ମୁମ୍ବାଇ,୮।୫: ଆଇପିଏଲ ୨୦୨୨ରେ କେ.ଏଲ ରାହୁଲ ଭଲ ଫର୍ମରେ ଅଛନ୍ତି। ସେ ଲକ୍ଷ୍ନୌ ସୁପର୍ ଜିଆଣ୍ଟ୍ସ ଦଳ ପାଇଁ ସର୍ବାଧିକ ରନ ସ୍କୋରର, କିନ୍ତୁ ଏହା ସତ୍ତ୍ୱେ ସେ ତାଙ୍କ ନାମରେ ଏକ ଖରାପ ରେକର୍ଡ କରିଛନ୍ତି।
ଆଇପିଏଲ ୨୦୨୨ରେ, କେ.ଏଲ ରାହୁଲ ତିନିଥର ଖାତା ନ ଖୋଲି ପାଭିଲିୟନକୁ ଫେରିଛନ୍ତି। କୋଲକାତା ନାଇଟ ରାଇଡର୍ସ ବିପକ୍ଷରେ ‘ଶୂନ’ରେ ଆଉଟ୍ ହୋଇଥିଲେ। ବିଶେଷ କଥା ହେଉଛି ସେ ଏଥିପାଇଁ କୌଣସିି ବଲ ଖେଳି ନାହାଁନ୍ତି। ଏପରି ଆଉଟ୍କୁ ‘ଡାଇମଣ୍ଡ-ଡକ’ କୁହାଯାଏ। ରାହୁଲଙ୍କ ସହ ବ୍ୟାଟିଂ କରୁଥିବା କ୍ୱିଣ୍ଟନ ଡି କକ ଇନିଂସର ପ୍ରଥମ ଓଭରରେ ଏକ ରନ ନେବାକୁ ଚାହୁଁଥିଲେ, ସେ କ୍ରିଜ ଅତିକ୍ରମ କରିଥିଲେ। କିନ୍ତୁ ଶ୍ରେୟସ ଆୟର ତାଙ୍କ ଆଡକୁ ଆସୁଥିବାର ଦେଖି ସେ ଅଧା ବାଟରୁ ଫେରିଯାଇଥିଲେ। ସେତେବେଳକୁ ରାହୁଲ ଅଧା କ୍ରିଜରେ ପହଞ୍ଚି ସାରିଥିଲେ ଏବଂ ଆୟର୍ଙ୍କ ସିଧା ଥ୍ରୋରେ କେ.ଏଲ ରାହୁଲ ରନ୍ଆଉଟ୍ ହୋଇଥିଲେ।
ଆଇପିଏଲ ୨୦୨୨ରେ କେଏଲ ରାହୁଲ ତୃତୀୟ ଥର ପାଇଁ ସେ ଶୂନରେ ଆଉଟ୍ ହୋଇଛନ୍ତି। କିନ୍ତୁ ସେ ଚଳିତ ଆଇପିଏଲ୍ରେ ୧୧ଟି ମ୍ୟାଚରେ ୪୫୧ ରନ ସଂଗ୍ରହ କରିଛନ୍ତି। ଏଥିରେ ୨ଟି ଶତକ ସାମିଲ ଅଛି।
‘ଡାଇମଣ୍ଡ-ଡକ ଆଉଟ୍’ କ’ଣ
ଯଦି କୌଣସି ବ୍ୟାଟ୍ସମ୍ୟାନ୍ କୌଣସି ଆଇନଗତ ବଲ୍ର ସାମ୍ନା ନ କରି ଆଉଟ୍ ହୁଅନ୍ତି, ତେବେ ତାହାକୁ ‘ଡାଇମଣ୍ଡ-ଡକ ଆଉଟ୍’ କୁହାଯିବ। ଏହା ସାଧାରଣତଃ ଷ୍ଟ୍ରାଇକ ନେଉଥିବା ବ୍ୟାଟ୍ସମ୍ୟାନଙ୍କ ବିପରୀତ ପାର୍ଶ୍ୱରେ ଥିବା କ୍ରିକେଟର୍ଙ୍କ ସହ ଘଟିଥାଏ। ଯଦି ଜଣେ ବ୍ୟାଟ୍ସମ୍ୟାନ ବ୍ୟାଟିଂ ସମୟରେ ଓ୍ବାଇଡ୍ ବଲ୍ରେ ଷ୍ଟମ୍ପିଂ ହୋଇଥା’ନ୍ତି, ତେବେ ତାହାକୁ ମଧ୍ୟ ‘ଡାଇମଣ୍ଡ-ଡକ ଆଉଟ୍’ ଭାବରେ ବିବେଚନା କରାଯିବ।
