ଚେନ୍ନାଇ,୧୬।୨: ଭାରତୀୟ ଅଧିନାୟକ ଭାବେ ନୂତନ ଉପଲବ୍ଧି ହାସଲ କରିଛନ୍ତି ବିରାଟ କୋହଲି। ଚେନ୍ନାଇରେ ଇଂଲଣ୍ଡ ବିପକ୍ଷ ଟେଷ୍ଟରେ ୩୧୭ରନ୍ ବ୍ୟବଧାନରେ ଜିତିଛି ଟିମ୍ ଇଣ୍ଡିଆ। ଏଥିସହ ଦଳ ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜକୁ ୧-୧ ସ୍ଥିତିକୁ ଆଣିବାରେ ସଫଳ ହୋଇଛି। ଏହି ବିଜୟ ସହ କୋହଲି ଧୋନୀଙ୍କ ରେକର୍ଡର ସମକକ୍ଷ ହୋଇଛନ୍ତି। ଧୋନୀ ଭାରତରେ ୨୧ ଟେଷ୍ଟ ମ୍ୟାଚ୍ ଜିତିଥିଲେ। ଏବେ କୋହଲି ମଧ୍ୟ ସବୁଠାରୁ ସଫଳ ଅଧିନାୟକ ଭାବେ ଏହି ରେକର୍ଡର ସମକକ୍ଷ ହୋଇଛନ୍ତି।
ପ୍ରକାଶ ଯେ, ଦ୍ୱିତୀୟ ଟେଷ୍ଟରେ ଟସ୍ ଜିତିଥିଲା ଭାରତ। ଏହାପରେ କୋହଲି ବ୍ୟାଟିଂ ନିଷ୍ପତ୍ତି ନେଇଥିଲେ। ଭାରତ ପ୍ରଥମ ପାଳିରେ ୩୨୯ରନ୍ କରିଥିବା ବେଳେ ଇଂଲଣ୍ଡ ୧୩୪ ରନ୍ରେ ସମସ୍ତ ଉଇକେଟ ହରାଇଥିଲା। ପରେ ଭାରତ ଦ୍ୱିତୀୟ ପାଳିରେ ୨୮୬ ରନ୍ କରି ଇଂଲଣ୍ଡକୁ ୪୮୨ରନ୍ର ବିଜୟ ଲକ୍ଷ୍ୟ ଦେଇଥିଲା। ଚତୁର୍ଥ ଦିନ ଇଂଲଣ୍ଡ ଟିମ୍ ଦ୍ୱିତୀୟ ପାଳିରେ ୧୬୪ରନ୍ରେ ଅଲଆଉଟ୍ ହୋଇଥିଲା।
