ନୂଆଦିଲ୍ଲୀ,୨୦।୩: କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁଙ୍କ ନିଜ ମନ୍ତବ୍ୟ ପାଇଁ ଅଡୁଆ ପରିସ୍ଥିତିର ସମ୍ମୁଖୀନ ହୋଇଛନ୍ତି। ନିକଟରେ ରିଜିଜୁ ଏକ କାର୍ଯ୍ୟକ୍ରମରେ କହିଥିଲେ ଯେ କିଛି ଅବସରପ୍ରାପ୍ତ ବିଚାରପତି, କାର୍ଯ୍ୟକର୍ତ୍ତାମାନେ ଭାରତ ବିରୋଧୀ ଗ୍ୟାଙ୍ଗର ଅଂଶ ଏବଂ ସେମାନେ ଭାରତୀୟ ନ୍ୟାୟପାଳିକାର ବିରୋଧୀ ଭୂମିକା ଗ୍ରହଣ କରିବାକୁ ଚେଷ୍ଟା କରୁଛନ୍ତି। ଆଇନମନ୍ତ୍ରୀଙ୍କ ଏହି ମନ୍ତବ୍ୟ ପରେ ବିରୋଧୀ ଦଳ ତାଙ୍କୁ ଟାର୍ଗେଟ କରିଛନ୍ତି।
ବିରୋଧୀ ଦଳ ଏହା ଉପରେ କହିଛନ୍ତି, ରିଜିଜୁ ଏଭଳି ଦାବି ପାଇଁ ପ୍ରମାଣ ଦେବା ଉଚିତ୍। ଶିବସେନା (ୟୁବିଟି) ନେତା ସଞ୍ଜୟ ରାଉତ ରିଜିଜୁଙ୍କ ଉପରେ ଆକ୍ରମଣ କରି କହିଛନ୍ତି, ଏହା ନ୍ୟାୟପାଳିକା ଉପରେ ଚାପ ପ୍ରୟୋଗ କରିବାର ପ୍ରୟାସ।
ଏଥି ସହିତ ତୃଣମୂଳ କଂଗ୍ରେସ (ଟିଏମସି) ରାଜ୍ୟ ସଭା ଏମ୍ପି ଜବାହର ସରକାର ଟୁଇଟର୍ରେ କହିଛନ୍ତି, ଜଣେ ମନ୍ତ୍ରୀ ଏପରି ବିବୃତ୍ତି ଦେଇ ପାରିବେ ନାହିଁ। ଆପଣ ପ୍ରମାଣ ଦିଅନ୍ତୁ, ଧମକ ଦିଅନ୍ତୁ ନାହିଁ। ଆରଏସଏସ ସ୍ବାଧୀନତା ସଂଗ୍ରାମରେ ଭାଗ ନେଇ ନ ଥିଲା ଏବଂ ହିନ୍ଦୁ ମହାସଭା ବ୍ରିଟିଶମାନଙ୍କୁ ସମର୍ଥନ କରିଥିଲା। ଆମକୁ ଭାରତ ବିରୋଧୀ ଜ୍ଞାନ ଦିଅ ନାହିଁ।
କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି,ଆଇନ ମନ୍ତ୍ରୀ ଡାକୁ ଭଳି କଥାବାର୍ତ୍ତା କରୁଛନ୍ତି। ନ୍ୟାୟ ମନ୍ତ୍ରୀ ଅନ୍ୟାୟ ପ୍ରଚାର କରୁଛନ୍ତି। ଯଦି ଏହି ଭାଷଣ ନ୍ୟାୟପାଳିକାର ସ୍ବାଧୀନତା ପ୍ରତି ବିପଦ ନୁହେଁ, ତେବେ କଣ ବୋଲି ସେ ପ୍ରଶ୍ନ କରିଛନ୍ତି।
