ବାରିପଦା ଅଫିସ,୩୦।୩: ମୟୂରଭଞ୍ଜ ଜିଲା ଯଶିପୁର ଥାନା ଅଞ୍ଚଳର ଏକ ଜଙ୍ଗଲରୁ ଜନୈକ ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ ଜବତ ଘଟଣାର ପର୍ଦ୍ଦାଫାଶ କରିଛି ପୋଲିସ। ଅଭିଯୁକ୍ତମାନେ ଉକ୍ତ ଯୁବକଙ୍କୁ ନିଶା ନିବାରଣ କେନ୍ଦ୍ରକୁ ନେଉଥିବା ବେଳେ ବାଟରେ ହତ୍ୟା କରି ତଥ୍ୟ ଲୁଚାଇବା ପାଇଁ ଟାୟାର ଜାଳି ପୋଡ଼ି ଦେଇଥିଲେ। ଜଙ୍ଗଲରେ ଅର୍ଦ୍ଧଦଗ୍ଧ ମୃତଦେହ ପଡ଼ିଥିବା ଦେଖି ସ୍ଥାନୀୟ ଗ୍ରାମବାସୀ ପୋଲିସକୁ ଖବର ଦେଇଥିଲେ। ସାଇଣ୍ଟିଫିକ୍ ଟିମ୍ ସହ ପୋଲିସ ପହଞ୍ଚତ୍ ତଦନ୍ତ ଚଳାଇ ଦୁଇ ଅଭିଯୁକ୍ତଙ୍କୁ ଗିରଫ ପରେ ସୋମବାର କୋର୍ଟଚାଲାଣ କରିଛି। ଅଭିଯୁକ୍ତ ଦ୍ୱୟ ହେଲେ କେନ୍ଦୁଝର ଟାଉନ ଥାନା ଅଞ୍ଚଳର ସତ୍ୟଜିତ ପାଢ଼ୀ(୩୪) ଓ ଘଟଗଁା ଥାନା ଖୁଣ୍ଟା ଅଞ୍ଚଳର ସ୍ବରୂପ ନାରାୟଣ ପଲେଇ(୨୭)। ଏ ସଂକ୍ରାନ୍ତରେ ଯଶୀପୁର ଥାନାରେ ଏକ ହତ୍ୟା ମାମଲା (ନଂ.୬୪/୨୨) ରୁଜୁ ହୋଇଛି। ସୂଚନା ଅନୁଯାୟୀ, ଗତ ୨୪ତାରିଖରେ କେନ୍ଦୁଝର ଟାଉନ ଥାନା ରାଙ୍କି ଅଞ୍ଚଳର ଆଦିତ୍ୟ ସ୍ବାଇଁ(୨୫)ଙ୍କୁ ସତ୍ୟଜିତ ଓ ନାରାୟଣ ବାରିପଦାସ୍ଥିତ ନିଶା ନିବାରଣ କେନ୍ଦ୍ରକୁ ଛାଡ଼ିବା ପାଇଁ ଯଶିପୁର ଦେଇ ଆସୁଥିଲେ। କୌଣସି କାରଣରୁ ସେମାନଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ଅଭିଯୁକ୍ତଦ୍ୱୟ ମାଡ଼ ମାରିବାରୁ ଘଟଣାସ୍ଥଳରେ ଆଦିତ୍ୟଙ୍କର ମୃତ୍ୟୁ ଘଟିଥିଲା। ତଥ୍ୟ ଲୁଚାଇବା ପାଇଁ ସେମାନେ ମୃତଦେହକୁ ରାସ୍ତା ପାର୍ଶ୍ୱ ଜଙ୍ଗଲରେ ଟାୟାର ଜାଳି ପୋଡ଼ି ଦେଇଥିଲେ। ଖବରପାଇ ପୋଲିସ ମୃତଦେହ ଜବତ କରି ତଦନ୍ତ ଜାରି ରଖିଥିଲା।
