ବରଗଡ଼,୧୮ା୨(ପ୍ରେମାନନ୍ଦ ଖମାରୀ): ବରଗଡ଼ ସହରରେ ଅପରାଧୀମାନେ ସକ୍ରିୟ ହୋଇ ପଡିଛନ୍ତି। ଏଠାରେ ଦିନ ଦ୍ବିପ୍ରହରରେ ଭୁଜାଲି ମାଡ, ଛୁରାମାଡ଼ ହେଉଛି। ଗତ କିଛିଦିନ ତଳେ ବରଗ ହାଟପଦାରେ ଭୁଜାଲି ମାଡ଼ରେ ୨ଯୁବକଙ୍କ ଜୀବନ ଚାଲି ଯାଇଥିଲା। ଏହି ଘଟଣା ପରେ ବିଭିନ୍ନ ଛକ ସ୍ଥାନରେ ପୋଲିସ ମୁତୟନ ଅଛନ୍ତି। ଏହାସତ୍ତ୍ବେ ପୋଲିସକୁ ଚ୍ୟାଲେଞ୍ଜ କରି ଥରକୁ ଥର ଛୁରାମାଡ଼ ହେଉଛି। ବୁଧବାର ସକାଳେ ବରଗଡ଼ ହାଟପଦାରେ ଛୁରାମାଡ଼ରେ ସ୍ଥାନୀୟ ଉଦ୍ଧବ ଡାଙ୍ଗଙ୍କ ପୁଅ ନବକିଶୋର ଆହତ ହୋଇଛନ୍ତି। ତାଙ୍କ ଡାହାଣ ହାତରେ ଗଭୀର ଆଘାତ ଲାଗିଛି। ସେ ହାଟପଦାରେ ନିଜ ବ୍ୟବସାୟ ଚଲାଇ ଥିବାବେଳେ ୨ଯୁବକ ଆସି ତାଙ୍କୁ ୧ହଜାର ଟଙ୍କା ମାଗିଥିଲେ। ମାତ୍ର ତାହା ଦେବା ପାଇଁ ନବ କିଶୋର ମନା କରି ଦେଇଥିଲେ। ଏହାପରେ ଯୁବକଦ୍ବୟ ଜୋର ଜବରଦସ୍ତ ତାଙ୍କ କାଉଣ୍ଟରରୁ ଟଙ୍କା କାଢି ନେଉଥିବା ସମୟରେ ନବକିଶୋର ପ୍ରତିରୋଧ କରିଥିଲେ। ଏହି ସମୟରେ ଜୀବନରେ ମାରିଦେବା ପାଇଁ ଦୁର୍ବୃତ୍ତମାନେ ତାଙ୍କୁ ଆକ୍ରମଣ କରିଥିଲେ ବୋଲି ନବକିଶୋର ପୋଲିସରେ ଅଭିଯୋଗ କରିଛନ୍ତି। ପୋଲିସ ଜଣଙ୍କୁ ଅଟକ ରଖି ତଦନ୍ତ କରୁଛି।
