ପୋଙ୍ଗୟାଙ୍ଗ୍ ,୨୧ା୩: ଉତ୍ତର କୋରିଆ ଶାସକ କିମ୍ ଜଙ୍ଗ୍ ଉନ୍ ଜାତୀୟ ନିର୍ବାଚନରେ ବିପୁଳ ଭୋଟରେ ବିଜୟୀ ହୋଇଛନ୍ତି। ଏଠାକାର ୧୫ତମ ସୁପ୍ରିମ ପିପୁଲ୍ସ ଆସେମ୍ବ୍ଲି ପାଇଁ ଗତ ୧୫ରେ ନିର୍ବାଚନ କରାଯାଇଥିଲାବେଳେ କିମ୍ଙ୍କ ଓ୍ବାର୍କର ପାର୍ଟି ଅଫ୍ କୋରିଆ ଏବଂ ସହଯୋଗୀ ଦଳଗୁଡିକୁ ୯୯.୯୩ % ଭୋଟ ମିଳିଛି। କିମ୍ଙ୍କ ନେତୃତ୍ୱରେ ଓ୍ବାର୍କର ପାର୍ଟି ଅଫ୍ କୋରିଆ ଏବଂ ଏହାର ସହଯୋଗୀ ଦଳ ଶତ ପ୍ରତିଶତ ଭୋଟରେ ବିଜୟୀ ହେବା କେବଳ ଉତ୍ତର କୋରିଆ ରାଜନୀତି ନୁହେଁ , ବୈଶ୍ୱିକ ସ୍ତରରେ ମଧ୍ୟ ହଇଚଇ ସୃଷ୍ଟି କରିଛି। ଦ୍ୱିତୀୟ ଥର ପାଇଁ କିମ୍ ଏଭଳି ବିପୁଳ ଭୋଟ ପାଇଁ ବିଜୟୀ ହୋଇଛନ୍ତି। କୋରିଆନ୍ ସେଣ୍ଟ୍ରାଲ ନ୍ୟୁଜ୍ ଏଜେନ (କେସିଏନ୍ଏ) ଅନୁଯାୟୀ କିମ୍ଙ୍କ ଦଳ ପକ୍ଷରୁ ଯେଉଁ ଆସନରେ ପ୍ରାର୍ଥୀ ଦିଆଯାଇଥିଲା ସମସ୍ତ ପ୍ରାର୍ଥୀ ବିଜୟୀ ହୋଇଛନ୍ତି। ଜଣେ ବି ପ୍ରାର୍ଥୀ କୌଣସି ଆସନରେ ପରାଜିତ ହେବାର ଦେଖାଯାଇ ନାହିଁ। ଏହି ନିର୍ବାଚନରେ ଶତ ପ୍ରତିଶତ ଭୋଟ (୯୯.୯୯) ପଡ଼ିଥିଲାବେଳେ କିମ୍ଙ୍କ ଦଳକୁ ୯୯.୯୭ % ଭୋଟ୍ ମିଳିଛି ବୋଲି କେସିଏନ୍ଏ କହିଛି। ତେବେ ସରକାରୀ ସ୍ତରରେ କିମ୍ଙ୍କୁ ୯୯.୯୩ ପ୍ରତିଶତ ଭୋଟ୍ ମିଳିଥିବା କୁହାଯାଇଛି। ଏହି ନିର୍ବାଚନରେ କେବଳ ୦.୦୦୩୭ ଭୋଟର ନିର୍ବାଚନ ସମୟରେ ବିଦେଶରେ ରହିଥିବା କିମ୍ବା ସମୁଦ୍ର ଭିତରେ କାର୍ଯ୍ୟରେ ବ୍ୟସ୍ତ ଥିବାରୁ ମତଦାନ କରିପାରିନାହାନ୍ତି।
ସବୁଠାରୁ ବଡ଼ କଥା ହେଲା ଏହି ନିର୍ବାଚନରେ କିମ୍ଙ୍କ ବିରୋଧରେ କୌଣସି ଦଳ ନିର୍ବାଚନ ଲଢୁ ନ ଥିଲେ। ସବୁ ନିର୍ବାଚନମଣ୍ଡଳୀରେ କେବଳ କିମ୍ଙ୍କ ଓ୍ବାର୍କର ପାର୍ଟି ଅଫ୍ କୋରିଆ ଏବଂ ଅନ୍ୟ ସହଯୋଗୀ ଦଳ ପ୍ରତିଦ୍ୱନ୍ଦ୍ୱିତା କରୁଥିଲେ। ପ୍ରତ୍ୟେକ ପ୍ରାର୍ଥୀଙ୍କ ପ୍ରତି ଭୋଟରଙ୍କ ସମର୍ଥନ କେତେ ରହିଛି ତାହା ହିଁ ଭୋଟ ପ୍ରତିଶତ ନିର୍ଦ୍ଧାରଣ କରିଥିଲା। ୦.୦୭ ପ୍ରତିଶତ ଭୋଟ ପାର୍ଥକ୍ୟ କେବଳ ପ୍ରାର୍ଥୀଙ୍କ ପ୍ରତି ଭୋଟରଙ୍କ ରୁଚିକୁ ନେଇ ରହିଛି। ଅର୍ଥାତ୍ ଏହି ପ୍ରତିଶତ ଭୋଟର କେତେଜଣ ପ୍ରାର୍ଥୀଙ୍କୁ ଉଚିତ ଭାବେ ଗ୍ରହଣ କରି ନ ଥିଲେ ମଧ୍ୟ ଦଳ ସପକ୍ଷରେ ଭୋଟ ଦେଇଛନ୍ତି। ଏଥିପାଇଁ ଗତ କିଛି ଦଶନ୍ଧିରେ ଉତ୍ତର କୋରିଆ ସଂସଦୀୟ ନିର୍ବାଚନରେ ପ୍ରଥମଥର ପାଇଁ ‘ନୋ’ ଭୋଟ୍ ପରମ୍ପରା ସୃଷ୍ଟି ହୋଇଛି ବୋଲି କୁହାଯାଇଛି। ଏଠାକାର ନିର୍ବାଚନୀ ଆଇନ ଅନୁସାରେ ଜାତୀୟ ସଂସଦକୁ ମୋଟ ୬୮୭ ପ୍ରାର୍ଥୀ ନିର୍ବାଚିତ ହୋଇଥାଆନ୍ତି। ସାଧାରଣ ଭାବେ କାମ କରୁଥିବା ଲୋକଙ୍କଠାରୁ ଆରମ୍ଭ କରି ଚାଷୀ, ବୁଦ୍ଧିଜୀବୀ, ମିଲିଟାରି କର୍ମଚାରୀ ଏବଂ ଅନ୍ୟ ସରକାରୀ ଅଧିକାରୀଙ୍କୁ ନିର୍ବାଚନ ଲଢିବାକୁ ସୁଯୋଗ ଦିଆଯାଇଥାଏ।
