ପୁରୀ ଅଫିସ/ କୋଣାର୍କ,୧୩।୧୨(ଡି.ଏନ୍.ଏ.):କୋଣାର୍କ ସୂର୍ଯ୍ୟମନ୍ଦିରରେ ଧାଡ଼ି କରି ଏଲ୍ଇଡି ଲାଇଟ୍ ଲଗାଯାଇଥିବାରୁ ବିକୃତ ଭାବେ ଦୂରରୁ ଆଲୋକୀକରଣ ହେଉଥିଲା। ଏ ନେଇ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଅସନ୍ତୋଷ ପ୍ରକାଶ କରିବା ସହ ଏଏସ୍ଆଇ ଓ ସଂସ୍କୃତ ବିଭାଗକୁ ଟୁଇଟ୍ ଜରିଆରେ ଜଣାଇ ଏହି ଆଲୋକୀକରଣକୁ ବନ୍ଦ କରିବାକୁ ଦାବି ରଖିଥିଲେ। ତେବେ ଏଏସ୍ଆଇ ପକ୍ଷରୁ ସୋମବାର ଶିଳ୍ପୀ ପଟ୍ଟନାୟକଙ୍କ ସହ ଆଲୋଚନା କରିବା ସହ ସୂର୍ଯ୍ୟମନ୍ଦିରରୁ ଆଲୋକୀକରଣ ହେଉଥିବା ଏଲ୍ଇଡି ଲାଇଟ୍କୁ ବନ୍ଦ କରି ଦିଆଯାଇଛି। ଏଥିସହ ନୂତନ ଭାବେ ଆଲୋକୀକରଣ କରିବା ଦିଗରେ କାର୍ଯ୍ୟ କରାଯିବା ନେଇ ଏଏସ୍ଆଇ ସୂଚନା ଦେଇଥିବା ଶିଳ୍ପୀ ପଟ୍ଟନାୟକ କହିଛନ୍ତି। ଶିଳ୍ପୀ ସୁଦର୍ଶନ ପଟ୍ଟନାୟକଙ୍କ ସୂଚନା ଅନୁଯାୟୀ, ଏଏସ୍ଆଇ ପକ୍ଷରୁ କୋଣାର୍କ ସୂର୍ଯ୍ୟ ମନ୍ଦିରରେ ଯେଉଁ ଏଲ୍ଇଡି ଲଗାଯାଇଥିଲା। ସେଥିରେ ରାତିରେ ଦୂରରୁ ସୂର୍ଯ୍ୟମନ୍ଦିରକୁ ଦେଖିଲେ ମନ୍ଦିର ଉପରେ ଏକ ଗାର ଦୃଶ୍ୟମାନ ହେଉଥିଲା ଯାହା ଅତ୍ୟନ୍ତ ଖରାପ ଦେଖାଯାଉଥିଲା। ଯାହାଦ୍ୱାରା କୋଣାର୍କ ଐତିହ୍ୟ, କଳା, ଭାସ୍କର୍ଯ୍ୟକୁ ବିକୃତ କରୁଥିଲା। ଏ ନେଇ ଏଏସ୍ଆଇକୁ ଟୁଇଟ କରିବା ସହ ଗତ ୮ ତାରିଖରେ କୋଣାର୍କ ଯାତ୍ରୀ ନିବାସରେ ଏକ ପ୍ରେସ୍ମିଟ୍ କରି ଏହି ସମ୍ପର୍କରେ ଅବଗତ କରାଇଥିଲେ। ଫଳରେ ଉକ୍ତ ଖବର ସମସ୍ତ ଗଣମାଧ୍ୟମରେ ପ୍ରକାଶ ପାଇବା ସହ ଏଏସ୍ଆଇ ପକ୍ଷରୁ ଏହି ଲାଇଟ୍ ବ୍ୟବସ୍ଥା ପରିବର୍ତ୍ତନ ପାଇଁ ନିର୍ଦ୍ଦେଶ ଆସିବାରୁ ଏଲ୍ଇଡି ଲାଇଟ୍ଗୁଡ଼ିକୁ ବନ୍ଦ କରାଯାଇଥିବା ସଂରକ୍ଷଣ ଅଧିକାରୀ ନିରଜ ସିଂ କହିଛନ୍ତି। ଅନ୍ୟପଟେ ଘଟଣା ସମ୍ପର୍କରେ ଏଏସ୍ଆଇ ସୁପରିଣ୍ଟେଣ୍ଡେଣ୍ଟ ସୁଦର୍ଶନଙ୍କ ସହ କଥା ହୋଇ ଆହୁରି ଭଲ କରାଯାଇ ଲାଇଟିଂର ଡିଜାଇନ ପରିବର୍ତ୍ତନ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। ଏଏସ୍ଆଇ ପକ୍ଷରୁ ପ୍ରତିଶ୍ରୁତି ପ୍ରଦାନ କରାଯାଇଥିବାରୁ ଶିଳ୍ପୀ ପଟ୍ଟନାୟକ ଏଏସ୍ଆଇକୁ ଧନ୍ୟବାଦ ଜଣାଇଛନ୍ତି। ଆଲୋକୀକରଣ ଉପରେ ଆଗକୁ ଯେଉଁ ଉନ୍ନତ ତଥା ସୁନ୍ଦର କାର୍ଯ୍ୟ କରାଯିବ ତାକୁ ସେ ସ୍ବାଗତ କରିବେ ବୋଲି କହିଛନ୍ତି।
