ପୁରୀ ଅଫିସ,୨୭ା୯: ପୁରୀ ବଳିଆପଣ୍ଡା ବସ୍ତିର କୃଷ୍ଣ କୁମାର ପଣ୍ଡା। ରାପକୁ ନେଇ ଆଗକୁ ବଢିବାର ଅଦମ୍ୟ ସାହସ ବାନ୍ଧିଛନ୍ତି। ଦାରିଦ୍ର୍ୟତାର କଷାଘାତରେ ପେଶି ହେଉଥିଲେ ବି ଏହି ଯୁବ ରାପରଙ୍କ ମଧ୍ୟରେ ଅସରନ୍ତି ଆଶା ଓ ସ୍ବପ୍ନ ଉଙ୍କିମାରୁଛି। ମହାପ୍ରଭୁଙ୍କ ଆଶୀର୍ବାଦ ନେଇ ଶ୍ରୀମନ୍ଦିରରୁ ଆରମ୍ଭ କରିଥିଲେ ତାଙ୍କ ରାପ୍ ଅଭିଯାନ। କରୋନା ଯୋଗୁ ପରିବାର ଚଳାଇବାରେ ପ୍ରତିବନ୍ଧକ ସମ୍ମୁଖୀନ ହେଉଥିବା କୃଷ୍ଣ କିନ୍ତୁ ତାଙ୍କ ରାପ ଜାରି ରଖିଛନ୍ତି। କାଳିଆ ଠାକୁରଙ୍କ ଆଶୀର୍ବାଦରୁ ଦିନେ ନା ଦିନେ ସେ ନିଜକୁ ପ୍ରତିପାଦିତ କରିବେ ବୋଲି ଆଶା ବାନ୍ଧିଛନ୍ତି।
ଅନେକ ପ୍ରତିଭା ଅଛନ୍ତି, ହେଲେ ଉପଯୁକ୍ତ ସୁଯୋଗ ଓ ପ୍ରୋତ୍ସାହନ ଅଭାବରୁ ସେମାନେ ଆଗକୁ ଆସିପାରୁ ନାହାନ୍ତି। ଏମିତି ଜଣେ ପ୍ରତିଭା ହେଉଛନ୍ତି କୃଷ୍ଣ। ବାପା ଜଣେ ବିଚ୍ ଫଟୋଗ୍ରାଫର। କୃଷ୍ଣ ଶ୍ରୀମନ୍ଦିରରେ ଯାତ୍ରୀ ଗୁମାସ୍ତା କାମ କରନ୍ତି। କିନ୍ତୁ ନିଶା ତାଙ୍କର ରାପ୍ ଗାଇବା। କରୋନା ଯୋଗୁ ୬ମାସରୁ ଊର୍ଦ୍ଧ୍ୱ ହେଲାଣି ଶ୍ରୀମନ୍ଦିରକୁ ଭକ୍ତଙ୍କ ପ୍ରବେଶ ଉପରେ କଟକଣା ଜାରି ଯୋଗୁ ତାଙ୍କ ପେଶା ବନ୍ଦ ହୋଇଯାଇଛି । ଏହି ଅଭାବୀ ଭିତରେ କିନ୍ତୁ ନିଜ ପ୍ରତିଭାକୁ ମାରି ଦେଇନାହାନ୍ତି। ଦୃଢ ଇଚ୍ଛାଶକ୍ତି ଯୋଗୂ ସେ ଏବେ ଓଡ଼ିଆ, ହିନ୍ଦୀ ଏବଂ ବେଙ୍ଗଲି ଭାଷାରେ ରାପ୍ ଗାଉଛନ୍ତି। କୌଣସି ପ୍ରସଙ୍ଗକୁ ରାପ୍ ମାଧ୍ୟମରେ ପରିବେଷଣ କରିବାରେ ସେ ମାହିର। ତାଙ୍କ ପାଇଁ ସୋସିଆଲ ମିଡିଆ ହିଁ ସାଜିଛି ଏକମାତ୍ର ରାସ୍ତା। ବସ୍ତିର ବାସ୍ତବ ଚିତ୍ରଠାରୁ ଆରମ୍ଭ କରି ମହାମାରୀ କରୋନା, ପୁଣି ବହୁ ଚର୍ଚ୍ଚିତ ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ପର୍ଯ୍ୟନ୍ତ ଏମିତି ଏକାଧିକ ସାମ୍ପ୍ରତିକ ସ୍ଥିତିକୁ ନେଇ ରାପ୍ ତିଆରି କରିଛନ୍ତି କୃଷ୍ଣ। ପାଖରେ କ୍ୟାମେରା ନାହିଁ କି ସାଥ୍ ଦେବାକୁ କୌଣସି ମ୍ୟୁଜିକ୍ ନିର୍ଦ୍ଦେଶକ ଅବା ମ୍ୟୁଜିକ ଇନ୍ଷ୍ଟୁମେଣ୍ଟ ମଧ୍ୟ ନାହିଁ। ଏକା ଏକା ତାଙ୍କ ସ୍ବପ୍ନକୁ ପୂରଣ କରିବା ଲାଗି ଅହରହ ଉଦ୍ୟମ ଚଳାଇଛନ୍ତି। ଏବେ ଶାରଦୀୟ ପୂଜାକୁ ନେଇ ଏକ ରାପ୍ ପ୍ରସ୍ତୁତିରେ ସେ ଲାଗିଛନ୍ତି। କୃଷ୍ଣ ଜଣେ ପଶୁପକ୍ଷୀ ପ୍ରେମୀ। ସେ କୁକୁର ଓ ଶୁଆ ପାଳିଛନ୍ତି। କୃଷ୍ଣ କହିଛନ୍ତି, କିଛି କରିବାର ମନରେ ଇଚ୍ଛା ଥିଲା। ତେଣୁ ରାପ୍କୁ ଆପଣାଇଛି। ଆଗାମୀ ଦିନରେ ଓଡ଼ିଆ ସଂସ୍କୃତି, ପରମ୍ପରା ଓ ଆଦିବାସୀ ବାଦ୍ୟକୁ ନେଇ ନିଆରା ରାପ୍ ପ୍ରସ୍ତୁତ କରିବା ପାଇଁ ଲକ୍ଷ୍ୟ ରଖିଛି।
