ବୈଶିଙ୍ଗା,୮|୮(ଡି.ଏନ.ଏ.) ମୟୂରଭଞ୍ଜ ଜିଲା ବେତନଟୀ ବ୍ଲକ ଅନ୍ତର୍ଗତ ବୈଶିଙ୍ଗା ଥାନା ଏକ ବୃହତ ଅଞ୍ଚଳକୁ ନେଇ ଗଠିତ। ଏହି ବ୍ଲକର ୧୭ ପଞ୍ଚାୟତ ଅଧୀନ ୨୦୫ ରାଜସ୍ବ ଗ୍ରାମ ଉକ୍ତ ଥାନା ଉପରେ ନିର୍ଭରଶୀଳ। ପ୍ରାୟ ୧ଲକ୍ଷ ୪୫ ହଜାର ଜନ ସାଧାରଣଙ୍କ ଧନଜୀବନ ସୁରକ୍ଷା ଏହା ଉପରେ ନ୍ୟସ୍ତ। ତେବେ ଆବଶ୍ୟକ ସଂଖ୍ୟକ କର୍ମଚାରୀ ଅଭାବ ଯୋଗୁ ଥାନାରେ କାର୍ଯ୍ୟଭାର ବଢ଼ୁଛି। ୧୦ ଅଧିକାରୀ ପଦବୀ ମଧ୍ୟରୁ ୬ଜଣ ରହିଛନ୍ତି। ଫଳରେ ଲୋକେ ତ୍ୱରିତ ନ୍ୟାୟ ପାଇବାରୁ ବଞ୍ଚିତ ହେଉଛନ୍ତି।
କି.ମି. ବ୍ୟାସାର୍ଦ୍ଧ ପରିମିତ ଏହି ଥାନା ଅଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ କରିବା ଅତ୍ୟନ୍ତ ଦୁରୂହ ବ୍ୟାପାର। ଜିଲାର ସର୍ବାଧିକ ସ୍ପର୍ଶକାତର ଏବଂ ଅପରାଧ ପ୍ରବଣ ଏହି ଥାନାରେ ବର୍ଷକୁ ୩୦୦ରୁ ଅଧିକ ରେକର୍ଡ ସଂଖ୍ୟକ ମାମଲା ପଞ୍ଜିକୃତ ହୋଇଥାଏ। ବର୍ଷ ତମାମ ବିଭିନ୍ନ ସଂଗଠନମାନଙ୍କ ପକ୍ଷରୁ ଆନ୍ଦୋଳନ, ରାସ୍ତା ଅବରୋଧ, ବିକ୍ଷୋଭ ପ୍ରଦର୍ଶନ ଓ ଥାନା ଘେରାଉ ଆଦି କାର୍ଯ୍ୟକ୍ରମ ଯୋଗୁ ଥାନାରେ କାର୍ଯ୍ୟଭାର ବଢ଼ୁଛି। ଏହି ଥାନା ଅନ୍ତର୍ଗତ ବଡ଼ସାହି ବ୍ଲକର ମାଣତ୍ରିଠାରେ ଏକ ଫାଣ୍ଡି ପ୍ରତିଷ୍ଠା ହେଲା ପରେ ସନ୍ନିକଟ ୪ଟି ପଞ୍ଚାୟତରେ ଆଇନ ଶୃଙ୍ଖଳା ପରିସ୍ଥିତିରେ କିଛି ସୁଧାର ଆସିଥିବା ଲକ୍ଷ୍ୟ କରାଯାଏ। ତେବେ ଆହୁରି ଦୁଇଟି ଫାଣ୍ଡି ପ୍ରତିଷ୍ଠା ଜରୁରୀ ବୋଲି ସ୍ଥାନୀୟ ବାସିନ୍ଦା ମତ ପ୍ରକାଶ କରିଛନ୍ତି। ଗୋଟିଏ ବୈଶିଙ୍ଗା ଥାନାଠାରୁ ୧୦ କି.ମି. ଦୂର ପୁରୁଣିଆଠାରେ ଏବଂ ଅନ୍ୟଟି ଏହି ଥାନାଠାରୁ ୧୫ କି.ମି. ଦୂର ଅଁଳା ବଜାରଠାରେ। ଫଳରେ ବୈଶିଙ୍ଗା ଥାନା ଉପରେ ଅତ୍ୟଧିକ କାର୍ଯ୍ୟଭାର ହ୍ରାସ ହେବା ସଙ୍ଗସଙ୍ଗେ ଲୋକେ ପୋଲିସ ସେବା ପାଇବାରେ ସହାୟକ ହୋଇ ପାରିବେ। ପୂର୍ବରୁ ଏହି ଥାନା ଇନଚାର୍ଜ ଥିବା ତଥା ପୋଲିସ ଡିଏସ୍ପି ଲକ୍ଷ୍ମୀଧର ସ୍ବାଇଁ ୨୦୨୦ ସେପ୍ଟେମ୍ବରରେ ଅଧିକ ଫାଣ୍ଡି ପ୍ରତିଷ୍ଠା ଓ କର୍ମଚାରୀ ନିଯୁକ୍ତିର ଜରୁରୀ ଆବଶ୍ୟକତା ନେଇ ବିଭାଗୀୟ ଉଚ୍ଚ ଅଧିକାରୀଙ୍କୁ ଚିଠି କରିଥିଲେ ମଧ୍ୟ ଅଦ୍ୟାବଧି ଅନୁମୋଦନ ମିଳି ପାରିନାହିଁ।
ବଡ଼ସାହି ନିର୍ବାଚନ ମଣ୍ଡଳୀର ବିଜେଡି ବିଧାୟକ ପ୍ରାର୍ଥୀ ବୃନ୍ଦାବନ ଦାସ କୁହନ୍ତି, ଅଧିକ ଫାଣ୍ଡି ପ୍ରତିଷ୍ଠା ଏବଂ ଖାଲି ପଡ଼ିଥିବା ୪ ସବ୍ ଇନ୍ସପେକ୍ଟର ପଦବୀ ତୁରନ୍ତ ପୂରଣ କରାଯିବା ନିହାତି ଆବଶ୍ୟକ। ଆଇନଜୀବୀ ତଥା ବୈଶିଙ୍ଗା ଥାନା ଆମ ପୋଲିସ ସମିତିର ସଦସ୍ୟ ମନୋଜ କୁମାର ପଣ୍ଡା କୁହନ୍ତି ଏହି ଥାନା ଉଭୟ ମୟୂରଭଞ୍ଜ ଓ ବାଲେଶ୍ୱର ଜିଲାର ସୀମାନ୍ତରେ ରହିଛି। ଅପରାଧ ନିୟନ୍ତ୍ରଣ ପାଇଁ ଅଧିକ ଫାଣ୍ଡି ଓ କର୍ମଚାରୀ ମୁତୟନ ନିମନ୍ତେ ଆମ ପୋଲିସ ସମିତି ବୈଠକରେ ବହୁବାର ଦୃଷ୍ଟି ଆକର୍ଷଣ କରାଯାଇଛି ଏବଂ ପ୍ରସ୍ତାବ ମଧ୍ୟ ଗୃହୀତ ହୋଇଛି।
