାରୁ କମ୍ ବୃଷ୍ଟିପାତ ହୋଇପାରେ ବୋଲି ସୋମବାର ସରକାରଙ୍କ ପକ୍ଷରୁ କୁହାଯାଇଛି। ଇରାନ ଯୁଦ୍ଧ ଯୋଗୁ ମୁଦ୍ରାସ୍ଫୀତି ବଢ଼ିଥିବାବେଳେ କମ୍ ବୃଷ୍ଟିପାତ ହେଲେ କୃଷି ଉତ୍ପାଦନ କମିବା ସହ ଏସିଆର ତୃତୀୟ ବୃହତ୍ ଅର୍ଥନୀତିର ଅଭିବୃଦ୍ଧି ହାରକୁ ନେଇ ଚିନ୍ତା ପ୍ରକଟ କରାଯାଇଛି। ପ୍ରାୟ ୪ ଟ୍ରିଲିୟନ ଡଲାର ଅର୍ଥନୀତି ଭାରତର ଜବନରେଖା ହେଉଛି ମୌସୁମୀ। କୃଷିକ୍ଷେତ୍ର, ଭୂତଳ ଜଳସ୍ତରକୁ ପୁନଃ ପୂର୍ଣ୍ଣ କରିବା ଏବଂ ଜଳଭଣ୍ଡାରଗୁଡ଼ିକ ପାଇଁ ଆବଶ୍ୟକ ଜଳର ପ୍ରାୟ ୭୦ ପ୍ରତିଶତ ମୌସୁମୀ ବୃଷ୍ଟିପାତରୁ ମିଳିଥାଏ।
ମୌସୁମୀ ପ୍ରତିବର୍ଷ ପ୍ରାୟତଃ ଜୁନ୍ ୧ରେ ଦକ୍ଷିଣ ଭାରତୀୟ ରାଜ୍ୟ କେରଳରେ ପହଞ୍ଚତ୍ ସେପ୍ଟେମ୍ବର ମଧ୍ୟଭାଗ ବେଳକୁ ପ୍ରତ୍ୟାବର୍ତ୍ତନ କରିଥାଏ। ଚଳିତ ବର୍ଷ ଦୀର୍ଘମିଆଦୀ ହାରାହାରିର ୯୨ ପ୍ରତିଶତ ବୃଷ୍ଟିପାତ ହେବ ବୋଲି ଭୂବିଜ୍ଞାନ ମନ୍ତ୍ରଣାଳୟର ସଚିବ ଏମ୍. ରବିଚନ୍ଦ୍ରନ୍ ଏକ ଖବରଦାତା ସମ୍ମିଳନୀରେ କହିଛନ୍ତି। ଚତୁର୍ମାସ ବର୍ଷାଋତୁର ୫୦ ବର୍ଷର ହାରାହାରି ବୃଷ୍ଟିପାତ ୮୭ ସେମି (୩୫ ଇଞ୍ଚ)ର ୯୬%ରୁ ୧୦୪% ମଧ୍ୟରେ ହେଉଥିବା ବର୍ଷାକୁ ସ୍ବାଭାବିକ ଧରାଯାଇଥାଏ ବୋଲି ଭାରତୀୟ ପାଣିପାଗ ବିଭାଗ (ଆଇଏମ୍ଡି) କହିଛି।
ଆଇଏମ୍ଡି ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ରଙ୍କ କହିବା ଅନୁଯାୟୀ ସମ୍ପ୍ରତି ଦୁର୍ବଳ ଲା-ନିନା ସ୍ଥିତି ବଦଳି ସାଧାରଣ ସ୍ଥିତିକୁ ଆସୁଛି। ତେବେ ଜୁନ୍ ପରେ ଏଲ୍-ନିନୋ ବିକଶିତ ହୋଇପାରେ। କେନ୍ଦ୍ରୀୟ ଏବଂ ପୂର୍ବ ପ୍ରଶାନ୍ତ ମହାସାଗରର ତାପମାତ୍ରା ସ୍ବାଭାବିକଠାରୁ ବୃଦ୍ଧି ପାଇଲେ ଏଲ୍-ନିନୋ ସ୍ଥିତି ଉପୁଜିଥାଏ। ଫଳରେ ଦକ୍ଷିଣପୂର୍ବ ଏସିଆ ଏବଂ ବିଶ୍ୱର ଅନ୍ୟାନ୍ୟ ଭାଗରେ ଉତ୍ତପ୍ତ ଓ ଶୁଷ୍କ ପାଗ ଦେଖାଦିଏ। ଅଧିକାଂଶ ଏଲ୍-ନିନୋ ବର୍ଷରେ ଭାରତରେ ସ୍ବାଭାବିକଠାରୁ କମ୍ ବୃଷ୍ଟିପାତ ହୋଇଛି ଏବଂ ବେଳେବେଳେ ଉତ୍କଟ ମରୁଡ଼ି ଦେଖାଦେବା ଫଳରେ ଫସଲ ନଷ୍ଟ ହୋଇଛି। କୃଷି ଉତ୍ପାଦନ ହ୍ରାସ ପାଇଲେ ଶସ୍ୟ ରପ୍ତାନି କମିଯିବ। ତେବେ ମୌସୁମୀ ଋତୁର ପରବର୍ତ୍ତୀ ଭାଗରେ ଭାରତ ମହାସାଗରରେ ସକାରାତ୍ମକ ଦ୍ୱିଧ୍ରୁବୀୟ ସ୍ଥିତି ବିକଶିତ ହେବାକୁ ଥିବାରୁ ମୌସୁମୀ ପାଇଁ ସହାୟକ ହେବ ବୋଲି ମହାପାତ୍ର କହିଛନ୍ତି। ଭାରତ ମହାସାଗରରେ ଦ୍ୱିଧ୍ରୁବୀୟ (ଆଇଓଡି) ସ୍ଥିତି ହେଉଛି ପଶ୍ଚିମ ଏବଂ ପୂର୍ବ ଭାରତ ମହାସାଗରର ତାପମାତ୍ରାରେ ପାର୍ଥକ୍ୟ ଦେଖାଦେବା। ସକାରାତ୍ମକ ଆଇଓଡି ଅର୍ଥ ପଶ୍ଚିମ ଭାରତ ମହାସାଗରର ଜଳ ତାପମାତ୍ରା ସ୍ବାଭାବିକଠାରୁ ଅଧିକ ରହିବା। ଏହା ଭାରତରେ ମୌସୁମୀ ବର୍ଷାକୁ ସକ୍ରିୟ କରିବାରେ ସହାୟକ ହୋଇଥାଏ। ଗତ ୨ ବର୍ଷରେ ବୃଷ୍ଟିପାତ ସ୍ବାଭାବିକଠାରୁ ଅଧିକ ଥିବାବେଳେ ଚଳିତ ବର୍ଷ କମ୍ ବର୍ଷା ହେବାକୁ ଥିବାରୁ ଫସଲ ଉତ୍ପାଦନ, ମୁଦ୍ରାସ୍ଫୀତି ଏବଂ ସାମଗ୍ରିକ ଅର୍ଥନୈତିକ ଅଭିବୃଦ୍ଧି ଉପରେ ଏହାର ପ୍ରଭାବକୁ ନେଇ ନୀତି ନିର୍ଦ୍ଧାରକ ଏବଂ ବଜାର ଏହି ପୂର୍ବାନୁମାନକୁ ନିବିଡ଼ ଭାବରେ ଅନୁସରଣ କରିବେ।
