ଯାଜପୁର,୬ା୪(ହର୍ଷବର୍ଦ୍ଧନ ବେହେରା): ବିଜେଡିର ତୃତୀୟ ପର୍ଯ୍ୟାୟ ପ୍ରାର୍ଥୀ ତାଲିକା ଶୁକ୍ରବାର ଘୋଷଣା ହୋଇଛି। ଏହାପରେ ବି ଯାଜପୁର ଜିଲାର କୋରେଇ, ବରୀ ଓ ବଡ଼ଚଣା ବିଧାନସଭା ପାଇଁ ପ୍ରାର୍ଥୀଙ୍କ ତାଲିକା ଝୁଲି ରହିଛି। ଆଗଧାଡ଼ିର କେତେଜଣ ନେତା ଓ ତାଙ୍କ ପରିବାର ସଦସ୍ୟା/ସଦସ୍ୟଙ୍କ ଏହି ୩ ଆସନ ଉପରେ ନଜର ରହିଛି। କୋରେଇ ଓ ବଡ଼ଚଣାରେ ଭାଜପା ପ୍ରାର୍ଥୀ ପ୍ରଚାର ଆରମ୍ଭ କରିଦେଇଥିବାବେଳେ ବିଜେଡି ଟିକେଟ୍ ପାଇଁ ଆଶାୟୀ ଥିବା ନେତା ନିରାଶ ହୋଇଛନ୍ତି। ଏପରି କି ସେମାନଙ୍କ ସମର୍ଥକମାନେ ମଧ୍ୟ ନୀରବୀ ଯାଇଛନ୍ତି।
କୋରେଇ ନିର୍ବାଚନମଣ୍ଡଳୀରେ ପ୍ରାର୍ଥୀ ଘୋଷଣାକୁ ନେଇ ଅଧିକ ଚର୍ଚ୍ଚା ହେଉଛି। ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡେଇଙ୍କ ସ୍ତ୍ରୀ ଝିଲ୍ଲିକ ଭଟ୍ଟାଚାର୍ଯ୍ୟ ଏହି ଆସନ ପାଇଁ ଲବି ଜୋର କରି ଦେଇଛନ୍ତି। ଏହାସହ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବପ୍ରକାଶ ଦାସଙ୍କ ପରିବାରର ସଦସ୍ୟ ଏଠାରେ ନିର୍ବାଚନ ଲଢନ୍ତୁ ବୋଲି କେତେଜଣ ସମର୍ଥକ ଦାବି କରୁଛନ୍ତି। ଏହିକ୍ରମରେ ଝିଲ୍ଲିକ କିମ୍ବା ଦାସ ପରିବାରର ଲୋକ ପ୍ରାର୍ଥୀ ହେଲେ ପରିବାରବାଦ ରାଜନୀତି ପୁଣି ଆରମ୍ଭ ହେବ ବୋଲି ଚର୍ଚ୍ଚା ହେଉଛି। ଅନ୍ୟମାନଙ୍କ ମଧ୍ୟରେ ଏଠାରେ ଜିଲା ବିଜେଡି ସଭାନେତ୍ରୀ ସବିତା ରାଉତ, ବିଧାୟକ ଅଶୋକ ବଳ, ପୂର୍ବତନ ପୌରାଧ୍ୟକ୍ଷ ରସାନନ୍ଦ ମହାନ୍ତି, ଲିପା ସାହୁ ପ୍ରମୁଖ ଆଶାୟୀ ଅଛନ୍ତି।
ବରୀ ନିର୍ବାଚନମଣ୍ଡଳୀରେ ଗତ ନିର୍ବାଚନରେ ଭାଜପାରୁ ଆସି ସୁନନ୍ଦା ଦାସ ବିଜେଡି ଟିକେଟରେ ବିଧାୟିକା ହୋଇଥିଲେ। ଲୋକ ସମ୍ପର୍କ ଏବଂ ବିଭିନ୍ନ ଉନ୍ନୟନ ଯୋଜନା କାର୍ଯ୍ୟକାରିତା ପାଇଁ ସେ ଟିକେଟ ପାଇବା ଦୌଡ଼ରେ ବହୁ ଆଗରେ ଥିବା ତାଙ୍କ ସମର୍ଥକମାନେ କହୁଛନ୍ତି। ସେହିପରି ଏଠାରେ ଗତ ନିର୍ବାଚନରେ ଭାଜପା ଟିକେଟରେ ଲଢ଼ି ପ୍ରାୟ ୪ ହଜାର ଭୋଟ ବ୍ୟବଧାନରେ ହାରିଥିବା ବିଶ୍ୱରଞ୍ଜନ ମଲ୍ଲିକ ବିଜେଡିରେ ଯୋଗଦେଇ ଟିକେଟ ପାଇବାକୁ ଅପେକ୍ଷା କରି ରହିଛନ୍ତି। ତାଙ୍କ ନାମ ଚର୍ଚ୍ଚାର ସର୍ବାଗ୍ରେ ରହିଛି। ଏହାବାଦ ଆଇନ ଛାତ୍ର ତଥା ସାମାଜିକ କର୍ମୀ ସଞ୍ଜୀବ କୁମାର ଜେନା ମଧ୍ୟ ନୂଆ ଚେହେରା ଭାବେ ବିଜେଡି ଟିକେଟ ଲବିରେ ରହିଛନ୍ତି। ସଞ୍ଜୀବ ଜଣେ ଯୁବ ନେତା ଭାବେ ବିରୋଧୀଙ୍କୁ ନିଜ ରୋକଠୋକ ମନ୍ତବ୍ୟରେ ନୟାନ୍ତ କରୁଥିବା ଚର୍ଚ୍ଚା ରହିଛି। ଦଳ ତାଙ୍କୁ ଅଣଦେଖା କରି ନ ପାରେ ବୋଲି ମତପ୍ରକାଶ ପାଇଛି। ଅନ୍ୟପକ୍ଷେ ବରୀରେ ଦଳଡିଆଁ ଆଶଙ୍କା କରି ବିଜେଡି ପ୍ରାର୍ଥୀ ଘୋଷଣା ବିଳମ୍ବ କରୁଥିବା ଚର୍ଚ୍ଚା ହେଉଛି।
ବଡ଼ଚଣା ଆସନ ପାଇଁ ବିଜେଡି କାହାକୁ ଟିକେଟ ଦେବ ସେ ନେଇ ଘଡ଼ିକେ ଘୋଡ଼ା ଛୁଟୁଛି। ବିଜେଡିର ବରିଷ୍ଠ ନେତା ବିଧାୟକ ଅମର ପ୍ରସାଦ ଶତପଥୀ ଲଗାତର ଭାବେ ବିଜୟୀ ହୋଇଆସୁଛନ୍ତି। କିନ୍ତୁ ଗତ ନିର୍ବାଚନରେ ତାଙ୍କ ପ୍ରଦର୍ଶନ ଦଳକୁ ଅତି ନିରାଶ କରିଥିଲା। ଶତପଥୀ ୬୪,୦୮୪ ଭୋଟ ପାଇଥିବାବେଳେ ଭାଜପାର ଅମର କୁମାର ନାୟକ ୬୨୫୯୯ ଭୋଟ ପାଇଥିଲେ। ଅମର ମାତ୍ର ୧୪୮୫ ଭୋଟ ବ୍ୟବଧାନରେ ହାରିଥିଲେ। ଏହାକୁ ନେଇ ବିଧାୟକ ଶତପଥୀଙ୍କ ଦକ୍ଷତା ଉପରେ ପ୍ରଶ୍ନ ଉଠିଥିଲା। ବୟସ ଦୃଷ୍ଟିରୁ ସେ ଚଳିତ ନିର୍ବାଚନ ଦୌଡ଼ରୁ ଓହରିଯିବା ପାଇଁ ଦଳ କୁଆଡ଼େ ତାଙ୍କୁ ପରାମର୍ଶ ଦେଉଥିବା ଚର୍ଚ୍ଚା ହେଉଛି। ତେଣୁ ତାଙ୍କ ବଦଳରେ ପୁଅ ଅଦ୍ୱିତୀୟ ଶତପଥୀ, ଜିଲା ଉପସଭାପତି ଗଣେଶ୍ୱର ବରାଳ, ସାଧାରଣ ସମ୍ପାଦକ ଜନ୍ମେଜୟ ଲେଙ୍କା, ଇତିଶ୍ରୀ ସାମଲ, ମନୋରମା ଆଚାର୍ଯ୍ୟ ପ୍ରମୁଖ ଟିକେଟ ଦୌଡ଼ରେ ରହିଛନ୍ତି। ତେବେ ଭାଜପା ଏଠାରେ ଅମରଙ୍କୁ ପୁନର୍ବାର ପ୍ରାର୍ଥୀ କରିଥିବାରୁ ବିଜେଡି ବିଜୟୀ ନିଶ୍ଚିତ ଥିବା ପ୍ରାର୍ଥୀ ଖୋଜାରେ ରହିଥିବା ଚର୍ଚ୍ଚା ହେଉଛି।
