ନୂଆଦିଲ୍ଲୀ,୮।୧୧: ଅଷ୍ଟ୍ରେଲିଆର ପୂର୍ବତନ ଦ୍ରୁତ ବୋଲର ବ୍ର୍ରେଟ୍ ଲି ବିଶ୍ୱର ଦ୍ରୁତତମ ବୋଲରମାନଙ୍କ ମଧ୍ୟରୁ ଅନ୍ୟତମ। ରବିବାର ସେ ନିଜର ୪୪ତମ ଜନ୍ମଦିନ ପାଳନ କରୁଛନ୍ତି। ଏନେଇ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିଛି।
ନିଉ ସାଉଥ୍ ଓ୍ବେଲ୍ସରେ ୧୯୭୬ ମସିହା ନଭେମ୍ବର ୮ ତାରିଖରେ ଜନ୍ମିତ ବ୍ରେଟ୍ ଲି ୭୬ଟି ଟେଷ୍ଟ, ୨୨୧ଟି ଏକଦିବସୀୟ ମ୍ୟାଚ୍ ଏବଂ ୨୫ ଟି-୨୦ ମ୍ୟାଚ୍ରେ ଜାତୀୟ ଦଳର ପ୍ରତିନିଧିତ୍ୱ କରିଥିବା ବେଳେ ମୋଟ ୭୧୮ଟି ଓ୍ବିକେଟ ନେବାରେ ସକ୍ଷମ ହୋଇଛନ୍ତି। ନିଜର କ୍ୟାରିୟରରେ ସେ ଅନେକ ରେକର୍ଡ ଭାଙ୍ଗିଛନ୍ତି। ତାଙ୍କ ବଲ୍କୁ ଖେଳିବା ଭଲ ଭଲ ବ୍ୟାଟ୍ସମ୍ୟାନଙ୍କ ପାଇଁ ସମ୍ଭବ ନ ଥିଲା। ୨୦୧୫ରେ ଜାନୁୟାରୀରେ ସେ ଖେଳର ସମସ୍ତ ଫର୍ମାଟରୁ ଅବସର ଘୋଷଣା କରିନେଇଥିଲେ।
ତେବେ ଜନ୍ମଦିନରେ ଆସନ୍ତୁ ନଜର ପକାଇବା ବ୍ରେଟ୍ ଲିଙ୍କ ସହ ଜଡ଼ିତ କିଛି କୌତୁହଳପୂର୍ଣ୍ଣ କଥା:
– ପିଲାଟିବେଳୁ ଦ୍ରୁତ ବୋଲିଂ କରିବାକୁ ସ୍ବପ୍ନ ରଖିଥିଲେ ବ୍ରେଟ୍ ଲି। ଏଥିସହ ବିଶ୍ୱକପ୍ରେ ହ୍ୟାଟ୍ରିକ୍ ନେବା ତାଙ୍କର ଲକ୍ଷ୍ୟ ଥିଲା। ଉଭୟ ସ୍ବପ୍ନକୁ ବ୍ରେଟ୍ ଲି ପୂରଣ କରିଛନ୍ତି
-ବ୍ରେଟ୍ ଲି ବିକ୍ରେତା ଭାବେ କାମ କରିଛନ୍ତି। ଲିଗ୍ କ୍ରିକେଟ ଖେଳିବା ବେଳେ ଖେଳାଳିଙ୍କୁ କମ୍ ପାଉଣା ମିଳୁଥିଲା। ଏଭଳି ପରିସ୍ଥିତିରେ ଖେଳାଳିମାନେ ରୋଜଗାର ପାଇଁ ପାର୍ଟ ଟାଇମ୍ କାମ କରୁଥିଲେ। ସେତେବେଳେ ବ୍ରେଟ୍ ଲି ସେଲ୍ସମ୍ୟାନ୍ ଭାବେ ପୁରୁଷଙ୍କ ସୁଟ୍ ତିଆରି ଷ୍ଟୋରରେ କାମ କରିଥିଲେ।
-ବ୍ରେଟ୍ ଲି ଭାରତକୁ ନିଜର ଦ୍ୱିତୀୟ ଘର ବୋଲି କୁହନ୍ତି। ଏଭଳି ପଛରେ ଗଭୀର ସଂଯୋଗ ମଧ୍ୟ ରହିଛି। ସେ ବିଜୟ ଚଳଚ୍ଚିତ୍ରରେ ଏକ କାମିଓ ରୋଲ କରିଥିଲେ। ଏହାଛଡ଼ା ସେ ଅଣଭାରତୀୟ ଫିଲ୍ମରେ ପ୍ରମୁଖ ଭୂମିକା ତୁଲାଇଥିଲେ। ଏକଦା ପ୍ରିତି ଜିଣ୍ଟାଙ୍କ ସହ ତାଙ୍କର ପ୍ରେମ ସମ୍ପର୍କ ଚର୍ଚ୍ଚାରେ ରହିଥିଲା।
-କ୍ରିକେଟ ବ୍ୟତିତ ସଂଗୀତ ପ୍ରତି ବ୍ରେଟ୍ ଲିଙ୍କ ଦୁର୍ବଳତା ରହିଛି। ତାଙ୍କର ନିଜସ୍ବ ମ୍ୟୁଜିକ୍ ବ୍ୟାଣ୍ଡ ‘ସିକ୍ସ ଆଣ୍ଡ ଆଉଟ୍’ ରହିଛି।
