ବାରାଣସୀ,୨୧ା୯: ପାନଛେପ ପକାଇବାକୁ ଜଣେ ୫୯ ବର୍ଷୀୟ ବ୍ୟକ୍ତି ବିରୋଧ କରିବାରୁ ଦୁର୍ବୃତ୍ତମାନେ ତାଙ୍କ ଉପରେ ଗାଡ଼ି ମଡ଼ାଇଦେଇଛନ୍ତି। ଉତ୍ତରପ୍ରଦେଶର ବାରାଣସୀ ସହର ଅନ୍ତର୍ଗତ ସିଗ୍ରାରେ ରବିବାର ରାତିରେ ଏହି ଘଟଣା ଘଟିଛି। ପୋଲିସ ୨ ଜଣଙ୍କୁ ଗିରଫ କରିବା ସହ ସେମାନଙ୍କ ବିରୋଧରେ ଆଇପିସିର ଧାରା ୨୭୯(ବେପରୁଆ ଗାଡ଼ିଚାଳନା) ଏବଂ ୩୦୪ଏ (ଦାୟିତ୍ୱହୀନତାରୁ ମୃତ୍ୟୁ)ରେ ମାମଲା ରୁଜୁ କରିଛି। ପାନଛେପକୁ ବିରୋଧ ଯୋଗୁ ଜାଣିଶୁଣି ଗାଡ଼ି ମଡ଼ାଇଦେବା ଅଭିଯୋଗକୁ କମିଶନରେଟ୍ ପୋଲିସ ଅସ୍ବୀକାର କରିଛି। ପୋଲିସରେ ହୋଇଥିବା ଅଭିଯୋଗ ଅନୁଯାୟୀ, ନୁଆଓ ଅଞ୍ଚଳର ଦେବକରନ ପାଣ୍ଡେ ଏବଂ ତାଙ୍କ ସମ୍ପର୍କୀୟ ରାଜେନ୍ଦ୍ର କୁମାର ପାଣ୍ଡେ ରବିବାର ରାତିରେ ଦୁଇଟି ବାଇକ୍ରେ ଘରକୁ ଫେରୁଥିବାବେଳେ ସିଗ୍ରା ଥାନା ଅନ୍ତର୍ଗତ ଆନ୍ଧ୍ରାପୁଲ ନିକଟରେ ଏସ୍ୟୁଭିରୁ ଛେପ ପକାଉଥିବା ଯାତ୍ରୀଙ୍କୁ ବିରୋଧ କରିଥିଲେ। ଏହା ପରେ ଏସ୍ୟୁଭି ଚାଳକ ଜାଣିଶୁଣି ଦେବକରନଙ୍କ ସ୍କୁଟିକୁ ଧକ୍କା ଦେଇଥିଲେ। ଗୁରୁତର ଦେବକରନଙ୍କୁ ହସ୍ପିଟାଲ ନିଆଯାଇଥିଲେ ହେଁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ ୨ ଜଣଙ୍କୁ ଗିରଫ କରିଥିବାବେଳେ ଏସ୍ୟୁଭିରେ ଥିବା ଅନ୍ୟ ଦୁଇଜଣ ଫେରାର ହୋଇଯାଇଛନ୍ତି।
