ଅମରପାଲି, ୧୩।୫ (ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ପିତାମହୁଲ କ୍ଲଷ୍ଟରର କୁଞ୍ଜାମହୁଲ ଗ୍ରାମରେ ଥିବା ପ୍ରାଥମିକ ବିଦ୍ୟାଳୟଟି ଦୀର୍ଘ ଦିନ ହେବ ବନ୍ଦ ରହିଛି। ଏହାକୁ ପୁନଃ ଖୋଲିବା ଦାବିରେ ଗ୍ରାମବାସୀମାନେ ଜିଲାପାଳଙ୍କ ଦ୍ୱାରସ୍ଥ ହୋଇ ଏକ ଦାବିପତ୍ର ପ୍ରଦାନ କରିଛନ୍ତି।
ସୂଚନା ଅନୁସାରେ, ପିତାମହୁଲ ପଞ୍ଚାୟତର ଏହି ଗ୍ରାମଟି ଗୋଟିଏ ୱାର୍ଡ ବିଶିଷ୍ଟ ଏବଂ ଏହାର ଜନସଂଖ୍ୟା ପ୍ରାୟ ୩୦୦। ଗ୍ରାମରେ ପୂର୍ବରୁ କୌଣସି ଶିକ୍ଷାନୁଷ୍ଠାନ ନଥିବାରୁ ୨୦୦୪ ମସିହାରେ ଏହି ପ୍ରାଥମିକ ବିଦ୍ୟାଳୟଟି ସ୍ଥାପିତ ହୋଇଥିଲା। ଏଠାରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀ ପାଠ ପଢୁଥିଲେ। ମାତ୍ର ଛାତ୍ରସଂଖ୍ୟା କମ୍ ଥିବା ଦର୍ଶାଇ ପ୍ରଶାସନ ପକ୍ଷରୁ ସ୍କୁଲଟିକୁ ବନ୍ଦ କରିଦିଆଯାଇଛି। ସ୍କୁଲ ବନ୍ଦ ହେବା ଫଳରେ କୋମଳମତି ଶିଶୁମାନେ ପ୍ରାୟ ୩ କିଲୋମିଟର ଦୂରରେ ଥିବା ଡୁଲେଶ୍ୱର ଗ୍ରାମକୁ ପଢିବାକୁ ଯିବାକୁ ବାଧ୍ୟ ହେଉଛନ୍ତି। ଗ୍ରାମର ଅଧିକାଂଶ ଲୋକ ଦିନମଜୁରିଆ ଓ ଚାଷୀ ହୋଇଥିବାରୁ, ସେମାନେ ନିଜ କାମ ଛାଡ଼ି ପ୍ରତିଦିନ ପିଲାଙ୍କୁ ସ୍କୁଲକୁ ନେବା-ଆଣିବା କରିପାରୁନାହାନ୍ତି। ଫଳରେ ଅନେକ ପିଲା ନିୟମିତ ବିଦ୍ୟାଳୟ ଯାଇପାରୁନାହାନ୍ତି ଏବଂ କେତେକ କ୍ଷେତ୍ରରେ ପିଲାଙ୍କ ପାଠପଢ଼ା ମଧ୍ୟ ବନ୍ଦ ହୋଇଯାଇଛି।
ଗ୍ରାମବାସୀଙ୍କ ଅଭିଯୋଗ ଅନୁସାରେ, ସେମାନେ ବାରମ୍ବାର ସ୍ଥାନୀୟ ଜନପ୍ରତିନିଧି ଓ ପ୍ରଶାସନକୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଶେଷରେ ବାଧ୍ୟ ହୋଇ ସେମାନେ ସୁବର୍ଣ୍ଣପୁର ଜିଲାପାଳ ଡ. ନୃପରାଜ ସାହୁଙ୍କୁ ଡାକ ମାଧ୍ୟମରେ ଏକ ସ୍ମାରକପତ୍ର ପଠାଇଛନ୍ତି। ବର୍ତ୍ତମାନ ଗ୍ରାମରେ ୨୫ରୁ ଅଧିକ ପ୍ରାଥମିକ ଶିକ୍ଷା ଯୋଗ୍ୟ ଛାତ୍ରଛାତ୍ରୀ ଅଛନ୍ତି ବୋଲି ଦାବିପତ୍ରରେ ଉଲ୍ଲେଖ କରାଯାଇଛି।
ଏନେଇ ଗ୍ରାମର ଅଭିଭାବକ ସୁଧାଂଶୁ ଗାଇଗରିଆ କହିଛନ୍ତି ଯେ, “ଛୋଟ ପିଲାମାନଙ୍କୁ ୩ କିଲୋମିଟର ଦୂର ନିଛାଟିଆ ରାସ୍ତାରେ ଏକାକୀ ପଠାଇବାକୁ ଭୟ ଲାଗୁଛି, ଯାହାଫଳରେ ପିଲାଙ୍କୁ ସ୍କୁଲ ପଠାଇବା ସମ୍ଭବ ହେଉନାହିଁ।”
ଅନ୍ୟପଟେ ବୀରମହାରାଜପୁର ଗୋଷ୍ଠୀ ଶିକ୍ଷା ଅଧିକାରୀ (BEO) ଅଜୟ ଲୁହା କହିଛନ୍ତି, “ସରକାରଙ୍କ ନୀତି ଓ ନିଷ୍ପତ୍ତି ଅନୁଯାୟୀ କାର୍ଯ୍ୟ କରାଯିବ। ଆମ ସ୍ତରରେ ସ୍କୁଲ ଖୋଲିବା ସମ୍ଭବ ନୁହେଁ।“
ଗ୍ରାମର ଭବିଷ୍ୟତ ତଥା ପିଲାମାନଙ୍କ ଶିକ୍ଷା ଅଧିକାରକୁ ଦୃଷ୍ଟିରେ ରଖି ପ୍ରଶାସନ ଏହି ସମସ୍ୟାରେ ଶୀଘ୍ର ହସ୍ତକ୍ଷେପ କରି ସ୍କୁଲଟିକୁ ପୁନଃ କାର୍ଯ୍ୟକ୍ଷମ କରିବାକୁ ସାଧାରଣରେ ଦାବି ହେଉଛି।
