ଅହମ୍ମଦାବାଦ୍,୨୦।୧୧: ଆଇସିସି କ୍ରିକେଟ ବିଶ୍ୱକପର ଫାଇନାଲ୍ ମ୍ୟାଚ ରବିବାର ଅହମ୍ମଦାବାଦର ନରେନ୍ଦ୍ର ମୋଦି କ୍ରିକେଟ ଷ୍ଟାଡିୟମରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଇଥିଲା। ଏହି ମ୍ୟାଚ ଦେଖିବାକୁ ଦେଶର ବିଭିନ୍ନ ସ୍ଥାନରୁ ଭିଭିଆଇପିମାନେ ଆସିଥିଲେ। ତେବେ ମ୍ୟାଚ ସମୟରେ ଏକ ବଡ଼ ସୁରକ୍ଷା ତ୍ରୁଟି ଦେଖାଯାଇଥିଲା। ଭାରତ ବ୍ୟାଟିଂ କରୁଥିବାବେଳେ ଜଣେ ବ୍ୟକ୍ତି କ୍ରିକେଟ ପଡ଼ିଆରେ ପ୍ରବେଶ କରିଥିଲେ। ପଡିଆକୁ ପ୍ରବେଶ କରିଥିବା ଏହି ବ୍ୟକ୍ତିଙ୍କ ବିରୋଧରେ ଏକ ମାମଲା ରୁଜୁ ହୋଇଛି।
ଅହମ୍ମଦାବାଦ କ୍ରିକେଟ ଷ୍ଟାଡିୟମରେ ପ୍ରବେଶ କରିଥିବା ବ୍ୟକ୍ତିଙ୍କୁ ଜନସନ ୱେନ ବୋଲି ଜଣା ପଡିଛି। ସେ ଅଷ୍ଟ୍ରେଲିଆର ବାସିନ୍ଦା। ସେ ନିଜେ ଏହି ସୂଚନା ଦେଇଛନ୍ତି। ଯେତେବେଳେ ୱେନଙ୍କୁ ପୋଲିସ ନେଇଯାଉଥିଲା ସେତେବେଳେ ସେ ଗଣମାଧ୍ୟମକୁ କହିଥିଲେ ଯେ ମୁଁ ଅଷ୍ଟ୍ରେଲିଆର। ମୁଁ ବିରାଟ କୋହଲିଙ୍କୁ ଭେଟିବା ପାଇଁ ପଡ଼ିଆରେ ପ୍ରବେଶ କରିଥିଲି। ପାଲେଷ୍ଟାଇନରେ ଚାଲିଥିବା ଯୁଦ୍ଧ ପାଇଁ ମୋର ବିରୋଧ ଥିଲା। ପଡ଼ିଆରେ ପ୍ରବେଶ କରିବାବେଳେ ସେ ବ୍ୟାଟିଂ କରୁଥିବା ବିରାଟ କୋହଲିଙ୍କ ନିକଟତର ହୋଇ କାନ୍ଧରେ ହାତ ରଖି ଝୁଲିବା ଆରମ୍ଭ କରିଥିଲେ।
ଅହମ୍ମଦାବାଦ ପୋଲିସର ସୂଚନାନୁସାରେ, ଚାନ୍ଦକେଡା ପୋଲିସ ଷ୍ଟେଶନରେ ଭାରତୀୟ ଦଣ୍ଡବିଧି ସଂହିତା (ଆଇପିସି) ର ଧାରା ୩୩୨ ଏବଂ ୪୪୭ ଅନୁଯାୟୀ ଜନସନଙ୍କ ବିରୋଧରେ ମାମଲା ରୁଜୁ ହୋଇଛି। ଜନସନ ନାଲି ଏବଂ ଧଳା ଟି-ଶର୍ଟ ପିନ୍ଧି ପଡ଼ିଆକୁ ପ୍ରବେଶ କରିଥିଲେ।
