ଅଯୋଧ୍ୟା,୩ ।୯: ଭଗବାନ ରାମଙ୍କ ନଗରୀ ଅଯୋଧ୍ୟା କିଛି ବର୍ଷ ହେବ ଉତ୍ତର ପ୍ରଦେଶ ଓ ଦେଶର ରାଜନୀତିରେ ଚର୍ଚ୍ଚାର କେନ୍ଦ୍ର ହୋଇ ରହିଛି । ଏଠାରେ ବହୁ ବିକାଶ ମୂଳକ କାର୍ଯ୍ୟ ବି ଅନ୍ୟ ରାଜ୍ୟ ପାଇଁ ଉଦାହରଣ ସୃଷ୍ଟି କରିଛି । ଏବେ ଅଯୋଧ୍ୟାରେ ସ୍ୱର କୋକିଳା ଲତା ମଙ୍ଗେସକରଙ୍କ ସ୍ମୃତିରେ ଏକ ଚୌକ ବା ଛକ ନିର୍ମାଣ କରାଯାଇଛି । ଏହାର ନିର୍ମାଣ କାର୍ଯ୍ୟ ୧୫ ସେପ୍ଟେମ୍ବର ସୁଦ୍ଧା ଶେଷ କରିବାକୁ ପ୍ରଶାସନ ଲକ୍ଷ୍ୟ ରଖିଛି ।
ସୂଚନାଯୋଗ୍ୟ, ଲତା ମଙ୍ଗେସକରଙ୍କ ପରଲୋକ ପରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନିଜେ ଲତାଙ୍କ ନାମରେ ଚୌକ ନିର୍ମାଣ କରିବାକୁ ଘୋଷଣା କରିଥିଲେ । ଅଯୋଧ୍ୟା ବିକାଶ ପ୍ରାଧିକରଣ ପକ୍ଷରୁ ମିଳିଥିବା ସୂଚନା ଅନୁଯାୟୀ, ନୟା ଘାଟ ଅଞ୍ଚଳରେ ସୁର ସାମ୍ରାଜ୍ଞି ଲତା ମଙ୍ଗେସକର ଚୌକ ନିର୍ମାଣ କରାଯାଉଛି ଯେଉଁଠାରେ ଏକ ବୀଣା ଲାଗିବ । ଏହି ବୀଣାର ଡିଜାଇନ ବିଶ୍ୱ ପ୍ରସିଦ୍ଧ ମୂର୍ତ୍ତିକାର ଓ ପଦ୍ମ ପୁରସ୍କାର ବିଜେତା ରାମବି ସୁତାର ପ୍ରସ୍ତୁତ କରୁଛନ୍ତି । ଏହି ବୀଣାର ଲମ୍ବ ୧୦.୮ ମିଟର ଓ ଉଚ୍ଚତା ୧୨ ମିଟର ହେବ ବୋଲି କୁହାଯାଉଛି । ସ୍ମୃତି ସ୍ଥଳର ନିର୍ମାଣ ଭବିଷ୍ୟତରେ ରାସ୍ତାର ପ୍ରସସ୍ତିକରଣକୁ ନଜରରେ ରଖି କରାଯାଇଛି । ଏହି ଚୌକ ନିର୍ମାଣରେ ପ୍ରାୟ ୭କୋଟି ୯୦ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ଅନୁମାନ କରାଯାଇଛି । ଅଗଷ୍ଟ ୧୦ରୁ ଆରମ୍ଭ କରାଯାଇଥିବା ଏହି କାର୍ଯ୍ୟ ୧୫ ସେପ୍ଟେମ୍ବର ସୁଦ୍ଧା ଶେଷ କରିବାକୁ ଲକ୍ଷ୍ୟ ରଖାଯାଇଛି ।
