କଟକ,୩୧ା୫(କାର୍ତ୍ତିକ ସାହୁ):ବିଳମ୍ବରେ ଅଫିସ ଆସିବା ମହଙ୍ଗା ପଡ଼ିଲା। କଟକ ଉନ୍ନୟନ କର୍ତ୍ତୃପକ୍ଷ (ସିଡିଏ)ର ଅରୁଣୋଦୟ ନଗରସ୍ଥିତ କାର୍ଯ୍ୟାଳୟର ୧୫ଜଣ କର୍ମଚାରୀଙ୍କ ଗୋଟିଏ ଦିନର ଦରମା ବନ୍ଦ କରାଯାଇଛି। ସିଡିଏ ସଚିବ ଶ୍ୱେତ କୁମାର ଦାଶ ଶୁକ୍ରବାର ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ସୂଚନା ମିଳିଛି।
ପ୍ରକାଶ ଯେ, ବିଭିନ୍ନ ସରକାରୀ କାର୍ଯ୍ୟାଳୟରେ କେତେଜଣ କର୍ମଚାରୀ ଅଭ୍ୟାସଗତ ଭାବେ ବିଳମ୍ବରେ ଆସିବା ଯୋଗୁ ସରକାରୀ କାର୍ଯ୍ୟ ବାଧାପ୍ରାପ୍ତ ହେଉଛି। ଫଳରେ ଜନସାଧାରଣ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଲୋକମାନେ ଅଫିସ୍କୁ ଆସି ଅପେକ୍ଷା କରୁଥିବା ବେଳେ ସମ୍ପୃକ୍ତ ସରକାରୀ କର୍ମଚାରୀଙ୍କ ଦେଖା ମିଳୁନାହିଁ। ଏଭଳି ଅଭିଯୋଗମାନ ବିଭିନ୍ନ ସମୟରେ ହୋଇଆସୁଛି। ତେବେ ଏଭଳି କର୍ମଚାରୀଙ୍କୁ ଶୃଙ୍ଖଳିତ କରିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି। ତଦନୁସାରେ, ସିଡିଏ ସଚିବ ଦାଶ ତାଙ୍କ କାର୍ଯ୍ୟାଳୟର ବିଭିନ୍ନ ସେକ୍ସନକୁ ଶୁକ୍ରବାର ଅଚାନକ ପରିଦର୍ଶନ କରିଥିଲେ। ସିଡିଏ କାର୍ଯ୍ୟାଳୟରେ ୯ଟି ସେକ୍ସନ ଥିବା ବେଳେ ପ୍ରାୟ ୫ଟି ସେକ୍ସନରେ ୧୫ କର୍ମଚାରୀ ଠିକ୍ ସମୟରେ କାର୍ଯ୍ୟାଳୟରେ ପହଞ୍ଚତ୍ ନ ଥିବା ଦେଖିଥିଲେ। ସେମାନେ ଅଫିସ୍ ବିଳମ୍ବରେ ପହଞ୍ଚତ୍ଥିଲେ। ଫଳରେ ସେମାନଙ୍କୁ ଚେତେଇ ଦେବା ପାଇଁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ସ୍ବରୂପ ଦିନକର ଦରମା ବନ୍ଦ କରାଯାଇଥିବା ସଚିବ ଦାଶ କହିଛନ୍ତି। ଏହାଦ୍ୱାରା ଅନ୍ୟ କର୍ମଚାରୀମାନେ ବି ସଚେତନ ହେବେ ଓ ସରକାରୀ ନିୟମ, ଶୃଙ୍ଖଳା ଭଙ୍ଗ କରିବାକୁ ଚେଷ୍ଟା କରିବେ ନାହିଁ ବୋଲି ସେ କହିଛନ୍ତି।
