ପାଟନା,୬।୬: ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଆର୍ଜେଡି ମୁଖ୍ୟ ଲାଲୁ ପ୍ରସାଦ ଯାଦବ ଭାଜପା ସରକାରଙ୍କୁ ଟାର୍ଗେଟ କରିଛନ୍ତି। ଦେଶ ଏବେ ଗୃହଯୁଦ୍ଧ ଅଭିମୁଖେ ଯାଉଥିବା ସେ ଅଭିଯୋଗ କରିଛନ୍ତି। ସମ୍ପୂର୍ଣ୍ଣ କ୍ରାନ୍ତି ଦିବସ ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ଲାଲୁ ଯାଦବ ଭିଡିଓ କନଫରେନ୍ସିଂ ଜରିଆରେ ଯୋଗଦେଇ କହିଛନ୍ତି, ମୁଁ ଦେଶର ଲୋକମାନଙ୍କୁ ଦରଦାମ ବୃଦ୍ଧି, ବେକାରି ଓ ଦୁର୍ନୀତି ବିରୋଧରେ ଏକାଠି ହେବାକୁ ଆହ୍ବାନ ଦେଉଛି। ଆମକୁ ଏକାଠି ହୋଇ ଲଢ଼ିବାକୁ ପଡିବ। ଭାଜପା ଯେଉଁଭଳି କାମ ସବୁ କରୁଛି, ତାହା ଦେଶକୁ ଗୃହଯୁଦ୍ଧ ଅଭିମୁଖେ ନେଉଛି। ଏ ସରକାର ଦେଶର ଏକତା ନଷ୍ଟ କରିବାରେ ଲାଗିପଡିଛନ୍ତି।
ଲାଲୁ ଯାଦବଙ୍କ ଏହି ବିବୃତିି ପରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ଭାଜପା ଏମ୍ପି ରବିଶଙ୍କର ପ୍ରସାଦ ଦୁର୍ନୀତି ପ୍ରସଙ୍ଗରେ ଲାଲୁଙ୍କ ପରିବାରକୁ ଘେରି ରହିଥିଲେ। ସେ କହିଛନ୍ତି, ଜୟପ୍ରକାଶ ନାରାୟଣ ସେହି ସମୟରେ ସ୍ଲୋଗାନ ଦେଇଥିଲେ ‘ଦୁର୍ନୀତି ହଟାଅ, ଏକ ନୂତନ ବିହାର ନିର୍ମାଣକର’। ଆଜି ଯେଉଁମାନେ ସମୁଦାୟ ବିପ୍ଳବ ବିଷୟରେ କହୁଛନ୍ତି, ସେମାନେ ଜେପି ସ୍ଲୋଗାନ ବିଷୟରେ କ’ଣ କହିବେ?
ସୂଚନାଯୋଗ୍ୟ, ଗୋଖାଦ୍ୟ ଦୁର୍ନୀତି ମାମଲାରେ ଲାଲୁ ଯାଦବ ଜାମିନରେ ଆସିଛନ୍ତି।
