ଓ୍ବାଶିଂଟନ୍: ସରିଛି ଆମେରିକା ରାଷ୍ଟ୍ରପତି ନିର୍ବାଚନ। ଡୋନାଲ୍ଡ ଟ୍ରମ୍ପ୍ଙ୍କୁ ହରାଇ ବାଜି ମାରିଛନ୍ତି ଡେମୋକ୍ରାଟିକ୍ ପାର୍ଟିର ନେତା ଜୋ ବାଇଡେନ୍। ନବନିଯୁକ୍ତ ରାଷ୍ଟ୍ରପତିଙ୍କ ସ୍ବାଗତ ପାଇଁ ପ୍ରସ୍ତୁତ ହ୍ବାଇଟ୍ ହାଉସ୍ । ସୁରକ୍ଷା ବ୍ୟବସ୍ଥା, ଅତ୍ୟାଧୁନିକ ସୁବିଧା ଆମେରିକାର ରାଷ୍ଟ୍ରପତି ଭବନକୁ ସର୍ବାଗ୍ରେ ରଖିଥିବାବେଳେ ଏହାର ପରିସରରେ ଥିବା ସୁବ୍ୟବସ୍ଥିତ ପାକଶାଳା ମଧ୍ୟ କିଛି କମ୍ ନୁହେଁ । ରାଷ୍ଟ୍ରପତି, ତାଙ୍କ ପରିବାର ସଦସ୍ୟ ଏବଂ ଏଠାକୁ ଆସୁଥିବା ଅତିଥିଙ୍କ ଲାଗି ସୁସ୍ବାଦୁ ଖାଦ୍ୟ ପ୍ରସ୍ତୁତ କରିବାକୁ ଏହି କିଚେନରେ ରହିଛି ସମସ୍ତ ସୁବିଧା।
ଆମେରିକା ରାଷ୍ଟ୍ରପତି ଭବନ ‘ହ୍ବାଇଟ୍ ହାଉସ୍’କୁ ବିଶ୍ୱର ସବୁଠାରୁ ସୁରକ୍ଷିତ ସୌଧର ମାନ୍ୟତା ମିଳିଛି। ୬ ମହଲା ବିଶିଷ୍ଟ ଏହି କୋଠା ୫୫,୦୦୦ ବର୍ଗଫୁଟ ପରିମିତ ଅଞ୍ଚଳରେ ପରିବ୍ୟାପ୍ତ। ଆମେରିକାର କ୍ଷମତା କେନ୍ଦ୍ରସ୍ଥଳ ଭାବେ ପରିଚିତ ଏହି ଭବ୍ୟ ଅଟ୍ଟାଳିକାରେ ରୁହନ୍ତି ଦେଶର ପ୍ରଥମ ପରିବାର। ଆମେରିକା ରାଷ୍ଟ୍ରପତିଙ୍କ ଅଫିସ କାର୍ଯ୍ୟ ମଧ୍ୟ ଏଠାରୁ ପରିଚାଳିତ ହୋଇଥାଏ।
ହ୍ବାଇଟ୍ ହାଉସ୍ରେ ଦୁଇଟି କାମ ୨୪ ଘଣ୍ଟା ଅନବରତ ଚାଲିଥାଏ। ଗୋଟିଏ ହାଉସ୍ କିପିଂ ଏବଂ ଅନ୍ୟଟି ପାକଶାଳା ପରିଚାଳନା। କର୍ମଚାରୀମାନେ ଲଗାତର ସେବା ପ୍ରଦାନ କରିଥାନ୍ତି। ତେବେ ରୋଷେଇ ଘର ସବୁଠାରୁ ଗୁରୁତ୍ୱପୂର୍ଣ୍ଣ। କାରଣ ଏହି ସ୍ଥାନରୁ ରାଷ୍ଟ୍ରପତି ଏବଂ ତାଙ୍କ ପରିବାର ସଦସ୍ୟଙ୍କ ଲାଗି ଖାଦ୍ୟପେୟ ପ୍ରସ୍ତୁତ ହୋଇଥାଏ। ବିଭିନ୍ନ ସମୟରେ ଅନ୍ୟ ରାଷ୍ଟ୍ରରୁ ଆସୁଥିବା ରାଷ୍ଟ୍ରମୁଖ୍ୟଙ୍କ ମନପସନ୍ଦର ଭୋଜନ ଏବଂ ଗୁରୁତ୍ୱପୂର୍ଣ୍ଣ ମିଟିଂ ଲାଗି ଖାଦ୍ୟପଦାର୍ଥ ମଧ୍ୟ ଏଠାରେ ପ୍ରସ୍ତୁତ ହୋଇଥାଏ।
ରୋଷେଇ ଘର ଦାୟିତ୍ୱରେ ଥିବା କର୍ମଚାରୀମାନେ ଖାଦ୍ୟ ତିଆରି କରିବାଠାରୁ ପରଷିବା ଯାଏ ସମସ୍ତ କାର୍ଯ୍ୟ କରିଥାନ୍ତି। ସାଧାରଣତଃ ରାଷ୍ଟ୍ରପତିଙ୍କ ସ୍ତ୍ରୀ ପାକଶାଳା କାର୍ଯ୍ୟରେ ହସ୍ତକ୍ଷେପ କରିଥାନ୍ତି। ଅନ୍ୟ କେତେଜଣ ଏଥିରୁ ଦୂରେଇ ରୁହନ୍ତି। ଉଦାହରଣ ସ୍ବରୂପ, ଆମେରିକାର ୩୪ତମ ରାଷ୍ଟ୍ରପତି ଡାଇଟ୍ ଡି. ଆଇସେନଓ୍ବେରଙ୍କ ସ୍ତ୍ରୀ ମେମି ହ୍ବାଇଟ୍ ହାଉସ୍ କିଚେନ୍ରେ ବେଶ୍ ସକ୍ରିୟ ରହୁଥିଲେ। ତେବେ ବର୍ତ୍ତମାନର ରାଷ୍ଟ୍ରପତିଙ୍କ ସହଧର୍ମିଣୀ ମେଲାନିଆ ଟ୍ରମ୍ପ୍ ପାକଶାଳା କାର୍ଯ୍ୟରେ ଦଖଲ ଦେଉ ନ ଥିଲେ।
ହ୍ବାଇଟ୍ ହାଉସ୍ର ୧୩୨ ପ୍ରକୋଷ୍ଠ ମଧ୍ୟରୁ ୩ଟିରେ ରୋଷେଇ ବ୍ୟବସ୍ଥା ରହିଛି। ଏହି କିଚେନ୍ କୌଣସି ସମୟରେ ୧୪୦ଜଣ ଅତିଥିଙ୍କ ଲାଗି ଖାଦ୍ୟ ପରସିବାର କ୍ଷମତା ରଖେ। ଆବଶ୍ୟକ ସମୟରେ ଏଠାରେ ୧୦୦୦ ଲୋକଙ୍କ ଲାଗି ଖାଇବା ବ୍ୟବସ୍ଥା ମଧ୍ୟ କରାଯାଇପାରିବ। ହେଲେ ଏଥିଲାଗି ପୂର୍ବରୁ ରୋଷେଇଶାଳାର ମୁଖିଆଙ୍କୁ ସୂଚିତ କରିବାକୁ ପଡ଼ିଥାଏ। ମୁଖ୍ୟ ପାକଶାଳାକୁ ବାଦ୍ ଦେଲେ ପେଷ୍ଟ୍ରି କିଚେନ ଏବଂ ଫ୍ୟାମିଲି କିଚେନ ମଧ୍ୟ ଅଛି। ଏଠାରେ ସକାଳ ଜଳଖିଆ ପ୍ରସ୍ତୁତ କରାଯାଇଥାଏ। ରାଷ୍ଟ୍ରପତିଙ୍କ କାର୍ଯ୍ୟାଳୟ ସହ କିଚେନ ପ୍ରତ୍ୟକ୍ଷ ଭାବେ ସମ୍ପର୍କିତ। ରାଷ୍ଟ୍ରପତିଙ୍କ ଅଫିସରେ ଏକ ବଟନ୍ ଥାଏ। ଏହାକୁ ଦବାଇ ସେ ନିଜ ଇଚ୍ଛା ଅନୁଯାୟୀ ଖାଦ୍ୟପାନୀୟ ଅର୍ଡର କରିଥାନ୍ତି। ସୂଚନାଯୋଗ୍ୟ, ଡୋନାଲ୍ଡ ଟ୍ରମ୍ପ୍ ବଟନ ଦବାଇ ଅଧିକାଂଶ ସମୟରେ ଫ୍ରେଶ କୋକ୍ ଏବଂ ପୂର୍ବତନ ରାଷ୍ଟ୍ରପତି ବାରାକ୍ ଓବାମା ଗରମ ଚା ଅର୍ଡର କରୁଥିଲେ।
ସୁରକ୍ଷା ଦୃଷ୍ଟିରୁ ଖାଦ୍ୟ ପରିବେଷଣ ପୂର୍ବରୁ ତନ୍ନତନ୍ନ କରି ଯାଞ୍ଚ କରାଯାଇଥାଏ। ହ୍ବାଇଟ୍ ହାଉସ୍ ପରିସରକୁ କୌଣସି ବାହାର ଖାଦ୍ୟ ପ୍ରବେଶ କରିବା ଉପରେ କଟକଣା ଜାରି କରାଯାଇଛି। ରାଷ୍ଟ୍ରପତି କିମ୍ବା ତାଙ୍କର ପରିବାର ସଦସ୍ୟ ବ୍ୟକ୍ତିଗତ କାର୍ଯ୍ୟରେ ପାକଶାଳା ବ୍ୟବହାର କଲେ କିମ୍ବା ପାର୍ଟି କଲେ, ଏହାର ଖର୍ଚ୍ଚ ନିଜ ପକେଟରୁ ଦେବାକୁ ପଡ଼ିଥାଏ। ଅନେକ ସମୟରେ ଖୁବ୍ କମ୍ ସମୟରେ ପାକଶାଳା କର୍ମଚାରୀଙ୍କୁ ଏକା ସଙ୍ଗରେ ଅନେକ ପ୍ରକାର ବ୍ୟଞ୍ଜନ ପ୍ରସ୍ତୁତ କରିବାକୁ ପଡ଼େ। ତଥାପି ଏହାକୁ ଚ୍ୟାଲେଞ୍ଜ ଭାବେ ଗ୍ରହଣ କରି କର୍ମଚାରୀମାନେ ନିର୍ଦ୍ଧାରିତ ସମୟରେ ଖାଦ୍ୟ ପ୍ରସ୍ତୁତ କରିଥାନ୍ତି।
ମୁଖ୍ୟ ଶେଫ୍ ଏସୀୟ
ଆମେରିକାର ରାଷ୍ଟ୍ରପତିଙ୍କ ପଦବୀ ଯେତେ ଗୁରୁତ୍ୱପୂର୍ଣ୍ଣ ସେତିକି ତାଙ୍କର ଖାଦ୍ୟପେୟ। ଏଠାରେ ନିୟୋଜିତ ରୋଷେୟା ସମସ୍ତ ପ୍ରକାର ପାକ ପ୍ରସ୍ତୁତିରେ ଧୁରୀଣ। କ୍ରିଷ୍ଟେଟା କମରଫୋର୍ଡ ୧୪ ବର୍ଷ ଧରି ହ୍ବାଇଟ୍ ହାଉସ୍ର ଏକ୍ଜିକ୍ୟୁଟିଭ୍ ଶେଫ୍ ଅଛନ୍ତି। ତାଙ୍କ ଘର ଫିଲିଫାଇନ୍ସରେ। ଅର୍ଥାତ୍ ତାଙ୍କ ସମ୍ପର୍କ ଏସିଆ ମହାଦେଶ ସହ ଅଛି। ୧୯୮୫ରେ ମାତ୍ର ୨୩ ବର୍ଷ ବୟସରେ ସେ ଫିଲିପାଇନ୍ସରୁ ଆମେରିକା ଚାଲିଯାଇଥିଲେ। କିଚେନରେ ପିଢ଼ି ପରେ ପିଢ଼ି ଧରି ଅନେକେ କାମ କରୁଛନ୍ତି। ଏଠାରେ କାହାରିକୁ ସିଧାସଳଖ ଚାକିରି ମିଳେନାହିଁ। ଷ୍ଟାଫ୍ ମେମ୍ବର୍ସଙ୍କ ସୁପାରିସ କ୍ରମେ ହିଁ ଏଠାରେ ଜଣକୁ ନିଯୁକ୍ତି ମିଳିଥାଏ।
ରାଷ୍ଟ୍ରପତି ବଦଳିଲେ ବଦଳେ ମେନୁ
ପ୍ରତି ୪ବର୍ଷରେ ଥରେ ଆମେରିକାରେ ରାଷ୍ଟ୍ରପତି ନିର୍ବାଚନ ହୁଏ। ନିର୍ବାଚନରେ ପଟ୍ଟ ପରିବର୍ତ୍ତନ ହେଲେ ସ୍ବତଃ ବଦଳିଯାଇଥାଏ ହ୍ବାଇଟ୍ ହାଉସ୍ ମେନୁ। ପାରମ୍ପରିକ ନିୟମ ଅନୁଯାୟୀ ନବନିର୍ବାଚିତ ରାଷ୍ଟ୍ରପତି ଜାନୁୟାରୀ ୨୦ରେ ଦାୟିତ୍ୱ ଗ୍ରହଣ କରିବା ସହ ହ୍ବାଇଟ୍ ହାଉସ୍ରେ ପ୍ରବେଶ କରିଥାନ୍ତି। ଏହିଦିନ ପାକଶାଳା କର୍ମଚାରୀଙ୍କୁ ତର ନ ଥାଏ। କାରଣ ସେମାନଙ୍କୁ ପ୍ରଥମାର୍ଦ୍ଧରେ ବିଦାୟୀ ରାଷ୍ଟ୍ରପତିଙ୍କ ମନମୁତାବକ ଖାଦ୍ୟ ପ୍ରସ୍ତୁତ କରିବାକୁ ପଡ଼େ। ହେଲେ ଏହାର ୬ ଘଣ୍ଟା ପରେ ନୂତନ ରାଷ୍ଟ୍ରପତି ଇଚ୍ଛା ଅନୁଯାୟୀ ବ୍ୟଞ୍ଜନ ପରଷିବାକୁ ପଡ଼ିଥାଏ।
