କର୍ଲାମୁଣ୍ଡା,୨୧ା୫(ପ୍ରଦୀପ କୁମାର ସାହୁ): ରାଜ୍ୟ ସରକାର ପ୍ରତ୍ୟେକ ବ୍ଲକ୍ରେ ଷ୍ଟାଡିୟମ ନିର୍ମାଣ ପାଇଁ ଅର୍ଥ ମଞ୍ଜୁର କରିଥିବା ବେଳେ କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ୍ରେ ଜାଗା ଚିହ୍ନଟରେ ବିଳମ୍ୱ ଘଟିଥିଲା। ତେବେ ବ୍ଲକ୍ ଉପାଧ୍ୟକ୍ଷ ସୁରେନ୍ଦ୍ର ଭୋଇ ଓ ଅନ୍ୟମାନେ ଏ ନେଇ ଜିଲାପାଳଙ୍କୁ ଲିଖିତ ଅଭିଯୋଗ କରିଥିଲେ। ଜିଲାପାଳଙ୍କ ନିର୍ଦ୍ଦେଶ ପରେ ଭବାନୀପାଟଣା ଉପଜିଲାପାଳ ପତ୍ର ସଂଖ୍ୟା ୩୩୭୫ ଅନୁସାରେ କର୍ଲାମୁଣ୍ଡା ତହସିଲଦାର ଓ ଜିଲା କ୍ରୀଡ଼ା ଅଧିକାରୀଙ୍କୁ ବ୍ଲକ୍ ସଦର ଡୁକେରମାଲ ମୌଜାରେ ଜାଗା ଚିହ୍ନଟ ପାଇଁ ନିର୍ଦ୍ଦେଶ ଦେଇଥିଲେ।
ଏହି ଅବସରରେ ଗୁରୁବାର ଜିଲା କ୍ରୀଡ଼ା ଅଧିକାରୀ ରମେଶ ଚନ୍ଦ୍ର ପାଢ଼ୀ, ତହସିଲଦାର ଅରୁଣ କୁମାର ବର୍ଗେ, ବ୍ଲକ ଉପାଧ୍ୟକ୍ଷ ସୁରେନ୍ଦ୍ର ଭୋଇ, ଆଦିବାସୀ ଯୁବନେତା ନନ୍ଦୀକିଶୋର ଭୋଇ, ଭାଜପା ମଣ୍ଡଳ ସଭାପତି ଡୁଲାମଣି ଭୋଇ, ବିଜେଡି କର୍ମୀ ପ୍ରେମାନନ୍ଦ ସାହୁ, ଗ୍ରାମ୍ୟ ଉନ୍ନୟନ ବିଭାଗ ଯନ୍ତ୍ରୀ ସୋସାନ କୁଣ୍ଡୁଲୁ ପ୍ରମୁଖ କର୍ଲାମୁଣ୍ଡା ବସ୍ତି ନିକଟ ପାଣି ପଞ୍ଚାୟତ କାର୍ଯ୍ୟାଳୟ ପାଖରେ ଥିବା ବାଗମରା ଭାଗରେ ୧୧ଏକର ୭୫ ଡେସିମିଲ ଜାଗା ଚିହ୍ନଟ କରିଛନ୍ତି। ତହସିଲଦାର ବର୍ଗେଙ୍କୁ ପଚାରିବାରୁ ଭବାନୀପାଟଣା ଉପଜିଲାପାଳଙ୍କ ନିର୍ଦ୍ଦେଶକ୍ରମେ ଜିଲା କ୍ରୀଡ଼ା ଅଧିକାରୀଙ୍କ ଉପସ୍ଥିତିରେ ଷ୍ଟାଡିୟମ ନିର୍ମାଣ ପାଇଁ ଜାଗା ଚିହ୍ନଟ ହୋଇଛି ବୋଲି କହିଛନ୍ତି।