ଭୁବନେଶ୍ୱର,୧୪ା୧୦(ବ୍ୟୁରୋ): ରାଜନେତା, ଚଳଚ୍ଚିତ୍ର ପ୍ରଯୋଜକ, ଅଭିନେତା, ବ୍ୟବସାୟୀ, ପ୍ରଶାସନିକ ଓ ପୋଲିସ ଅଧିକାରୀଙ୍କୁ ବ୍ଲାକ୍ମେଲିଂ କରି ଟଙ୍କା ଲୁଟୁଥିବା ରହସ୍ୟମୟୀ ମହିଳା ଅର୍ଚ୍ଚନା ନାଗଙ୍କ ଗିରଫ ଘଟଣାରେ ଦିନକୁ ଦିନ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପଦାକୁ ଆସିବାରେ ଲାଗିଛି। ରାଜ୍ୟର ବିଭିନ୍ନ ରାଜନୈତିକ ଦଳର ୨୫ରୁ ଅଧିକ ନେତା ଅର୍ଚ୍ଚନାଙ୍କ ମାୟାଜାଲରେ ଫସିଥିବା କୁହାଯାଉଛି। ତେବେ ଏହି ମାମଲାରେ ଶାସକ ଦଳର ଅଧିକ ନେତା ଓ ମନ୍ତ୍ରୀ ସମ୍ପୃକ୍ତ ଥିବାରୁ କମିଶନରେଟ ପୋଲିସର ତଦନ୍ତରେ ଶିଥିଳତା ପଡ଼ିଥିବା ଚର୍ଚ୍ଚା ହେଉଛି। ଏପରି ସ୍ଥିତିରେ ଗୁରୁବାର ଭୁବନେଶ୍ୱର ଭାଜପା ଜିଲା ସଭାପତି ବାବୁ ସିଂ ତାଙ୍କ ପ୍ରତିକ୍ରିୟାରେ ବହୁ ବିସ୍ଫୋରକ ତଥ୍ୟ ରଖିଛନ୍ତି। ସେ କହିଛନ୍ତି, ଅର୍ଚ୍ଚନାଙ୍କ ଲିଙ୍କ୍ରେ ୩ ମନ୍ତ୍ରୀଙ୍କ ସମେତ ପ୍ରାୟ ୧୮ ବିିଧାୟକ ରହିଛନ୍ତି। ୨ ବର୍ଷ ହେବ ବିଜେଡିର ବହୁ ଯୁବ ନେତୃତ୍ୱ ବି ଅର୍ଚ୍ଚନାଙ୍କ ଘରକୁ ରୀତିମତ ଆସୁଥିଲେ। ଅର୍ଚ୍ଚନାଙ୍କ ସ୍ବାମୀ ଜଗବନ୍ଧୁ ଡ୍ରଗ୍ସ କାରବାରରେ ସମ୍ପୃକ୍ତ ରହିଥିବା ସିଂ ଅଭିଯୋଗ ଆଣିଛନ୍ତି। ଅପରପକ୍ଷରେ ଅର୍ଚ୍ଚନା ପଳାଶୁଣୀ ସତ୍ୟବିହାରରେ ରହୁଥିଲେ ମଧ୍ୟ ଖଣ୍ଡଗିରି ଜାଗମରାରେ ଘରଭଡ଼ା ନେଇ ରଙ୍ଗଶାଳା କରିଥିଲେ ବୋଲି କୁହାଯାଉଛି। ସେଠାରେ ସେ ବିଭିନ୍ନ ଲୋକଙ୍କୁ ଫସାଇ ବ୍ଲାକମେଲ୍ କରୁଥିଲେ। ଯୁବତୀଙ୍କ ସହ କ୍ଷମତାଶାଳୀ ଲୋକମାନେ ଅନ୍ତରଙ୍ଗ ମୁହୂର୍ତ୍ତ ବିତାଉଥିବାବେଳେ ଅର୍ଚ୍ଚନା ଚାବିରିଙ୍ଗ, ଭ୍ୟାନିଟି ଆଦିରେ ସ୍ପାଏ କ୍ୟାମେରା ଖଞ୍ଜି ସେମାନଙ୍କର ଭିଡିଓ ଉତ୍ତୋଳନ କରୁଥିଲେ। ପରେ ଏହି ଭିଡିଓ ମାଧ୍ୟମରେ ବ୍ଲାକ୍ମେଲିଂ କରି ଅର୍ଥ ରୋଜଗାର କରୁଥିଲେ। ଅର୍ଚ୍ଚନା ଅଲ୍ଲାଇନ୍ ମାଧ୍ୟମରେ ଏସବୁ କ୍ୟାମେରା ଆଣୁଥିଲେ ବୋଲି ସୂଚନା ମିଳିଛି।
ଅନ୍ୟପକ୍ଷରେ ଅର୍ଚ୍ଚନାଙ୍କ ନାଁରେ ଥିବା ବ୍ୟାଙ୍କ୍ ଆକାଉଣ୍ଟ, ଫିକ୍ସଡ୍ ଡିପୋଜିଟ୍ ଏବଂ ୫ ବର୍ଷ ମଧ୍ୟରେ କରାଯାଇଥିବା କାରବାର ବିଷୟରେ ତଥ୍ୟ ଦେବାକୁ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆର୍ବିଆଇ)କୁ ପୋଲିସ ପକ୍ଷରୁ ଚିଠି ଲେଖାଯାଇଥିଲା। ଏଯାବତ୍ ୫ଟି ଆକାଉଣ୍ଟ ସମ୍ପର୍କରେ ପୋଲିସକୁ ତଥ୍ୟ ମିଳିଥିବା ଜଣାପଡ଼ିଛି। ୬ମାସ ମଧ୍ୟରେ ଏସବୁ ଆକାଉଣ୍ଟରେ ୫ କୋଟିରୁ ଅଧିକ କାରବାର ହୋଇଛି। ସବୁଠୁ ବଡ଼କଥା ହେଲା, ନୟାଗଡ଼ର ଜଣେ ଯୁବ ବ୍ୟବସାୟୀ ୫୦ ଲକ୍ଷ ଟଙ୍କା ଦେଇଥିବା ତଥ୍ୟ ମଧ୍ୟ ସାମ୍ନାକୁ ଆସୁଛି। ସେପଟେ ଅର୍ଚ୍ଚନାଙ୍କ ସହ ବହୁ ନେତା ଓ ମନ୍ତ୍ରୀଙ୍କ ଲିଙ୍କ ଥିବାରୁ କମିଶନରେଟ ପୋଲିସ ତାଙ୍କୁ ରିମାଣ୍ଡରେ ଆଣି ପଚରାଉଚରା କରିବ ବୋଲି ଚର୍ଚ୍ଚା ହେଉଥିଲା। ହେଲେ ଏପର୍ଯ୍ୟନ୍ତ ପୋଲିସ ପକ୍ଷରୁ ଏହି ପ୍ରୟାସ କରାଯାଇନାହିଁ। ଏହି ମାମଲାରେ ଆଗାମୀ ଦିନେ କିମ୍ବା ୨ଦିନ ମଧ୍ୟରେ କୋର୍ଟଙ୍କ ନିକଟରେ ଜାମିନ ଆବେଦନ କରାଯିବ ବୋଲି ଅର୍ଚ୍ଚନାଙ୍କ ପକ୍ଷରୁ ମାମଲା ଲଢ଼ୁଥିବା ଆଇନଜୀବୀ ଦେବାଶିଷ ମହାପାତ୍ର କହିଛନ୍ତି।
