କେସିଙ୍ଗା,୨୨।୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବସହର ୱାର୍ଡ ନ.୩ରେ ଅମ୍ବାଜି ଏଜେନ୍ସି ବ୍ୟବସାୟୀ ପୁନମ ଜୈନଙ୍କ ଘରୁ ଗତକାଲି ରାତିରେ ତାଲା ଭାଙ୍ଗି ଲକ୍ଷ ଲକ୍ଷ ଟଙ୍କା ସହ ସୁନା, ରୂପା ଆଦି ଅଳଙ୍କାର ଚୋରି କରି ନେଇଥିବା ଜଣାପଡିଛି।କେସିଙ୍ଗା ସହରର ୩ ନମ୍ବର ୱାର୍ଡରେ ଘଟିଥିବା ଏକ ବଡ ଧରଣର ଚୋରି ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
ପୁନମ ଚାନ୍ଦ ଜୈନଙ୍କ ଘରୁ ସୁନା ଗହଣା, ନଗଦ ଟଙ୍କା ଚୋରି ହୋଇଥିବା ସୂଚନା ମିଳିଛି। ପ୍ରାଥମିକ ଆକଳନ ଅନୁଯାୟୀ, ଚୋରି ହୋଇଥିବା ସମ୍ପତ୍ତାର ମୂଲ୍ୟ ପ୍ରାୟ ୩୦ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି। ସୂଚନା ଅନୁସାରେ, ପୁନମ ଚାନ୍ଦ ଜୈନ ଓ ତାଙ୍କ ପରିବାର କୌଣସି କାର୍ଯ୍ୟରେ ବାହାରକୁ ଯାଇଥିଲେ। ଏହି ସୁଯୋଗକୁ ନେଇ ଚୋରମାନେ ଘରର ମୁଖ୍ୟ ଗେଟର ତାଲା କାଟି ଭିତରକୁ ପ୍ରବେଶ କରିଥିଲେ। ପରେ ସେମାନେ ଘର ଭିତରୁ ସୁନା ଗହଣା, ନଗଦ ଟଙ୍କା ସହ ବିଭିନ୍ନ ମୂଲ୍ୟବାନ ଜିନିଷପତ୍ର ନେଇ ଫେରାର ହୋଇଯାଇଥିଲେ।
ଜଣେ ପଡ଼ୋଶୀ ଘରର ଗେଟ ଖୋଲାଥିବା ଦେଖି ସନ୍ଦେହ କରିଥିଲେ। ସେ ତୁରନ୍ତ ଘର ମାଲିକ ପୁନମ ଚାନ୍ଦ ଜୈନଙ୍କୁ ଖବର ଦେଇଥିଲେ। ପରେ ଘର ମାଲିକ ଘରକୁ ଫେରି ଚୋରି ଘଟିଥିବା ନିଶ୍ଚିତ କରି କେସିଙ୍ଗା ଆଦର୍ଶ ଥାନାରେ ଅଭିଯୋଗ ଦାଖଲ କରିଥିଲେ । ଅଭିଯୋଗ ପାଇବା ପରେ ଆଦର୍ଶ ଥାନାର ଆଇଆଇସି, ଏସଡିପିଓ ଓ ପୋଲିସର ସନ୍ଧାନୀ କୁକୁର ଟିମ,ସାଇଣ୍ଟିଫିକ ଦଳ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ । ସନ୍ଧାନୀ କୁକୁର ଘର ପରିସରରୁ ଗନ୍ଧ ଧରି ୩ ନମ୍ବର ୱାର୍ଡର ବିଭିନ୍ନ ଗଳିକନ୍ଦି ଦେଇ ଆମ୍ବଜୀ ମନ୍ଦିର ଅଞ୍ଚଳ ପର୍ଯ୍ୟନ୍ତ ଯାଇଥିଲା। ପରେ ସେଠାରୁ ରେଳ ଷ୍ଟେଶନ ଦିଗକୁ ଗତି କରିଥିବା ଜଣାପଡ଼ିଛି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଚୋରମାନେ ଚୋରି କରିବା ପରେ ରେଳ ଷ୍ଟେଶନରେ ପହଞ୍ଚି ଟ୍ରେନ ଯୋଗେ ଫେରାର ହୋଇଥିବା ସନ୍ଦେହ କରାଯାଉଛି। ଘଟଣାକୁ ଗୁରୁତ୍ବର ସହ ନେଇ ପୋଲିସ ଆଖ ପାଖ ଅଞ୍ଚଳର ସିସିଟିଭି ଫୁଟେଜ ଯାଞ୍ଚ କରୁଥିବା ବେଳେ ସନ୍ଦିଗ୍ଧ ବ୍ୟକ୍ତିମାନଙ୍କ ଗତିବିଧୂ ଉପରେ ମଧ୍ୟ ନଜର ରଖୁଛି। ଏହି ବଡ ଧରଣର ଚୋରି ଘଟଣା ପରେ କେସିଙ୍ଗା ସହରବାସୀଙ୍କ ମଧ୍ୟରେ ସୁରକ୍ଷା ନେଇ ଚିନ୍ତା ବଢ଼ିଛି। ପୋଲିସ ଶୀଘ୍ର ଚୋରମାନଙ୍କୁ ଚିହ୍ନଟ କରି ଗିରଫ କରିବ ବୋଲି ଆଶା କରାଯାଉଛି।
ସେହିପରି ଗତକାଲି ଉତକେଲା ଫାଣ୍ଡି ଅଧୀନସ୍ଥ ଠେମରା ଗ୍ରାମର ନିଧି ଗୌଡ଼ଙ୍କ ପରିବାର ନିଜ ଚାଷ ଜମିକୁ ଚାଷ କରିବା ପାଇଁ ଯାଇଥିଲେ।ଦିନ ଦି ପ୍ରହର ରେ ଘରେ କେହି ନ ଥିବାର ସୁଯୋଗ ଦେଖି ତାଲା ଭାଙ୍ଗି ଘରେ ପଶି ଟଙ୍କା ସୁନା ଅଳଙ୍କାର ଚୋରି କରି ନେଇଥିବା ଜଣା ପଡିଛି। ଘର ମାଲିକ ଜାଣିବା ପରେ ଉତକେଲା ଫାଣ୍ଡିରେ ଅଭିଯୋଗ କରିଛି। ପୋଲିସ ତଦନ୍ତ ଜାରି ରଖିଛି।