ଅହମ୍ମଦାବାଦ, ୨୬।୪- ପ୍ରଥମେ ଭଲ ବୋଲିଂ ଓ ଫିଲ୍ଡିଂ ବଳରେ ପ୍ରତିପକ୍ଷ କିଙ୍ଗ୍ସ ପଞ୍ଜାବକୁ ୧୨୩ ରନ୍ରେ ରୋକିଲା କୋଲକାତା ନାଇଟ୍ ରାଇଡର୍ସ। ସାମ୍ନାରେ ଥିଲା ୧୨୪ ରନ୍ର ଛୋଟିଆ ଲକ୍ଷ୍ୟ। ଏହାସତ୍ତ୍ୱେ ସଂଘର୍ଷ କରିଥିଲା କେକେଆର। କିନ୍ତୁ ଅଧିନାୟକ ଇଆନ ମୋର୍ଗାନଙ୍କ ଅପରାଜିତ ୪୭ ରନ୍ର ଇନିଂସ ଯୋଗୁ କେକେଆର ୧୬.୪ ଓଭରରେ ୫ ଉଇକେଟ ହରାଇ ହାସଲ କରି ନେଇଥିଲା ବିଜୟଲକ୍ଷ୍ୟ। ଏଥି ସହ ଲଗାତାର ୪ ପରାଜୟ ପରେ ଦଳକୁ ମିଳିଛି ବହୁ ଗୁରୁତ୍ୱପୂର୍ଣ୍ଣ ବିଜୟ। ପଏଣ୍ଟ ଟେବୁଲରେ ପଞ୍ଚମ ସ୍ଥାନକୁ ଉଠିଛି କୋଲକାତା (୪ ପଏଣ୍ଟ)।
ଆରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା ପଞ୍ଜାବ। ଦଳର ୫ ବ୍ୟାଟ୍ସମ୍ୟାନଙ୍କୁ ମିଳିଥିଲା ଭଲ ଆରମ୍ଭ। ହେଲେ କେହି ବଡ଼ ଇନିଂସ ଖେଳି ପାରି ନ ଥିଲେ। ମୟଙ୍କ ଅଗ୍ରଓ୍ବାଲ ୩୧ ଓ କ୍ରିସ ଜୋର୍ଡାନ ୩୦ ରନ୍ କରିଥିଲେ। କୋଲକାତା ପକ୍ଷରୁ ପ୍ରସିଦ୍ଧ କ୍ରିଷ୍ଣା ୩ ଉଇକେଟ ନେଇଥିବାବେଳେ ପାଟ କୁମିନ୍ସ ଓ ସୁନିଲ ନାରିନ ହାତେଇଥିଲେ ୨ ଲେଖାଏ ଉଇକେଟ।
