ମୋହନା,୧୦ା୧(ମନ୍ମଥ ମିଶ୍ର): ଗଜପତି ଜିଲା ଅଡ଼ବା ଥାନା କଲେମା ଗାଁରେ ଲାଲି ଓରଫ ଲକ୍ଷହିରା ନାୟକ ହତ୍ୟା ଘଟଣାର ପର୍ଦ୍ଦାଫାଶ କରିଛି ପୋଲିସ। ଏହି ହତ୍ୟା ଘଟଣାରେ ସମ୍ପୃକ୍ତ ୩ ଜଣକୁ ଗିରଫ କରାଯାଇଛି। ସେମାନେ ହେଲେ ମୃତ ଲକ୍ଷହିରାଙ୍କ ସାମୀ ଧର୍ମେନ୍ଦ୍ର ନାୟକ, ଦିତୀୟ ସ୍ତ୍ରୀ ପୂର୍ଣ୍ଣବାସୀ ନାୟକ ଓ ପୁତୁରା କର୍ଣ୍ଣ ନାୟକ। ଅଭିଯୁକ୍ତମାନଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଗଜପତି ଏସ୍ପି ଯତୀନ୍ଦ୍ର ପଣ୍ଡା। ପାରିବାରିକ ଅଶାନ୍ତି ଓ ଦ୍ୱିତୀୟ ବିବାହକୁ ବିରୋଧ କରିବାରୁ ଏହି ହତ୍ୟାକାଣ୍ଡ ଘଟିଥିବା ସୂଚନା ଦେଇଛନ୍ତି। ଧର୍ମେନ୍ଦ୍ର ଗତ ୧୫ ବର୍ଷ ତଳେ ପ୍ରଥମେ ଲକ୍ଷହିରା ନାୟକ (୩୨)ଙ୍କୁ ବିବାହ କରିଥିଲେ। ଏହାପରେ ଗତ ୪ ବର୍ଷ ତଳେ ପୁଣି ପୂର୍ଣ୍ଣବାସୀ ନାମକ ଜଣେ ମହିଳାଙ୍କୁ ଦିତୀୟ ବିବାହ କରିଥିଲେ ଧର୍ମେନ୍ଦ୍ର। ଏହାକୁ ନେଇ ପରିବାରରେ ଅଶାନ୍ତି ସୃଷ୍ଟି ହୋଇଥିଲା। ତେଣୁ ରାସ୍ତାରୁ ହଟାଇବା ପାଇଁ ଲକ୍ଷହିରାକୁ ଗତ ୩ ତାରିଖ ଦିନ ଉକ୍ତ ୩ ଜଣ ମିଶି ହତ୍ୟା କରିଥିଲେ। ୫ ତାରିଖରେ ଏକ ପାହାଡ଼ ତଳେ ଥିବା ପଥର କୋରଡ଼ରୁ ମୃତଦେହ ଉଦ୍ଧାର କରିଥିଲା ପୋଲିସ। ହତ୍ୟାରେ ବ୍ୟବହୃତ ମାରଣାସ୍ତ୍ର ଓ ପଥର ଜବତ ହୋଇଛି। ଅଭିଯୁକ୍ତମାନଙ୍କୁ ଗିରଫ କରାଯିବା ପରେ ମୃତଙ୍କ ଭାଇ ଖୁସିବ୍ୟକ୍ତ କରିଛନ୍ତି।
