ନୂଆଦିଲ୍ଲୀ,୨।୧୨: କେକେଆର୍ ୨୩.୭୫ କୋଟି ଟଙ୍କାରେ ସବୁଠାରୁ ମହଙ୍ଗା ଖେଳାଳି ଭାବେ ଭେଙ୍କଟେଶ ଆୟରଙ୍କୁ କିଣିଥିଲା। ଏହା ପରଠାରୁ ତାଙ୍କୁ ଦଳ ଅଧିନାୟକ କରିବ ବୋଲି ଆଶା କରାଯାଇଥିଲା। ନିଜେ ଆୟର ମଧ୍ୟ ନେତୃତ୍ୱ ନେବାକୁ ଇଚ୍ଛା ପ୍ରକାଶ କରିଥିଲେ। ହେଲେ ଏବେ କିଛି ଭିନ୍ନ ଖବର ଆସୁଛି। କେକେଆର୍ ଆୟରଙ୍କୁ ନୁହେଁ ବରଂ ଯାହାଙ୍କୁ ୨୨.୨୫ କୋଟି ଟଙ୍କା କମ୍ ଦେଇ କିଣିଛି, ତାଙ୍କୁ ଅଧିନାୟକ କରିବା ବିଷୟରେ ଚିନ୍ତା କରୁଛି। ସେ ହେଲେ ଅଜିଙ୍କ୍ୟ ରାହାନେ।
ରାହାନେଙ୍କୁ କୋଲକାତା ତାଙ୍କ ବେସ୍ ପ୍ରାଇସ୍ ୧.୫ କୋଟିରେ କିଣିଛି। ଏହା ପୂର୍ବରୁ ସେ ସିଏସ୍କେର ଅଂଶ ଥିଲେ। ଦଳ ତାଙ୍କୁ ରିଟେନ ନ କରିବା ପରେ କେକେଆର୍ ତାଙ୍କୁ କିଣିଥିଲା। ତେବେ ତାଙ୍କ ପାଖରେ ରାଜସ୍ଥାନ ରୟାଲ୍ସ, ମୁମ୍ବାଇ ଇଣ୍ଡିଆନ୍ସ, ଦିଲ୍ଲୀ କ୍ୟାପିଟାଲ୍ସ, ରାଇଜିଂ ପୁଣେ ସୁପରଜାଏଣ୍ଟସ୍ ଏବଂ ସିଏସ୍କେର ଅଧିନାୟକ ଭାବେ ଅନୁଭବ ରହିଛି। ଏମିତିରେ ଯଦି କେକେଆର୍ ତାଙ୍କୁ ଅଧିନାୟକ କରିବାକୁ ଚିନ୍ତା କରୁଛି ତେବେ ନିଶ୍ଚିତ ଭାବେ ତାଙ୍କର ଅନୁଭବ କାମରେ ଆସିବ।
ଟାଇମ୍ସ ଅଫ ଇଣ୍ଡିଆ ନିଜର ରିପୋର୍ଟରେ କହିଛି ଯେ, ରାହାନେଙ୍କୁ ନୂଆ ଅଧିନାୟକ କରିବାର ସମ୍ଭାବନା ୯୦%। କେକେଆର ତାଙ୍କୁ କେବଳ ଏଥିଯୋଗୁ କିଣିଛି। କେବଳ ଏଥିରେ ଆଧିକାରୀକ ଭାବେ ମୋହର ବାଜିବା ବାକି ରହିଛି।
୩ ଥରର ଆଇପିଏଲ୍ ଚାମ୍ପିଅନ୍ କେକେଆର ସହ ରାହାନେଙ୍କର ଏହା ଦ୍ୱିତୀୟ ଟର୍ମ ହେବ। ଏହାପୂର୍ବରୁ ୨୦୨୨ରେ ସେ ଏହାର ଅଂଶ ଥିଲେ। ୨୦୨୩ରେ ସିଏସ୍କେରୁ ଖେଳୁଥିବା ବେଳେ ସେ ୧୪ ମ୍ୟାଚ୍ରେ ୧୭୨.୪୯ ଷ୍ଟ୍ରାଇକ୍ ରେଟ୍ରେ ୩୨୬ ରନ୍ କରିଛନ୍ତି। ୨୦୨୪ ତାଙ୍କ ପାଇଁ ଭଲ ନ ଥିଲା।
