ଭୁବନେଶ୍ୱର,୧୨ା୭ (ସୌମ୍ୟରଞ୍ଜନ ରାଉତ): ଭାରତୀୟ ଚଳଚ୍ଚିତ୍ର ସଙ୍ଗୀତ ଜଗତର ଏକ ସ୍ୱର୍ଣ୍ଣିମ ଅଧ୍ୟାୟର ଅବସାନ ଘଟିଛି। ଦକ୍ଷିଣ ଭାରତର ପ୍ରଖ୍ୟାତ ପାର୍ଶ୍ୱଗାୟିକା ଏସ୍. ଜାନକୀଙ୍କର ଶନିବାର ମହୀଶୂରସ୍ଥିତ ଆପୋଲୋ ହସ୍ପିଟାଲରେ ୮୮ ବର୍ଷ ବୟସରେ ପରଲୋକ ହୋଇଯାଇଛି। ବୟସଜନିତ ଅସୁସ୍ଥତା ଯୋଗୁ ସେ ଚିକିତ୍ସାଧୀନ ଥିଲେ। ତାଙ୍କ ବିୟୋଗରେ ଚଳଚ୍ଚିତ୍ର ଓ ସଙ୍ଗୀତ ଜଗତରେ ଶୋକର ଛାୟା ଖେଳିଯାଇଛି। ୧୯୫୭ରେ ପାର୍ଶ୍ୱଗାୟିକା ଭାବେ କ୍ୟାରିୟର ଆରମ୍ଭ କରିଥିବା ଜାନକୀ ପ୍ରାୟ ୭ ଦଶନ୍ଧି ଧରି ଶ୍ରୋତାଙ୍କୁ ମୁଗ୍ଧ କରିଆସିଥିଲେ। ଓଡ଼ିଆ ସମେତ ୨୦ରୁ ଅଧିକ ଭାଷାରେ ଅନେକ ହଜାର ଗୀତ ଗାଇ ସେ ଭାରତୀୟ ସିନେମାର ଅନ୍ୟତମ ସଫଳ ପାର୍ଶ୍ୱଗାୟିକା ଭାବେ ପରିଚିତ ହୋଇଥିଲେ। ସଙ୍ଗୀତ ନିର୍ଦ୍ଦେଶକ ଇଲିୟରାଜା ଓ କିମ୍ୱଦନ୍ତୀ ଗାୟକ ଏସ୍ ପି ବାଲ୍ସୁବ୍ରମଣ୍ୟମଙ୍କ ସହ କଣ୍ଠଦାନ କରି ଭାରତୀୟ ସଙ୍ଗୀତକୁ ଅନେକ କାଳଜୟୀ ଗୀତ ଉପହାର ଦେଇଛନ୍ତି। ଦୀର୍ଘ କ୍ୟାରିୟରରେ ଜାନକୀ ୪ଟି ଜାତୀୟ ଚଳଚ୍ଚିତ୍ର ପୁରସ୍କାର ଓ ବିଭିନ୍ନ ରାଜ୍ୟର ୩୩ଟି ରାଜ୍ୟ ଚଳଚ୍ଚିତ୍ର ପୁରସ୍କାର ଅର୍ଜନ କରିଥିଲେ। ୨୦୧୩ରେ ତାଙ୍କୁ ପଦ୍ମଭୂଷଣ ସମ୍ମାନ ମିଳିଥିଲେ ମଧ୍ୟ ବିଳମ୍ୱ ଦର୍ଶାଇ ସେ ଗ୍ରହଣ କରି ନ ଥିଲେ। ତାଙ୍କ ମତରେ ଦୀର୍ଘ ସଙ୍ଗୀତ ସାଧନା ପାଇଁ ସେ ଦେଶର ସର୍ୱୋଚ୍ଚ ନାଗରିକ ସମ୍ମାନ ‘ଭାରତ ରତ୍ନ’ର ଯୋଗ୍ୟ ଥିଲେ। ୧୯୫୯ରେ ଭି. ରାମପ୍ରସାଦଙ୍କୁ ବିବାହ କରିଥିବା ଜାନକୀ ସ୍ୱାମୀଙ୍କ ପରଲୋକ ପରେ ହାଇଦ୍ରାବାଦରେ ରହୁଥିଲେ। ତାଙ୍କ ଦେହାନ୍ତ ସହ ଭାରତୀୟ ଚଳଚ୍ଚିତ୍ର ସଙ୍ଗୀତ ଏକ ଅମୂଲ୍ୟ କଣ୍ଠସ୍ୱରକୁ ହରାଇଛି। କିନ୍ତୁ ତାଙ୍କ ଗୀତ ପିଢ଼ି ପରେ ପିଢ଼ି ଶ୍ରୋତାଙ୍କ ହୃଦୟରେ ଚିରସ୍ମରଣୀୟ ହୋଇ ରହିବ।
ଏସ୍. ଜାନକୀ ୬୦ରୁ ଅଧିକ ଓଡ଼ିଆ ଗୀତ ଗାଇଛନ୍ତି। ସେ ୧୯୭୦ରେ ମୁକ୍ତିଲାଭ କରିଥିବା ପ୍ରଶାନ୍ତ ନନ୍ଦଙ୍କ ନିର୍ଦ୍ଦେଶିତ ‘ବଳିଦାନ’ ସିନେମାର ‘ନେଇ ଯାରେ ମେଘ ମୋତେ’ ଗୀତ ହେଉ ବା ‘ପଳାତକ’ ଚଳଚ୍ଚିତ୍ରର ‘ମୋ ମନ ଉପବନ’ ହେଉ ବା ‘ଗୌରୀ’ ସିନେମାର ‘ଗୋରା ଗୋରା ଗାଲେ ତୋର କଳା କଳା ଜାଇ’, ଅଲିଭା ଦାଗ ଆଲବମ୍ରେ ‘ଛୁଅଁନା ମୋତେ’ ଭଳି ଚିର ସବୁଜ ଗୀତ ଗାଇ ଓଡ଼ିଶାବାସୀଙ୍କ ହୃଦୟ ଜିତିଥିଲେ। ସେହିପରି ସ୍ୱପ୍ନର କୁହୁଡ଼ିରେ, କାନ୍ତଭରା ଦିବା ରଜନୀ, ପାଦରେ ପାଦ ଛନ୍ଦା, ଯା ଯାରେ ନାଗର, କାଉ ଧାନ ଖାଇଲା ବୋଲି, ମୁଁ ଯେ ଜାଣେନା କାହା ବାଟ ରହିଛି ଚାହିଁ.. ଭଳି କେତେକ ଲୋକପ୍ରିୟ ଗୀତ ଗାଇ ସେ ଓଡ଼ିଶାବାସୀଙ୍କ ହୃଦୟରେ ସ୍ଥାନ ପାଇଥିଲେ। ଓଡ଼ିଆ ସିନେମା ଓ ସଙ୍ଗୀତ ଜଗତର କିମ୍ୱଦନ୍ତୀ ଗାୟକ ଅକ୍ଷୟ ମହାନ୍ତି, ପ୍ରଫୁଲ୍ଲ କରଙ୍କ ଭଳି ସଙ୍ଗୀତ ନିର୍ଦ୍ଦେଶକଙ୍କ ଗୀତକୁ ନିଜ ଯାଦୁକରୀ କଣ୍ଠରୁ ବେଶ୍ ସୁମଧୁର ଭାବେ ପରଷି ଦେଉଥିଲେ ଜାନକୀ।
