ଭୋପାଳ,୨।୧୦: ମଧ୍ୟପ୍ରଦେଶ ହାଇକୋର୍ଟରେ ଏକ ମାମଲା ରୁଜୁ ହୋଇଛି। ଏଥିରେ ଜଣେ ମହିଳା ମା’ ହେବାକୁ ଚାହୁଁଥିବାରୁ ତାଙ୍କ ସ୍ବାମୀଙ୍କୁ ଜେଲରୁ ମୁକ୍ତ କରିବାକୁ ଗୁହାରି କରିଛନ୍ତି। ବର୍ତ୍ତମାନ ଏହି ମାମଲାରେ ହାଇକୋର୍ଟ ମହିଳାଙ୍କ ଡାକ୍ତରୀ ପରୀକ୍ଷା ପାଇଁ ନିର୍ଦ୍ଦେଶ ଦେଇଛନ୍ତି, ଯାହା ଦ୍ୱାରା ସେ ଗର୍ଭବତୀ ହୋଇପାରିବେ କି ନାହିଁ ତାହା ଜାଣିପାରିବେ। ମହିଳାଙ୍କ ସ୍ବାମୀ କିଛି ଆପରାଧିକ ମାମଲାରେ ଇନ୍ଦୋର ସେଣ୍ଟ୍ରାଲ ଜେଲରେ ରହିଛନ୍ତି। ଆବେଦନକାରୀ ମହିଳା ମଧ୍ୟ ସନ୍ତାନ ପ୍ରସବ କରିବାକୁ ଇନ୍ଦୋର ଜେଲରୁ ୧୫ ରୁ ୨୦ ଦିନ ପର୍ଯ୍ୟନ୍ତ ତାଙ୍କ ସ୍ବାମୀଙ୍କୁ ମୁକ୍ତ କରିବାକୁ ଦାବି କରି ମଧ୍ୟପ୍ରଦେଶ ହାଇକୋର୍ଟରେ ଆବେଦନ କରିଛନ୍ତି। ସେ ତାଙ୍କର ‘ମୌଳିକ ଅଧିକାର’ ଭାବରେ ସନ୍ତାନ ପାଇବାକୁ କୋର୍ଟରେ ଏହି ଆବେଦନ ମାଧ୍ୟମରେ କହିଛନ୍ତି।
ଏହି ମାମଲାର ଶୁଣାଣି ବେଳେ ଜଷ୍ଟିସ ବିବେକ ଅଗ୍ରୱାଲଙ୍କ ବେଞ୍ଚ ଜବଲପୁର ମେଡିକାଲ କଲେଜର ଡିନଙ୍କୁ ବିଶେଷଜ୍ଞ ଡାକ୍ତରଙ୍କ ଦଳ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି। ଆବେଦନକାରୀ ମହିଳା ଗର୍ଭଧାରଣ ପାଇଁ ଶାରୀରିକ ଭାବେ ଫିଟ ଅଛନ୍ତି କି ନାହିଁ ତାହା ଡାକ୍ତରଙ୍କ ଏହି ଟିମ ଯାଞ୍ଚ କରିବ। ଏହି ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୨୨ରେ ହେବ।
