କର୍ଲାମୁଣ୍ଡା:୧।୫(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ଗଜବାହାଲ ପଞ୍ଚାୟତ ଧରାଖମନ ଗାଁରେ କିଡନୀ ରୋଗରେ ଆକ୍ରନ୍ତ ହୋଇ ୨୦ରୁ ଊଦ୍ଧର୍ବ ବ୍ୟକ୍ତିଙ୍କ ମୃତ୍ୟୁ ଘଟିଥିବା ବେଳେ ଏବେ ବି ୧୦ରୁ ଊଦ୍ଧର୍ବ ମହିଳା, ପୁରୁଷ ମୃତ୍ୟୁ ସହ ସଂଗ୍ରାମ କରୁଥିବା ଦେଖିବାକୁ ମିଳିଛି। ଗାଁର ଜଗବନ୍ଧୁ ପୁଟେଲ(୪୦) ଶ୍ରମିକ ଭାବେ କାମ କରି ସ୍ତ୍ରୀ ପ୍ରମୋଦିନି ପୁଟେଲ(୩୫)ଦୁଇ ସନ୍ତାନ ଯଶୋବନ୍ତ ପୁଟେଲ(୧୩) ଏବଂ ଝିଅ ଖିତିଶୁତା ପୁଟେଲଙ୍କୁ ନେଇ ହସ ଖୁସିରେ ପରିବାର ଚଳେଇ ନେଉଥିଲେ। ହେଲେ ଜଗବନ୍ଧୁ କିଡନୀ ରୋଗରେ ଆକ୍ରାନ୍ତ ହେବା ପରେ ସ୍ତ୍ରୀ ପ୍ରମୋଦୀନୀ ବନ୍ଧୁ ବାନ୍ଧବଙ୍କ ନିକଟରୁ ଧାର କରଜ କରି ସ୍ବାମୀଙ୍କ ବିଭିନ୍ନ ଡାକ୍ତରଖାନାରେ ଚିକିତ୍ସା କରାଇଥିଲେ। ଗତ ମାସ ୩୦ ତାରିଖରେ ଜଗବନ୍ଧୁଙ୍କ ମୃତ୍ୟୁ ଘଟିଥିଲା। ରୋଜଗାରିଆ ସ୍ବାମୀଙ୍କୁ ହରେଇ ପ୍ରମୋଦିନି ଏବେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି। ସେ କିପରି ପରିବାର ଚଲାଇବା ସହ ଦୁଇ ସନ୍ତାନଙ୍କୁ କିଭଳି ପାଠ ପଢେଇବେ ସେ ନେଇ ଚିନ୍ତାରେ ପଡିଛନ୍ତି। ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଦାବି କରିଛନ୍ତି।
ଏନେଇ ସରପଞ୍ଚ ଅରବିନ୍ଦ ଗହୀରଙ୍କୁ ପଚାରିବାରୁ ପରିବାରକୁ ଅନ୍ତୋଦୟ ଗୃହ ଯୋଜନାରେ ଘର ଯୋଗାଇବା ସହ ଜାତୀୟ ପରିବାର କଲ୍ୟାଣ ଯୋଜନାରୁ (ଏନ୍ଏଫବିଏସ୍) ସହାୟତା ପାଇଁ ଚେଷ୍ଠା କରାଯିବ ବୋଲି କହିଛନ୍ତି। ଏପରିକି ପଞ୍ଚାୟତ ପକ୍ଷରୁ ହରିଶ୍ଚନ୍ଦ୍ର ଯୋଜନାରୁ ତୁରନ୍ତ ସହାୟତା ଯୋଗାଇ ଦିଆଯିବ ବୋଲି ସେ କହିଛନ୍ତି।
ଅନ୍ୟପକ୍ଷେ ଜିଲା ଶିଶୁ ସୁରକ୍ଷା ସମିତି ପକ୍ଷରୁ ପରିବାରକୁ ସରକାରୀ ଆର୍ଥିକ ସହାୟତା ଯୋଗେଇ ଦେବାକୁ ଗ୍ରାମବାସୀ ଅନୁରୋଧ କରିଛନ୍ତି। ସୂଚନା ଯୋଗ୍ୟ, ସ୍ବାସ୍ଥ୍ୟ ବିଭାଗ ପକ୍ଷରୁ ଗାଁରେ ପୂର୍ବରୁ ଲୋକଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲେ ହେଁ କେଉଁ କାରଣରୁ ଗ୍ରାମବାସୀ କିଡନୀ ରୋଗରେ ଆକ୍ରାନ୍ତ ହେଉଛନ୍ତି, ତାହାର କାରଣ ଜଣା ନ ପଡ଼ିବା ପରିତାପର ବିଷୟ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି। ଏଣୁ ଜିଲା ସ୍ବାସ୍ଥ୍ୟ ବିଭାଗ ଏଥିପ୍ରତି ଦୃଷ୍ଟି ଦେବାକୁ ଗାଁ ଲୋକେ ଅନୁରୋଧ କରିଛନ୍ତି।