ପ୍ରେମ ବ୍ୟାପାରକୁ ନେଇ ଯୁବକଙ୍କୁ ହତ୍ୟା
10:27 amOctober 12, 2022October 12, 2022 / 09

ଫୁଲବାଣୀ ଅଫିସ/ବାଲିଗୁଡ଼ା/ ରାଇକିିଆ(ଡି.ଏନ୍‌.ଏ.), ୧୨।୧୦: କନ୍ଧମାଳ ଜିଲା ନୂଆଗାଁ ବ୍ଲକ ଗୁଞ୍ଜିବାଡ଼ି ପଞ୍ଚାୟତର ତଡ଼ବାଡ଼ି ଗ୍ରାମ ମୁଖ୍ୟରାସ୍ତା ପାଶର୍‌ବ ଏକ ବୁଦା ମୂଳରୁ ଜଣେ ଯୁବକଙ୍କ ମୃତଦେହ ଜବତ କରାଯାଇଛି। ସେ ହେଲେ ସାରଙ୍ଗଡ଼ ପଞ୍ଚାୟତ କୁଳପଦର ଗ୍ରାମର ଟଟେ ମଲ୍ଲିକଙ୍କ ବଡ଼ ପୁଅ ପ୍ରଦୀପ। ତାଙ୍କ ଶରୀରକୁ ଧାରୁଆ ଅସ୍ତ୍ରରେ ହଣାଯାଇଛି। ପ୍ରଦୀପ ତଡ଼ବାଡ଼ି ଗ୍ରାମର ଜଣେ ଝିଅକୁ ଭଲ ପାଉଥିଲେ। କିନ୍ତୁ ଏହି ପ୍ରେମ ସମ୍ପର୍କକୁ ଝିଅର ବଡ଼ ଭାଇ ଯତୀନ ପ୍ରଧାନ ବିରୋଧ କରି ଆସୁଥିଲେ। ଏହାକୁ ନ ମାନିବାରୁ ଯତୀନ ଏକ ଟାଙ୍ଗିଆରେ ଆକ୍ରମଣ କରି ପ୍ରଦୀପଙ୍କୁ ହତ୍ୟା କରଥିଲେ। ଏହାପରେ ସେ ସାରଙ୍ଗଗଡ଼ ଥାନାରେ ଆତ୍ମସମର୍ପଣ କରିଥିଲେ। ଥାନାଧିକାରୀ ବଧୂଲିକା ବିଶ୍ୱାଳ, ଜି. ଉଦୟଗିରି ଏସ୍‌ଡିପିଓ ଘଟଣାର ତଦନ୍ତ ଚଳାଇଛନ୍ତି। ଏ ନେଇ ନଂ ୯୧/୨୨ରେ ମାମଲା ରୁଜୁ ହୋଇଛି।