ବୌଦ୍ଧ,୨।୭(ଅଜିତ କୁମାର ବାରିକ)ଶିକ୍ଷା ଭିତ୍ତିଭୂମି କ୍ଷେତ୍ରରେ ବୌଦ୍ଧ ଏକ ପଛୁଆ ଜିଲା ଭାବରେ ରାଜ୍ୟରେ ପରିଗଣିତ ହେଉଥିବାବେଳେ ଜିଲାରେ ଉଚ୍ଚ ଶିକ୍ଷା ବ୍ୟବସ୍ଥା ସମ୍ପୂର୍ଣ୍ଣ ଭୁଶୁଡି ପଡିଛି। ଜିଲାରେ ଉଚ୍ଚ ଶିକ୍ଷା କ୍ଷେତ୍ରରେ ଭିତ୍ତିଭୂମିର ଘୋର ଅଭାବ ସହ କେତେକ କଲେଜରେ ଆବଶ୍ୟକ ଅଧ୍ୟାପକ ଅଧ୍ୟାପିକାଙ୍କ ଅଭାବ ରହିଛି। ଫଳରେ ଅର୍ଥ ଅଭାବରୁ ଜିଲାର ବହୁ ଗରିବ ମେଧାବୀ ପିଲା ଅଧାରୁ ପାଠପଢା ଛାଡିବାକୁ ଏକ ପ୍ରକାର ବାଧ୍ୟ ହେଉଛନ୍ତି। ଏବେ ଚିନ୍ତାର ବିଷୟ ହେଲା ଚଳିତବର୍ଷ ଜିଲାରେ ୬୨୯୯ଛାତ୍ରୀଛାତ୍ର ମାଟ୍ରିକ୍ ପାଶ କରିଥିବାବେଳେ ଜିଲାରେ ଥିବା ୨୦ଟି ସମସ୍ତ ଅନୁଦାନପ୍ରାପ୍ତ, ଅଣଅନୁଦାନ ପ୍ରାପ୍ତ ଓ ବେସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ସମୁଦାୟ ୪୧୨୮ଟି ସିଟ୍ ରହିଛି। ଯଦିଓ ସରକାର ମହାବିଦ୍ୟାଳୟମାନଙ୍କୁ ଆବଶ୍ୟକତା ଅନୁଯାୟୀ ସିଟ ବୃଦ୍ଧି କରିବାକୁ ଅନୁମତି ପ୍ରଦାନ କରିଛନ୍ତି। ଏତେ ସଂଖ୍ୟାରେ ଛାତ୍ରୀଛାତ୍ରଙ୍କ ପାଠ ପଢିବା ପାଇଁ ଉଚ୍ଚ ମାଧ୍ୟମିକ ବିଦ୍ୟାଳୟଗୁଡିକରେ ଭିତ୍ତିଭୂମିର ଅଭାବ ରହିଛି। ଅନେକ ଉଚ୍ଚ ମାଧ୍ୟମିକ ବିଦ୍ୟାଳୟରେ ଆବଶ୍ୟକ ସଂଖ୍ୟକ ଅଧ୍ୟାପକ ନ ଥିବା ଓ ଶ୍ରେଣୀ ଗୃହର ଅଭାବ, ପିଲାଙ୍କ ପଢିବା ପାଇଁ ଚେୟାର ଟେବୁଲ ଆଦିର ସମସ୍ୟା ରହିଛି। ଫଳରେ କତ୍ତୃପକ୍ଷ ଅଧିକ ସିଟ୍ ବୃଦ୍ଧି କରିବାକୁ ଅମଙ୍ଗ ଥିବା ଜଣାପଡିଛି। ଜିଲାର ନୋଡାଲ ମହାବିଦ୍ୟାଳୟ ଭାବରେ ବୌଦ୍ଧ ପଞ୍ଚାୟତ ମହାବିଦ୍ୟାଳୟରେ ଯୁକ୍ତଦୁଇ କଳାରେ ମାତ୍ର ୨୫୬ ସିଟ ରହିଥିବାବେଳେ ବିଜ୍ଞାନରେ ୧୨୮, ବାଣିଜ୍ୟରେ ୬୪ଟି ଓ ଧନ୍ଦାମୂଳକ ଶିକ୍ଷା ପାଇଁ ୩୨ଟି ସିଟ ରହିଛି। ବୌଦ୍ଧ ଏନଏସିରେ ପଞ୍ଚାୟତ ମହାବିଦ୍ୟାଳୟକୁ ମିଶାଇ ୩ଟି ଉଚ୍ଚ ମାଧ୍ୟମିକ ବିଦ୍ୟାଳୟ ରହିଥିବାବେଳେ କଳାରେ ୭୬୮, ବିଜ୍ଞାନରେ ୧୨୮ ଓ ବାଣିଜ୍ୟରେ ୬୪ ସିଟ ରହିଛି। ବୌଦ୍ଧ ବ୍ଲକରେ ୬ଟି ଉଚ୍ଚ ମାଧ୍ୟମିକ ବିଦ୍ୟାଳୟ ରହିଥିବାବେଳେ କଳାରେ ୧୦୭୮ ସିଟି ରହିଛି। ସେହିପରି ହରଭଙ୍ଗା ବ୍ଲକରେ ୪ଟି ଉଚ୍ଚ ମାଧ୍ୟମିକ ବିଦ୍ୟାଳୟ ରହିଥିବାବେଳେ ୭୪୬ଟି ସିଟ ରହିଛି। କଣ୍ଟାମାଳ ବ୍ଲକରେ ୭ଟି ଉଚ୍ଚ ମାଧ୍ୟମିକ ବିଦ୍ୟାଳୟ ରହିଥିବାବେଳେ ୧୨୪୮କଳା, ବିଜ୍ଞାନରେ ୪୬ ସିଟ ରହିଛି। ଜିଲାରେ ସମସ୍ତ ଉଚ୍ଚ ମାଧ୍ୟମିକ ବିଦ୍ୟାଳୟରେ ସମୁଦାୟ କଳାରେ ୩୮୪୦, ବିଜ୍ଞାନରେ ୧୯୨ ଓ ବାଣିଜ୍ୟରେ ୬୪ ଓ ଧନ୍ଦାମୂଳକ ଶିକ୍ଷାରେ ୩୨ସିଟ ରହିଛି। ଉଚ୍ଚ ମାଧ୍ୟମିକ ବିଦ୍ୟାଳୟ ଗୁଡିକରେ ଆବଶ୍ୟକୀୟ ସ୍ଥାନ ଅଭାବରୁ ପିଲାମାନେ ପାଠ ପଢି ନ ପାରିବା ଫଳରେ କାମଧନ୍ଧା ଅନ୍ବେଷଣରେ ବାହାର ରାଜ୍ୟକୁ ଦାଦନ ଖଟିବାକୁ ଚାଲିଯାଉଥିବାର ଅଭିଯୋଗ ହେଉଛି। ଅନେକ ପିଲା ସେହି ବର୍ଷ ପଢି ନ ପାରି ତାପର ବର୍ଷ ପର୍ଯ୍ୟନ୍ତ ଅପେକ୍ଷା କରୁଛନ୍ତି। କାଳେ ସିଟି ମିଳିଲେ ପାଠ ପଢିବୁ ବୋଲି ଏଭଳି ଆଶାନେଇ ଅପେକ୍ଷା କରୁଛନ୍ତି। ଏଥିସହ ଯେଉଁ ମେଧାବୀ ଛାତ୍ରୀଛାତ୍ର ମାଟ୍ରିକ ପାଶ କରିଛନ୍ତି ସେମାନେ ବଡବଡ କଲେଜରେ ପଢିବା ପାଇଁ ବାହାରକୁ ଚାଲିଯାଉଛନ୍ତି। ଯେଉଁ ଛାତ୍ରୀଛାତ୍ରଙ୍କର ଆର୍ଥିକ ଅବସ୍ଥା ସ୍ବଚ୍ଛଳ ରହିଛି ସେମାନେ ମଧ୍ୟ ବାହାରକୁ ପଢିବାକୁ ଚାଲିଯାଉଛନ୍ତି। ତେଣୁ ସରକାର ଜିଲାରେ ଯେପରି ଅଧିକ ପିଲା ଉଚ୍ଚଶିକ୍ଷା ପାଇବେ ସେଥିପ୍ରତି ଗୁରୁତ୍ୱ ଦେଇ ଅଧିକ ଉଚ୍ଚ ମାଧ୍ୟମିକ ବିଦ୍ୟାଳୟ ଖୋଲିଲେ ଅଞ୍ଚଳର ବହୁ ମେଧାବୀ ଓ ଗରିବ ପିଲା ଉଚ୍ଚଶିକ୍ଷା ପାଇପାରିବେ।
