ନୂଆଦିଲ୍ଲୀ,୧୫।୫: ଆଜି ମେ’ ୧୫ ତାରିଖରେ ଭାରତରେ ପେଟ୍ରୋଲ ଏବଂ ଡିଜେଲ ଦରରେ ବୃଦ୍ଧି ଘଟିଛି। ପେଟ୍ରୋଲ ଲିଟର ପିଛା ୩.୧୪ ଟଙ୍କା ଏବଂ ଡିଜେଲ ୩.୧୧ ଟଙ୍କା ମହଙ୍ଗା ହୋଇଛି। ଏହି ବୃଦ୍ଧି ପରେ ଦିଲ୍ଲୀରେ ସାଧାରଣ ପେଟ୍ରୋଲ ଦର ୯୪.୭୭ ଟଙ୍କାରୁ ବଢ଼ି ୯୭.୯୧ ଟଙ୍କାରେ ପହଞ୍ଚିଛି। ସେହିପରି ଡିଜେଲ ଦର ୮୭.୬୭ ଟଙ୍କାରୁ ବୃଦ୍ଧି ପାଇ ୯୦.୭୮ ଟଙ୍କା ହୋଇଛି। ଏହି ଖବର ଆପଣଙ୍କୁ ନିଶ୍ଚିତ ଭାବେ ଝଟ୍କା ଦେଇଥାଇପାରେ, କିନ୍ତୁ ପଡ଼ୋଶୀ ଦେଶରେ ହାଲ୍ ଜାଣିଲେ ଆଶ୍ଚର୍ଯ୍ୟ ଲାଗିବ।
ଫେବୃଆରୀ ୨୦୨୬ରେ ଇରାନ ଯୁଦ୍ଧ ଆରମ୍ଭ ହେବା ପରେ ଭାରତରେ ଏହା ହେଉଛି ପ୍ରଥମ ବଡ଼ ଧରଣର ଦର ବୃଦ୍ଧି। କିନ୍ତୁ ଆପଣ ଜାଣନ୍ତି କି ଭାରତର ପଡ଼ୋଶୀ ଦେଶମାନଙ୍କରେ ପେଟ୍ରୋଲ-ଡିଜେଲ ଦର କେତେ ବଢ଼ିଛି? ପାକିସ୍ତାନ, ନେପାଳ ଏବଂ ଶ୍ରୀଲଙ୍କା ଭଳି ଦେଶରେ ସ୍ଥିତି କ’ଣ, ଆସନ୍ତୁ ଜାଣିବା।
ପଡ଼ୋଶୀ ଦେଶମାନଙ୍କ ମଧ୍ୟରେ ପାକିସ୍ତାନର ଅବସ୍ଥା ସବୁଠାରୁ ଶୋଚନୀୟ। ଗତ ୩ ମାସ ମଧ୍ୟରେ ସେଠାରେ ପେଟ୍ରୋଲ ୬୪% ଏବଂ ଡିଜେଲ ୬୧% ମହଙ୍ଗା ହୋଇଛି। ଯେଉଁଠି ପୂର୍ବରୁ ଲୋକଙ୍କୁ ୨୬୬ ଟଙ୍କା ଦେବାକୁ ପଡ଼ୁଥିଲା, ଏବେ ସେଠାରେ ୪୫୮.୮୬ ଟଙ୍କା ଦେବାକୁ ପଡ଼ୁଛି।
ସ୍ଥିତି ଏତେ ଗମ୍ଭୀର ଯେ ସରକାର ବିଜୁଳି ଓ ତେଲ ବଞ୍ଚାଇବା ପାଇଁ ସପ୍ତାହକୁ ୪ ଦିନିଆ କାର୍ଯ୍ୟ ଦିବସ ଏବଂ ସ୍କୁଲ ବନ୍ଦ କରିବା ଭଳି କଠୋର ପଦକ୍ଷେପ ଗ୍ରହଣ କରିଛନ୍ତି।
ନେପାଳ ଏବେ ଦକ୍ଷିଣ ଏସିଆର ସବୁଠାରୁ ମହଙ୍ଗା ପେଟ୍ରୋଲ ବିକୁଥିବା ଦେଶରେ ପରିଣତ ହୋଇଛି। ଏପ୍ରିଲ ୨୦୨୬ରେ ସେଠାରେ ଗୋଟିଏ ମାସରେ ଚାରି ଚାରିଥର ଦର ବଢ଼ାଯାଇଛି।
ଜାନୁଆରୀରେ ପେଟ୍ରୋଲ ଦର NPR ୧୩୭ ଥିବାବେଳେ ଏବେ ତାହା ବଢ଼ି NPR ୨୧୯ (ଭାରତୀୟ ମୁଦ୍ରାରେ ୧୨୩.୫୮ ଟଙ୍କା) ହୋଇଛି। ନେପାଳ ସମ୍ପୂର୍ଣ୍ଣ ଭାବେ ଆମଦାନୀ ଉପରେ ନିର୍ଭର କରୁଥିବାରୁ, ପରିବହନ ଖର୍ଚ୍ଚ ବଢ଼ିବା ସହ ଦୈନନ୍ଦିନ ବ୍ୟବହାର୍ଯ୍ୟ ଜିନିଷର ଦାମ ମଧ୍ୟ ଆକାଶଛୁଆଁ ହୋଇଛି।
ବାଂଲାଦେଶ ଆରମ୍ଭରୁ ଚେଷ୍ଟା କରିଥିଲା ଯେ ଯେପରି ଜନତାଙ୍କ ଉପରେ ଦର ବୃଦ୍ଧିର ବୋଝ ନ ପଡ଼େ, କିନ୍ତୁ ବଢୁଥିବା ସବସିଡି ଖର୍ଚ୍ଚ ସେମାନଙ୍କୁ ମଧ୍ୟ ଆଣ୍ଠୁ ମାଡ଼ିବାକୁ ବାଧ୍ୟ କରିଛି। ଏପ୍ରିଲ ୨୦୨୬ରେ ସେଠାରେ ପେଟ୍ରୋଲ ଏବଂ ଡିଜେଲ ଦରରେ ୧୦% ରୁ ୧୬% ପର୍ଯ୍ୟନ୍ତ ବୃଦ୍ଧି କରାଯାଇଛି।
ଇରାନ ଯୁଦ୍ଧ ପୂର୍ବରୁ କଞ୍ଚା ତେଲ ଯାହା ବ୍ୟାରେଲ ପିଛା ୭୦-୭୫ ଡଲାର ପାଖାପାଖି ଥିଲା, ଯୁଦ୍ଧ ପରେ ତାହା ୧୦୦ ଡଲାର ଅତିକ୍ରମ କରିଛି। ବାଂଲାଦେଶ ନିଜ ଆବଶ୍ୟକତାର ୯୫% ତେଲ ବାହାରୁ ଆମଦାନୀ କରିଥାଏ। ଏବେ ସ୍ଥିତି ଏପରି ହୋଇଛି ଯେ, ସେଠାକାର ଅନେକ ଜିଲ୍ଲାରେ ପେଟ୍ରୋଲ ପମ୍ପଗୁଡ଼ିକ ସମ୍ପୂର୍ଣ୍ଣ ଖାଲି ହୋଇଯାଇଛି, ଯେଉଁଥିପାଇଁ ଲୋକଙ୍କୁ ତେଲ ପାଇଁ ଘଣ୍ଟା ଘଣ୍ଟା ଧରି ଲାଇନରେ ଠିଆ ହେବାକୁ ପଡ଼ୁଛି।