ପଟ୍ଟାମୁଣ୍ଡାଇ,୭ା୧୦ (ଅକ୍ଷୟ ବିଶ୍ୱାଳ): ପଟ୍ଟାମୁଣ୍ଡାଇର ଐତିହାସିକ କଚେରି ପୋଖରୀ ପୁନର୍ନିର୍ମାଣ ଦାବିରେ ସହରବାସୀଙ୍କ ପକ୍ଷରୁ ବାରମ୍ବାର ଦାବି ହୋଇ ଆସୁଛି। ଏ ନେଇ ପଟ୍ଟାମୁଣ୍ଡାଇ ପୌର କର୍ତ୍ତୃପକ୍ଷ, ତହସିଲଦାର, ବିଡିଓ ଓ ଜିଲା ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇନାହିଁ। ସେହିପରି ବ୍ରିଟିଶ ଅମଳରୁ ନିର୍ମିତ କଚେରି ପୋଖରୀ ଖନନ ହେଉ ନ ଥିଲା। ଏ ଦିଗରେ ପଦକ୍ଷେପ ନେବା ପାଇଁ ବାରମ୍ବାର ଦାବି ହୋଇ ଆସୁଥିଲେ ମଧ୍ୟ କେହି କର୍ଣ୍ଣପାତ କରୁ ନ ଥିଲେ। ଫଳରେ କଚେରି ପୋଖରୀ ମରାମତି ଅଭାବରୁ ଏବେ କଚଡ଼ା ପୋଖରୀରେ ପରିଣତ ହୋଇଛି।
ଐତିହାସିକ କଚେରି ପୋଖରୀର କିସମ ପରିବର୍ତ୍ତନ, ସୀମା ନିର୍ଦ୍ଧାରଣ ଓ ଖନନ ପାଇଁ ସାମାଜିକ କର୍ମୀ ଅକ୍ଷୟ ବିଶ୍ୱାଳ କଟକ ଜିଲା ସ୍ଥାୟୀ ଲୋକ ଅଦାଲତରେ କେସ୍ ନଂ. ୧୧/୨୦୧୯ରେ ମାମଲା ରୁଜୁ କରିଥିଲେ। ପଟ୍ଟାମୁଣ୍ଡାଇ ତହସିଲଦାର, ମ୍ୟୁନିସିପାଲିଟି ନିର୍ବାହୀ ଅଧିକାରୀ, ଉପଜିଲାପାଳ ଓ ଜିଲାପାଳଙ୍କ ବିରୋଧରେ ମାମଲା ଋୁଜୁ କରିଥିଲେ। ଏହାର ଜବାବରେ ପକ୍ଷମାନେ ଲୋକ ଅଦାଲତରେ ହାଜର ହୋଇ ପୋଖରୀର ପୁନର୍ନିର୍ମାଣ, ସୀମା ନିର୍ଦ୍ଧାରଣ ଓ କିସମ ପରିବର୍ତ୍ତନ ପାଇଁ ଲିଖିତ ପ୍ରତିଶ୍ରୁତି ଦେଇଥିଲେ। ତେବେ ପୋଖରୀର ମାପଚୁପ କରାଯାଇ ୧.୨୫ ଡିସିମିଲ ଜାଗା ଚିହ୍ନଟ କରାଯାଇ ବଗାୟତରୁ ପୋଖରୀ ଜଳାଶୟ କିସମ ପରିବର୍ତ୍ତନ କରାଯାଇଥିଲା। ଏହାର ଖନନ ପାଇଁ ରାଜ୍ୟ ସରକାର ୧ କୋଟି ୯୨ ଲକ୍ଷ ଟଙ୍କା ପ୍ରଦାନ କରିଥିଲେ। କିନ୍ତୁ ଏହି କାମ ଠିକ୍ ଭାବେ କରା ନ ଯିବାରୁ ଏବେ କଚେରିି ପୋଖରୀ ବିଭିନ୍ନ ଅଳିଆ, ଆର୍ବଜନା ପଡି କଚଡ଼ା ପୋଖରୀରେ ପରିଣତ ହୋଇଛି। ଅଳ୍ପ ପାଣି ଥିବାରୁ ପାଣି ପଚି ପୂତିଗନ୍ଧମୟ ପରିବେଶ ସୃଷ୍ଟି କରୁଛି। ନିକଟ ଅତୀତରେ ପ୍ରତି ସହରରେ ଜଳାଶୟ ରହିବ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି। ମାତ୍ର ପୌର ନିର୍ବାହୀ ଅଧକାରୀ, ପଟ୍ଟାମୁଣ୍ଡାଇ ତହସିଲଦାର, ଜିଲା ପ୍ରଶାସନର ଏଥିପ୍ରତି ଭ୍ରୂକ୍ଷେପ ନାହିଁ, ଫଳରେ ପଟ୍ଟାମୁଣ୍ଡାଇ ସହରବାସୀ ନାନା ସମସ୍ୟା ଭୋଗୁଛନ୍ତି। କଚେରି ପୋଖରୀକୁ ଲାଗି ଶ୍ରୀରାମ ମନ୍ଦିର, ହନୁମାନ ମନ୍ଦିର, ତହସିଲ ଅଫିସ ଓ ହାଟ ଥିଲେ ମଧ୍ୟ ଦୈନନ୍ଦିନ ଆସୁଥିବା ଲୋକ ନାନା ଅସୁବିଧାର ସମ୍ମୁଖୀନ ହୋଉଛନ୍ତି। ଅଳିଆ ପାଣିରେ କେହି ଗୋଡ଼ ବୁଡାଇବା ପାଇଁ ଉଚିତ ମନେକରୁ ନାହାନ୍ତି। କଚେରି ପୋଖରୀ ମଧ୍ୟରେ ଏକ ଗଭୀର କୂଅ ରହିଥିବା ବେଳେ ଏହି କୂଅଟି ପୋତି ହୋଇପଡିଲାଣି। ଫଳରେ ପାଣି ଝରି କଚେରି ପୋଖରୀଟି ପୂର୍ଣ୍ଣ ରହୁଥିବାବେଳେ କୂଅଟି ପୋତି ହୋଇପଡିଛି। ଫଳରେ ପୋଖରୀଟି ଶୁଖିଲା ପଡିଛି। ଏ ଦିଗରେ ତୁରନ୍ତ ପଦକ୍ଷେପ ନେବା ପାଇଁ ପିଏଲ୍ଭି ପ୍ରଫୁଲ୍ଲ କୁମାର ଦାଶ, ଭବାନୀ ପଣ୍ଡା, ପ୍ରମୋଦ ସାହୁ, ଜିତେନ୍ଦ୍ର କୁମାର ନନ୍ଦୀ, ବିଜ୍ଞାନ ମିହିର ଜେନା, ପ୍ରବୀର କୁମାର ପାତ୍ର, ବିଦ୍ୟାଧର ଦାଶ, ସୁଶୀଲ କୁମାର ଦାଶ, ରୀତାଞ୍ଜଳି ଦାଶ, ସୌମ୍ୟରଞ୍ଜନ ଧଳ, ବିଜୟ ମହାନ୍ତିି ଓ ରାଜେନ୍ଦ୍ର କୁମାର ଦାଶ ପ୍ରମୁଖ ଦୃଢ ଦାବି କରିଛନ୍ତି।
