ନୂଆଦିଲ୍ଲୀ,(ପି.ଟି.)/ଭୁବନେଶ୍ୱର,୨।୪ (ବ୍ୟୁରୋ): ବୋର୍ଡ ପରୀକ୍ଷା ଦେବାକୁ ଥିବା ଛାତ୍ରୀଛାତ୍ରମାନଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଚର୍ଚ୍ଚା କରିବା ସହ ସେମାନଙ୍କୁ କେତେକ ମୂଲ୍ୟବାନ୍ ପରାମର୍ଶ ଦେଇଛନ୍ତି। ପରୀକ୍ଷା ପାଇଁ ବ୍ୟତିବ୍ୟସ୍ତ ନ ହୋଇ ଏହାକୁ ଉତ୍ସବ ଭାବେ ପାଳନ କରିବାକୁ ସେ ପିଲାମାନଙ୍କୁ କହିଛନ୍ତି। ସେହିପରି ଅଭିଭାବକ ଏବଂ ଶିକ୍ଷକମାନେ ମଧ୍ୟ ସେମାନଙ୍କ ଅଧୁରା ସ୍ବପ୍ନ ଓ ଆଶା ଆକାଂକ୍ଷାକୁ ପିଲାମାନଙ୍କ ଉପରେ ଚାପି ନ ଦେବା ପାଇଁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି।
ପରୀକ୍ଷା ପ୍ରସ୍ତୁତିରେ ହ୍ବାଟ୍ସଆପ୍, ୟୁ-ଟ୍ୟୁବ୍ ଭଳି ସୋସିଆଲ ମିଡିଆ ଧ୍ୟାନ ଭଙ୍ଗ କରୁଥିବାରୁ ଏଥିରୁ ମୁକୁଳିବା ଲାଗି ଛାତ୍ରୀଛାତ୍ର ପ୍ରଧାନମନ୍ତ୍ରୀଙ୍କଠାରୁ ଟିପ୍ସ ଚାହିଁଥିଲେ। ତେବେ ମାଧ୍ୟମ ନୁହେଁ ଆମ ମନ ହିଁ ସମସ୍ୟା ବୋଲି ମୋଦି କହିଥିଲେ। ଅନ୍ଲାଇନ ହେଉ ବା ଅଫ୍ଲାଇନ, ଯେତେବେଳେ ମନ ପାଠ ସହ ଓତପ୍ରୋତ ଭାବେ ଜଡ଼ିତ ହୋଇଯିବ, ସେତେବେଳେ ଧ୍ୟାନଭଙ୍ଗ ହେବ ନାହିଁ। ଶିକ୍ଷାର ନୂଆ ମାଧ୍ୟମକୁ ଚ୍ୟାଲେଞ୍ଜ ନୁହେଁ, ଏକ ସୁଯୋଗ ଭାବେ ଗ୍ରହଣ କରାଯିବା ଆବଶ୍ୟକ। ଅଫ୍ଲାଇନ ଅଧ୍ୟୟନକୁ ଅନ୍ଲାଇନ ଆଗକୁ ବଢ଼ାଇବାରେ ସହାୟକ ହୋଇଥାଏ। ତେଣୁ ପିଲାମାନେ ଅନ୍ଲାଇନରେ ଶିକ୍ଷା ଗ୍ରହଣ କରି ଏହାକୁ ଅଫ୍ଲାଇନରେ ପ୍ରୟୋଗ କରିବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି।
ପିଲାମାନେ ପ୍ରଥମ ଥର ଲାଗି ପରୀକ୍ଷା ଦେଉନାହାନ୍ତି। ସେମାନେ ପୂର୍ବରୁ ପରୀକ୍ଷାକୁ ସଫଳତାର ସହ ସମ୍ମୁଖୀନ ହୋଇଛନ୍ତି। ତେଣୁ ଏହାକୁ ନେଇ ବିବ୍ରତ ହେବା ଆବଶ୍ୟକ ନାହିଁ। ସେମାନେ ଦୈନନ୍ଦିନ ଜୀବନରେ ଚିନ୍ତାମୁକ୍ତ ରୁହନ୍ତୁ। କାହାକୁ ଅନୁକରଣ କରିବା ଆବଶ୍ୟକ ନାହିଁ ବୋଲି ପ୍ରଧାନମନ୍ତ୍ରୀ କହିଛନ୍ତି।
ପରୀକ୍ଷା ପେ ଚର୍ଚ୍ଚା ତାଙ୍କର ସବୁଠୁ ପ୍ରିୟ କାର୍ଯ୍ୟକ୍ରମ ବୋଲି ପ୍ରଧାନମନ୍ତ୍ରୀ କହିବା ସହ ଏହି ଅବସରରେ ସେ ପିଲାମାନଙ୍କଠାରୁ ଅନେକ ଶିଖିବାର ସୁଯୋଗ ପାଇଥାନ୍ତି ବୋଲି ତଲକତୋରା ଷ୍ଟାଡିୟମ୍ରେ ଉପସ୍ଥିତ ଛାତ୍ରୀଛାତ୍ରଙ୍କୁ କହିଥିଲେ। ତାଙ୍କ ସରକାରଙ୍କ ଦ୍ୱାରା ଘୋଷଣା କରାଯାଇଥିବା ଜାତୀୟ ଶିକ୍ଷାନୀତିକୁ ଦେଶର ସବୁ ବର୍ଗ ସ୍ବାଗତ କରିଛନ୍ତି। ନୀତି ସରକାରଙ୍କ ଦ୍ୱାରା ନୁହେଁ ବରଂ ନାଗରିକ, ଛାତ୍ରୀଛାତ୍ର ଓ ଶିକ୍ଷକମାନଙ୍କ ଦ୍ୱାରା ଦେଶର ବିକାଶ ପାଇଁ ପ୍ରସ୍ତୁତ ହୋଇଛି ବୋଲି ପ୍ରଧାନମନ୍ତ୍ରୀ କହିଛନ୍ତି।
ଏହି ପରିପ୍ରେକ୍ଷୀରେ ଓଡ଼ିଶା ରାଜଭବନ ପରିସରରେ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ରାଜ୍ୟପାଳ ପ୍ରଫେସର ଡ. ଗଣେଶୀ ଲାଲ, ଛାତ୍ରୀଛାତ୍ର, ଶିକ୍ଷୟିତ୍ରୀ ଶିକ୍ଷକଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ। ସେହିଭଳି ଭୁବନେଶ୍ୱର ୟୁନିଟ୍-୩ସ୍ଥିତ କ୍ୟାପିଟାଲ ହାଇସ୍କୁଲରେ ମଧ୍ୟ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
