ୟୁଏଇ,୨୧।୯: ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟର ଆରମ୍ଭ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ପାଇଁ ଅତ୍ୟନ୍ତ ନିରାଶାଜନକ ଥିଲା। ଚଳିତ ସିଜିନର ୩୧ତମ ମ୍ୟାଚରେ ଆରସିବି କୋଲକାତା ନାଇଟ ରାଇଡର୍ସ (କେକେଆର୍)ଙ୍କ ହାତରେ ଲଜ୍ଜାଜନକ ୯ ଉଇକେଟରେ ପରାଜୟର ସମ୍ମୁଖୀନ ହୋଇଥିଲା। ପ୍ରଥମେ ବ୍ୟାଟିଂ କରି ଆରସିବି କେବଳ ୯୨ ରନ ସ୍କୋର କରିପାରିଥିଲା। ବିରାଟ କୋହଲି, ଏବି ଡି ଭିଲିୟର୍ସଙ୍କ ଭଳି ଷ୍ଟାର ଖେଳାଳିମାନେ ଫ୍ଲପ ହୋଇଥିଲେ।
କୋହଲିଙ୍କ ପାଇଁ ଏହି ମ୍ୟାଚ ଅତ୍ୟନ୍ତ ସ୍ବତନ୍ତ୍ର ଥିଲା, କିନ୍ତୁ ସେ ତାଙ୍କର ବିଶେଷ ମ୍ୟାଚ ସ୍ମରଣୀୟ କରିପାରି ନ ଥିଲେ। ଆରସିବି ପାଇଁ ଏହା କୋହଲିଙ୍କ ୨୦୦ ତମ ମ୍ୟାଚ ଥିଲା। ଏହି ସଫଳତା ହାସଲ କରିବାରେ ସେ ପ୍ରଥମ ଖେଳାଳି ହୋଇଥିଲେ। ଯଦିଓ, ଅନେକ ଖେଳାଳି ତାଙ୍କ ପୂର୍ବରୁ ମଧ୍ୟ ୨୦୦ ଆଇପିଏଲ ମ୍ୟାଚ ଖେଳିଛନ୍ତି, କିନ୍ତୁ ଗୋଟିଏ ଦଳ ସହିତ ଏତେ ମ୍ୟାଚ ଖେଳିବାକୁ କେହି ସକ୍ଷମ ହୋଇ ନାହାଁନ୍ତି। ଏହି ଅବସରରେ ଦଳର ଷ୍ଟାର ଖେଳାଳି ଏବି ଡି ଭିଲିୟର୍ସ କୋହଲିଙ୍କୁ ଏକ ସ୍ବତନ୍ତ୍ର ଜର୍ସି ଉପହାର ଦେଇଥିଲେ। ଡି ଭିଲିୟର୍ସ ଅଧିନାୟକଙ୍କୁ ଆରସିବିର ଏକ ଜର୍ସି ଉପହାର ଦେଇଥିଲେ। ଏଥିରେ ତାଙ୍କ ନାମ ଲେଖାଯାଇଥିଲା ଏବଂ ଜର୍ସି ସଂଖ୍ୟା ୨୦୦ ଥିଲା। ବିରାଟ ୨୦୦୮ରୁ ଆରସିବି ସହିତ ଅଛନ୍ତି। ଏହି ଜର୍ସି ଦେଖି ଭାବପ୍ରବଣ ହୋଇଯାଇଥିଲେ କୋହଲି।
ଅଧିନାୟକ ଭାବରେ ଏହା ବିରାଟ କୋହଲିଙ୍କ ୧୩୩ତମ ମ୍ୟାଚ ଥିଲା। ଏହି ସିଜନ ପରେ ଦଳର ଅଧିନାୟକତ୍ୱ ଛାଡିବାକୁ କୋହଲି ଘୋଷଣା କରିସାରିଛନ୍ତି। ଏହା କେକେଆରର ୨୦୦ ତମ ମ୍ୟାଚ ଥିଲା। ଦଳ ୧୦୦ଟି ମ୍ୟାଚ ଜିତିଥିବାବେଳେ ୯୫ଟି ମ୍ୟାଚରେ ହାରିଛି। ମୁମ୍ବାଇ ଇଣ୍ଡିଆନ୍ସ ସର୍ବାଧିକ ୨୧୧ ମ୍ୟାଚ ଖେଳିଛି। ଏହି ସମୟରେ, ଏହା ଆରସିବିର ୨୦୪ତମ ମ୍ୟାଚ ଥିଲା। ଦଳ ୯୪ ଟି ମ୍ୟାଚ ଜିତିଛି। ୧୦୨ ମ୍ୟାଚରେ ହାରିଛି।
