ନୂଆଦିଲ୍ଲୀ,୧୫।୧୨: କୋର୍ଟରେ ପଡ଼ିରହିଥିବା ବିଚାରାଧୀନ ମାମଲା ଉପରେ ଗୁରୁବାର ସଂସଦରେ ଆଇନ ମନ୍ତ୍ରୀ କିରଣ ରିଜିଜୁ ଗୁରୁତ୍ୱରୋପ କରିଛନ୍ତି। ଏକ ପ୍ରଶ୍ନର ଉତ୍ତର ଦେଇ କେନ୍ଦ୍ର ଆଇନମନ୍ତ୍ରୀ କହିଛନ୍ତି, ବିଚାରପତି ନିଯୁକ୍ତିରେ ସରକାରଙ୍କ ଏକ ସୀମିତ ଭୂମିକା ରହିଛି। ଦେଶରେ ଆଜିବି ୫ କୋଟିରୁ ଅଧିକ ମାମଲା ବିଚାରାଧୀନ ହୋଇରହିଛି। ଏହା ସବୁଠାରୁ ବଡ଼ ଚିନ୍ତାଜନକ। ଆଉ ଏହା ପଛର ମୁଖ୍ୟ କାରଣ ହେଉଛି ବିଚାରପତିଙ୍କ ନିଯୁକ୍ତି ପ୍ରକ୍ରିୟା। ମାମଲାଗୁଡ଼ିକର ହ୍ରାସ କରିବାକୁ ସରକାର ଅନେକ ପଦକ୍ଷେପ ନେଇଥିଲେ ମଧ୍ୟ ବିଚାରପତିଙ୍କ ପଦବୀ ପୂରଣ କରିବାରେ ସରକାରଙ୍କ ସୀମିତ ଭୂମିକା ରହୁଥିବାରୁ ଏଥିରେ ବିଳମ୍ବ ଘଟୁଛି। କଲେଜିୟମ ବିଚାରପତିଙ୍କ ନାମ ଚୟନ କରିଥାଏ। ଏହି ପ୍ରକ୍ରିୟାରେ ସରକାରଙ୍କ କୌଣସି ଅଧିକାର ନାହିଁ ବୋଲି ରିଜିଜୁ କହିଛନ୍ତି।
ସୂଚନାଯୋଗ୍ୟ, ବିଚାରପତି ନିଯୁକ୍ତ କରିବା ସରକାରଙ୍କ ଅଧିକାର ବୋଲି ସମ୍ବିଧାନରେ ଉଲ୍ଲେଖ ରହିଥିଲା। ୧୯୯୩ରେ ଏହା ପରିବର୍ତ୍ତନ ହୋଇଛି। ୨୦୧୪ରେ ଅଣାଯାଇଥିବା ନ୍ୟାଶନାଲ ଜୁଡିସିଆଲ ନିଯୁକ୍ତି ଆୟୋଗ (ଏନ୍ଜେଏସି) ଅଧିନିୟମରେ ଏହା ଉଲ୍ଲେଖ ହୋଇଥିଲା। ହେଲେ ୨୦୧୫ରେ ସୁପ୍ରିମକୋର୍ଟ ଏହାକୁ ଖଣ୍ଡନ କରିଥିଲେ। ଯେ ପର୍ଯ୍ୟନ୍ତ ବିଚାରପତିଙ୍କ ନିଯୁକ୍ତି ପ୍ରକ୍ରିୟା ପରିବର୍ତ୍ତନ ନ ହୁଏ, ସେପର୍ଯ୍ୟନ୍ତ ଖାଲିପଡ଼ିଥିବା ଉଚ୍ଚ ନ୍ୟାୟିକ ପଦବୀ ପ୍ରସଙ୍ଗ ଉଠିବ ବୋଲି କିରଣ ରିଜିଜୁ ମତବ୍ୟକ୍ତ କରିଛନ୍ତି।
