ଦିଗପହଣ୍ଡି,୮।୪(ଅଶେଷ ନାଥ ମିଶ୍ର): ଦିଗପହଣ୍ଡି ଗସ୍ତରେ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ । ଗଞ୍ଜାମ ଜିଲା ଦିଗପହଣ୍ଡି ଠାରେ ବୁଧବାର ରାଜ୍ୟ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କୁ ଭାଜପା ଦଳୀୟ ନେତୃବୃନ୍ଦଙ୍କ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ମନ୍ତ୍ରୀ ଗଜପତି ଜିଲା ମୋହନା ବ୍ଲକ କେଶରୀ ନଗର ଓ ମାଣିକପୁର ଗ୍ରାମରେ ଶ୍ରୀ ହନୁମାନଙ୍କ ମନ୍ଦିର ପ୍ରତିଷ୍ଠା କାର୍ଯ୍ୟକ୍ରମରେ ଯୋଗଦେଇ ବ୍ରହ୍ମପୁର ଫେରିବା ରାସ୍ତାରେ ଦିଗପହଣ୍ଡି ପୂର୍ତ୍ତ ବିଭାଗ ଡାକ ବଙ୍ଗଳା ସମ୍ମୁଖରେ ପହଞ୍ଚିଥିଲେ । ସେଠାରେ ଉପସ୍ଥିତ ଭାଜପା ଦଳୀୟ ନେତୃବୃନ୍ଦ ସୂର୍ଯ୍ୟନାରାୟଣ ସାହୁ, ପରେଶ ଚନ୍ଦ୍ର ରଥ, ମନୋଜ କୁମାର ପଣ୍ଡା, ଗଦାଧର ସ୍ବାଇଁ, ଏମ.ନିରଞ୍ଜନ ରେଡ୍ଡୀ, ସରପଞ୍ଚ ରଞ୍ଜନ କୁମାର ସାହୁ, ଫନିନ୍ଦ୍ର ଚନ୍ଦ୍ର ଗୋସ୍ୱାମୀ, ଲିଙ୍ଗରାଜ ଦୋରାଙ୍କ ସମେତ ବହୁ ସଂଖ୍ୟକ ଦଳୀୟ କର୍ମୀ ମନ୍ତ୍ରୀଙ୍କୁ ଡାକ ବଙ୍ଗଳା ପରିସରକୁ ପାଛୋଟି ନେଇଥିଲେ ।
ସେଠାରେ ମନ୍ତ୍ରୀ ଦିଗପହଣ୍ଡି ଅଞ୍ଚଳର ପୂର୍ତ୍ତ ବିଭାଗ ଅଧିନ ବିଭିନ୍ନ ରାସ୍ତାର ଉନ୍ନତିକରଣ ବ୍ଳକ କାର୍ଯ୍ୟାଳୟ ଅଧିନ ବିଭିନ୍ନ ପ୍ରକଳ୍ପର ଅଗ୍ରଗତି ନେଇ ଉପସ୍ଥିତ ବିଭାଗୀୟ ଅଧିକାରୀମାନଙ୍କ ସହ ଆଲୋଚନା କରି ଫେରିଥିବା ଜଣାପଡିଛି । ମନ୍ତ୍ରୀଙ୍କ ସହ ଦିଗପହଣ୍ଡି ବିଧାୟକ ଡ. ସିଦ୍ଧାନ୍ତ ମହାପାତ୍ର ଉପସ୍ଥିତ ରହି ଦିଗପହଣ୍ଡି ଏନଏସି ଏବଂ ବ୍ଳକକୁ ସଂଯୋଗ କରୁଥିବା ବିଭିନ୍ନ ଗ୍ରାମର ରାସ୍ତାଘାଟ ସମସ୍ୟା ନେଇ ଆଲୋଚନା କରିଥିଲେ । ଏଥିସହ ବ୍ରହ୍ମପୁର – ଦିଗପହଣ୍ଡି ୧୭ ନଂ. ରାଜ୍ୟ ରାଜପଥରେ ଯେତିକି ଟ୍ରାଫିକ ରହିଛି ସେଗୁଡିକ ପ୍ରାଥମିକ ପର୍ଯ୍ୟାୟରେ ଏହି ବର୍ଷ ଠାରୁ ୪ ଥାକିଆ ରାସ୍ତା ନିର୍ମାଣ କରାଯିବା ସହ ଦିଗପହଣ୍ଡି – ବ୍ରହ୍ମପୁର ରାସ୍ତା ପ୍ରଶସ୍ତିକରଣ ଉପରେ ବିଧାୟକ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ।
ମନ୍ତ୍ରୀଙ୍କ ଗସ୍ତ ସମୟରେ ଦିଗପହଣ୍ଡି ବିଡ଼ିଓ ଅନାମିକା ପାଣ୍ଡେ, ତହସିଲଦାର ସନ୍ତୋଷ କୁମାର ସାହୁ, ଏନଏସି କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମିଶ୍ର, ପୂର୍ତ୍ତ ବିଭାଗ ଅଧିକ୍ଷଣ ଯନ୍ତ୍ରୀ ଇଂ. ସୋମନାଥ ତ୍ରିପାଠୀ, ନିର୍ବାହୀ ଯନ୍ତ୍ରୀ ଇଂ. ତାପସ କୁମାର ଦାସ, କନିଷ୍ଠ ଯନ୍ତ୍ରୀ ଇଂ. ମନୋଜ ମହାରଣା, ଦିଗପହଣ୍ଡି ଏନ୍ଏସି ନଗରପାଳ ପ୍ରଫୁଲ୍ଲ ପଣ୍ଡା, ଭାଜପା ଜିଲା ସଭାପତି ସରୋଜ ସାବତଙ୍କ ସମେତ ଦିଗପହଣ୍ଡି ବ୍ଳକର ବହୁ ନିର୍ବାଚିତ ପ୍ରତିନିଧି, ଭାଜପା ଦିଗପହଣ୍ଡି ବ୍ଲକ ଅଞ୍ଚଳର ସମସ୍ତ ମଣ୍ଡଳ ସଭାପତିଙ୍କ ସମେତ ଭାଜପାର ବହୁ ସଂଖ୍ୟକ ଦଳୀୟ କର୍ମକର୍ତ୍ତା ଉପସ୍ଥିତ ଥିଲେ।
