କଟକ ଅଫିସ,୩୧।୭: କରୋନା ଯୋଗୁ ପ୍ରଭାବିତ ହୋଇଥିବା ଆଇନ୍ଜୀବୀଙ୍କୁ ୫ହଜାର ଟଙ୍କା ଲେଖାଏ ସହାୟତା ଦିଆଯିବ। ଏ ନେଇ ବୁଧବାର ଜରୁରିକାଳୀନ ଆର୍ଥତ୍କ ସହାୟତା କମିଟି ପ୍ରସ୍ତାବ ରଖିଥିଲା। ଗୁରୁବାର ଏହାକୁ ଆଡ୍ଭୋକେଟ୍ସ ୱେଲ୍ଫେୟାର୍ ଟ୍ରଷ୍ଟ ବୈଠକରେ ମୋହର ଲାଗିଛି। ଏହାକୁ ଚୂଡ଼ାନ୍ତ ଅନୁମୋଦନ ପାଇଁ ରାଜ୍ୟ ସରକାରଙ୍କ ପାଖକୁ ପଠାଯିବ।
ଆଡଭୋକେଟ୍ ଜେନେରାଲ ଅଶୋକ ପରିଜାଙ୍କ ଅଧ୍ୟକ୍ଷତାରେ ଗୁରୁବାର ଭିଡିଓ କନ୍ଫରେନ୍ସ ଜରିଆରେ ବୈଠକ ହୋଇଥିଲା। ଏଥିରେ ଆଇନ ବିଭାଗ ସଚିବ ଶଶିକାନ୍ତ ମିଶ୍ର, ବରିଷ୍ଠ ଆଇନଜୀବୀ ମିଲନ କାନୁନ୍ଗୋ, ଆଇନଜୀବୀ ଅଜୟ କୁମାର ବରାଳ ଏବଂ ପ୍ରଫୁଲ୍ଲ କୁମାର ରଥ ପ୍ରମୁଖ ଭାଗ ନେଇଥିଲେ। ଜରୁରିକାଳୀନ ଆର୍ଥିକ ସହାୟତା କମିଟି ବୈଠକର ପ୍ରସ୍ତାବଗୁଡ଼ିକ ସମ୍ପର୍କରେ ଆଲୋଚନା କରାଯାଇଥିଲା। ମୋଟ ୧୪ହଜାର ୬ଶହ ଆବେଦନ ମଧ୍ୟରୁ ଯାଞ୍ଚ ପରେ ୧୨ହଜାର ୧୮୫ଟି ବୈଧ ରହିଛି। ଏମାନଙ୍କୁ ସହାୟତା ପାଇଁ ୬କୋଟି ୯ଲକ୍ଷ ୨୫ ହଜାର ଟଙ୍କା ଆବଶ୍ୟକ। କିନ୍ତୁ ଓଡ଼ିଶା ରାଜ୍ୟ ଆଇନ୍ଜୀବୀ ପରିଷଦର ଆଡ୍ଭୋକେଟ୍ସ ୱେଲ୍ଫେୟାର୍ କର୍ପସ୍ ଫଣ୍ଡକୁ ୩୦ ଲକ୍ଷ ୭୮ ହଜାର ଟଙ୍କା ମିଳିଛି। ଆହୁରି ୫ କୋଟି ୭୯ ଲକ୍ଷ ୨୫ ହଜାର ଟଙ୍କାର ଆବଶ୍ୟକତା ରହିଛି। ଏଣୁ ଟ୍ରଷ୍ଟରେ ଥିବା ଅର୍ଥକୁ କର୍ପସ ଫଣ୍ଡକୁ ସ୍ଥାନାନ୍ତର କରାଯିବ। ଏଥିପାଇଁ ରାଜ୍ୟ ସରକାରଙ୍କୁ ଅନୁରୋଧ କରିବା ପାଇଁ ବୈଠକରେ ନିଷ୍ପତ୍ତି ହୋଇଛି। ପରବର୍ତ୍ତୀ ସମୟରେ ସରକାରଙ୍କ ରାଜସ୍ବ ବଢ଼ିଲେ ଏହି ଟଙ୍କା ଭରଣା ପାଇଁ ଅନୁରୋଧ କରାଯିବ। ଆବେଦନଗୁଡ଼ିକର ସାନି ଯାଞ୍ଚ ପାଇଁ ମଧ୍ୟ ବୈଠକରେ ସ୍ଥିର ହୋଇଛି।
ସୂଚନାଯୋଗ୍ୟ, କରୋନା ସଂକ୍ରମଣ ଯୋଗୁ ଗତ ମାର୍ଚ୍ଚ ୨୨ ତାରିଖଠାରୁ କୋର୍ଟ କାର୍ଯ୍ୟ ପ୍ରଭାବିତ ହୋଇଛି। ଫଳରେ ଆଇନ୍ଜୀବୀମାନେ ରୋଜଗାର ହରାଇଛନ୍ତି। ସେମାନଙ୍କୁ ଆର୍ଥତ୍କ ସହାୟତା ପ୍ରଦାନ ପାଇଁ ରାଜ୍ୟ ଆଇନ୍ଜୀବୀ ପରିଷଦ ପକ୍ଷରୁ ପଦକ୍ଷେପ ନିଆଯାଇଥିଲା। ଆର୍ଥତ୍କ ସହାୟତା ପାଇବା ପାଇଁ ଆବେଦନ କରିବାକୁ କୁହାଯାଇଥିଲା। କିନ୍ତୁ ସହାୟତା ପ୍ରଦାନରେ ବିଳମ୍ବ ହୋଇଥିଲା। ଏଥିଯୋଗୁ ଆଇନ୍ଜୀବୀମାନେ ଅସନ୍ତୋଷ ପ୍ରକାଶ କରିଥିଲେ।
