ହାଟଡ଼ିହୀ,୧୮ା୫ (ଡି.ଏନ୍.ଏ.): କେନ୍ଦୁଝର ଜିଲା ହାଟଡ଼ିହୀ ବ୍ଲକ୍ରେ ଭତ୍ତା କେଳେଙ୍କାରୀ ଦେଖିବାକୁ ମିଳିଛି। ଜଣେ ଅସହାୟ ବିଧବା ବୃଦ୍ଧା ବଞ୍ଚତ୍ଥିବା ବେଳେ ତାଙ୍କୁ କାଗଜପତ୍ରରେ ମୃତ ଘୋଷଣା କରାଯାଇଛି। ଫଳରେ ବୃଦ୍ଧା ଜଣଙ୍କ ଦୀର୍ଘ ୪ ମାସ ହେବ ମଧୁବାବୁ ପେନ୍ସନ ଯୋଜନାରେ ଭତ୍ତା ପାଇବାରୁ ବଞ୍ଚତ୍ତ ରହିଛନ୍ତି। ଏ ବାବଦରେ ବ୍ଲକ୍ଠାରୁ ଆରମ୍ଭକରି ଜିଲାପାଳଙ୍କ ଅଭିଯୋଗ ଶୁଣାଣିରେ ଅଭିଯୋଗ କରାଯାଇଥିଲେ ମଧ୍ୟ ଅଦ୍ୟାବଧି କୌଣସି ଫଳ ମିଳିପାରିନାହିଁ।
ଅଭିଯୋଗ ଅନୁଯାୟୀ, ଏହି ବ୍ଲକ୍ ଅଧୀନ ଢେଙ୍କା ପଞ୍ଚାୟତ ସଙ୍ଗମ ଗ୍ରାମର ମଳିନୀଙ୍କ ସ୍ବାମୀ ବାବାଜୀ ପରିଡ଼ାଙ୍କ ୩୦ ବର୍ଷ ପୂର୍ବେ ମୃତ୍ୟୁ ହୋଇଛି। ସ୍ବାମୀଙ୍କ ମୃତ୍ୟୁ ପରେ ମଳିନୀଙ୍କୁ ଭତ୍ତା ମିଳୁଥିଲା। ଆଗରୁ ନଗଦ ଆକାରରେ ମିଳୁଥିବା ବେଳେ କିଛି ମାସ ହେବ ତାଙ୍କ ବ୍ୟାଙ୍କ ଆକାଉଣ୍ଟକୁ ଭତ୍ତା ଅର୍ଥ ଆସୁଥିଲା। ହଠାତ୍ ଭତ୍ତା ଅନୁଦାନ ବନ୍ଦ ହୋଇଯିବାରୁ ସେ ବ୍ଲକ୍ର ଦ୍ୱାରସ୍ଥ ହୋଇଥିଲେ। ତାଙ୍କୁ ଅନ୍ୟ ଏକ ବ୍ୟାଙ୍କରେ ଏକ ନୂଆ ପାସ୍ ବହି ଖୋଲିବାକୁ କୁହାଯାଇଥିଲା। ମଳିନୀ ମଧ୍ୟ ଏକ ନୂଆ ପାସ୍ ବହି ଖୋଲିଥିଲେ। ତଥାପି ଭତ୍ତା ଅନୁଦାନ ପାସ୍ ବହିକୁ ଆସିଲାନି। ଶେଷରେ ୪ ମାସ ହେବ ତାଙ୍କର ମୃତ୍ୟୁ ହୋଇଥିବା ବ୍ଲକ୍ ତରଫରୁ କୁହାଯାଇଥିଲା। ତେଣୁ ଭତ୍ତା ବନ୍ଦ କରାଯାଇଥିବା କ୍ଷୋଭର ସହ ମଳିନୀ କହିଛନ୍ତି। ଘର ଖଣ୍ଡକ ବ୍ୟତୀତ ତାଙ୍କର ଆଉ କିଛି ନ ଥିବା ବେଳେ ପରର ମୂଲ ମଜୁରି ଲାଗି ମଳିନୀ ନିଜ ପେଟ ପୋଷନ୍ତି। ଏଭଳି କ୍ଷେତ୍ରରେ ବଞ୍ଚତ୍ ଥାଉ ଥାଉ ଜଣେ ଗରିବ ଅସହାୟ ବିଧବା ବୃଦ୍ଧାଙ୍କୁ କାଗଜପତ୍ରରେ ମୃତ ଘୋଷଣା କରିବା ପ୍ରଶାସନିକ ଅଧିକାରୀଙ୍କ କାର୍ଯ୍ୟଦକ୍ଷତା ଉପରେ ପ୍ରଶ୍ନ ଉଠିଛି। ଘଟଣାର ଉଚ୍ଚସ୍ତରୀୟ ତଦନ୍ତ କରାଯାଇ ତାଙ୍କୁ ନ୍ୟାୟ ପ୍ରଦାନ କରିବାକୁ ମଳିନୀ ଦାବି କରିଛନ୍ତି। ହାଟଡ଼ିହୀ ସମାଜ ମଙ୍ଗଳ ଅଧିକାରୀ ରାଜେଶ ସାହୁ ଘଟଣାକୁ ସ୍ବୀକାର କରିଛନ୍ତି। ପଞ୍ଚାୟତ ରିପୋର୍ଟ ଅନୁସାରେ ଏପରି ହୋଇଛି। ଅନ୍ୟପକ୍ଷେ ଆକାଉଣ୍ଟ ନମ୍ବର ସହ ଆଧାର ସଂଯୋଗ ବେଳେ ଏହିପରି ଅନେକ ତ୍ରୁଟି ହୋଇଛି। ଏହା ଜଣାପଡ଼ିବା ପରେ ଅନୁଦାନ ରିକଭରି ପାଇଁ ନୋଟିସ ହେବା ସହ ଆଧାର ନମ୍ବରକୁ ମଧ୍ୟ ସଂଶୋଧନ କରାଯାଉଛି। ଆନନ୍ଦପୁର ଉପଜିଲାପାଳ ଅନିଲ କୁମାର ସେଠୀ କହିଛନ୍ତି, ଘଟଣା ଦିଗରେ ହାଟଡ଼ିହୀ ବିଡିଓଙ୍କୁ କହି ପଦକ୍ଷେପ ନିଆଯିବ।
