ବାରିପଦା ଅଫିସ, ୭ା୭- ସ୍ବଳ୍ପ ବୃଷ୍ଟିପାତ ଯୋଗୁ ମୟୂରଭଞ୍ଜ ଜିଲାରେ ଧାନ ଚାଷ ବାଧାପ୍ରାପ୍ତ ହୋଇଛି । ଧାନ ତଳି ପ୍ରସ୍ତୁତ ହୋଇସାରିଥିବା ବେଳେ ପାଣି ଅଭାବରୁ ଚାଷ କାର୍ଯ୍ୟ ଆଗେଇ ପାରୁନାହିଁ । ଫଳରେ ଚାଷୀକୂଳ ଆଶଙ୍କାରେ ଦିନ ଗଣୁଛନ୍ତି। ଏପରି ସ୍ଥିତିରେ ଅଣଧାନ ଫସଲ ଚାଷ ଦୃତଗତିରେ ଆଗେଇ ଚାଲିଛି ।
ଚଳିତ ବର୍ଷ ଜୁନ ମାସରେ ଜିଲାରେ ହାରାହାରି ୧୭୭.୩୦ ମିମି ବୃଷ୍ଟିପାତ ହୋଇଛି। ଯାହାକି ପୂର୍ବବର୍ଷରେ ରେକର୍ଡ କରାଯାଇଥିବା ସାଧାରଣ ବୃଷ୍ଟିପାତ ୨୬୫.୮ମିମିଠାରୁ ଶତକଡା ୩୩.୨୯ ପ୍ରତିଶତ କମ୍ ରହିଛି । ଏହି ବୃଷ୍ଟିପାତରେ ଚାଷ କାର୍ଯ୍ୟ ପାଇଁ ଜମିର ପ୍ରସ୍ତୁତି, ଅଣଧାନ ମଧ୍ୟର ଚିନାବାଦାମ, ଖସା, ଅଳସି, ମେସ୍ତା, ମକା, ମୁଗ, ରାଶି, ବିରି, ନାଡୁକା, ହରଡ ଆଦି ବୁଣା କର୍ଯ୍ୟ ଜୋରରେ ଚାଲିଛି ା ଜୁଲାଇ ମାସର ପ୍ରଥମ ସପ୍ତାହର ୫ଦିନ ମଧ୍ୟରେ ଉଦଳା, ବାଙ୍ଗିରିପୋଷି, ବହଳଦା, ବାରିପଦା, ବେତନଟୀ, ବଡ଼ସାହି ଆଦି ବ୍ଲକ ଅଞ୍ଚଳରେ ୫୦ମି.ମି.ରୁ ଅଧିକ ବର୍ଷା ରେକର୍ଡ କରାଯାଇଥିବା ବେଳେ କୁସୁମୀ ବ୍ଲକରେ ୪୭ ମି.ମି., ଶୁକୃଳିରେ ୬୨ମି.ମି. ଓ ରରୁଆଁରେ ୪୭ମି.ମି. ବର୍ଷା ହୋଇଛି ା ଅନ୍ୟ ବ୍ଲକ ମାନଙ୍କରେ ହାରାହାରି ୨୪ରୁ ୨୫ମି.ମି. ଭିତରେ ବର୍ଷା ରେକର୍ଡ କରାଯାଇଛି ା ବୃଷ୍ଟିପାତକୁ ଲକ୍ଷ୍ୟ ରଖି ଚାଷୀମାନେ ରୁଆ ବେଉଷଣ କାର୍ଯ୍ୟ ଆରମ୍ଭ କରିବାର ଆଶା ରଖିଥିବାବେଳେ ୭/୮ଦିନ ମଧ୍ୟରେ ପ୍ରବଳ ବର୍ଷା ନ ହେଲେ ଚାଷ କାର୍ଯ୍ୟ ବାଧାପ୍ରାପ୍ତ ହୋଇପାରେ ବୋଲି ଚାଷୀ ଭାଗବତ ପଣ୍ଡା, ହରେକୃଷ୍ଣ ବେହେରା ପ୍ରକାଶ କରିଛନ୍ତି ା
ସୂଚନା ଅନୁଯାୟୀ,୪ଲକ୍ଷ ୩୭ହଜାର ହେକ୍ଟର ଜମିରେ ଖରିଫ ଫସଲ ହେବାକୁ ଥିବା ବେଳେ ଅଦ୍ୟାବଧି ୫୨ହଜାର୮୭୨ ହେକ୍ଟର ଚାଷ ଜମିରେ ଧାନ ଓ ଅଣଧାନ ଫସଲ ଚାଷ ହୋଇଛି ା ସେଥିମଧ୍ୟରୁ ୧ଲକ୍ଷ ୫୪ହଜାର ୯୬୧ହେକ୍ଟର ଜଳସେଚିତ ଜମିରେ ମୋଟ ୮ହଜାର୫୨୨ହେକ୍ଟର ଜମିରେ ଧାନ ଓ ଅଣଧାନ ଫସଲ ହୋଇଥିବା ଜିଲା ମୁଖ୍ୟ କୃଷି ଅଧିକାରୀ ସଞ୍ଜୟ କୁମାର ମହାନ୍ତି ପ୍ରକାଶ କରିଛନ୍ତି। ଅଦ୍ୟାବଧି ଜିଲାରେ ୨ଲକ୍ଷ ୮୩ହଜାର ହେକ୍ଟରରୁ ୨୪ହଜାର ୭୧୮ ହେକ୍ଟର ଜମିରେ ଧାନ, ୪ହଜାର ହେକ୍ଟରରୁ ୧୧୧୨ ହେକ୍ଟରରେ ମକା, ୬୩୦ ହେକ୍ଟରରୁ ୮୩ ହେକ୍ଟରରେ ରାଶି, ୫୪୯୪୦ହେକ୍ଟରରୁ ୫୭୮୭ ହେକ୍ଟରରେ ଡାଲି ଜାତୀୟ ଫସଲ, ୭୦୪୫ ହେକ୍ଟରରୁ ୯୪୬ ହେକ୍ଟରରେ ତୈଳବୀଜ, ୭୦ହଜାର ୯୮୫ହେକ୍ଟରରୁ ୧୨ହଜାର ୪୦୮ହେକ୍ଟରରେ ପନିପରିବା ଓ ୫ହଜାର ହେକ୍ଟରରୁ ୧୯୫୦ହେକ୍ଟରରେ ମସଲାଜାତୀୟ ଚାଷ ହୋଇଥିବା ଜଣାପଡ଼ିଛି। ବର୍ତ୍ତମାନର ପାଣିପାଗ ଅଣଧାନ ଫସଲ ପାଇଁ ବେଶ୍ ଅନୁକୂଳ ହୋଇଥିବାରୁ ଅଣଧାନ ଓ ପନିପରିବା ଚାଷ କାର୍ଯ୍ୟ ଆଗେଇ ଚାଲିଛି। ଆବଶ୍ୟକ ଜଳସେଚନ ବ୍ୟବସ୍ଥା ହୋଇ ନ ପାରିବାରୁ ଧାନଚାଷ ବାଧାପ୍ରାପ୍ତ ହେଉଥିବା ଚାଷୀମାନେ କହିଛନ୍ତି।
