ଅମରପାଲି,୧୬/୧୨(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ଉପଖଣ୍ଡରେ ସୋମବାର ପୁଣି ଜଣେ କିଡନୀ ଆକ୍ରାନ୍ତଙ୍କ ମୃତ୍ୟୁ ହୋଇଛି । ମୃତକ ଜଣକ ହେଲେ ଉପାନ୍ତ ଦୁର୍ଜନତୈଲା ପଞ୍ଚାୟତ ଅନ୍ତର୍ଗତ ଦାଦରପାଲି ଗ୍ରାମର ସହଦେବ ମହାକୁରଙ୍କ ପୁଅ ମେଘୁ ମହାକୁର(୩୪) ବୋଲି ଜଣା ପଡିଛି ।
ଖବର ଅନୁସାରେ, ମେଘୁଙ୍କୁ ପ୍ରାୟ ମାସେ ପୂର୍ବରୁ ଜ୍ଵର ହୋଇଥିଲା। ସେ ସ୍ଥାନୀୟ ଅଞ୍ଚଳରୁ ଔଷଧ ବ୍ୟବହାର ପରେ ମଧ୍ୟ ଜ୍ଵର କମି ନଥିଲା। ଫଳରେ ସେ ସମ୍ବଲପୁର ଯାଇ ଚିକିତ୍ସା ହେବା ସହିତ ପରୀକ୍ଷା କରିଥିଲେ। ପରୀକ୍ଷା ପରେ ତାଙ୍କୁ କିଡନୀ ରୋଗ ହୋଇଥିବା ଜଣା ପଡ଼ିଥିଲା। ପରେ ସେ ଅଧିକ ଚିକିତ୍ସା ପାଇଁ ବୁର୍ଲ୍ଲା ବଡ଼ ମେଡ଼ିକାଲ ଓ କଟକ ରେ ଚିକିତ୍ସିତ ହୋଇଥିଲା। ମେଘୁ ଅତ୍ୟନ୍ତ ଗରିବ ଶ୍ରେଣୀର ଅଟନ୍ତି। ଜମି ମାତ୍ର ଏକ ଏକର ଅଛି। ସେହି ଜମି ଖଣ୍ଡକ ବନ୍ଦକ ରଖିବା ସହିତ ଧାର କଟକ କରି ସେ ଚିକିତ୍ସିତ ହେଉଥିଲେ। ହେଲେ କଟକରେ ଚିକିତ୍ସାଧୀନ ଅବସ୍ଥାରେ ସୋମବାର ସକାଳୁ ତାଙ୍କର ମୃତ୍ୟୁ ହୋଇଛି।
ପରିବାର ଲୋକଙ୍କ କହିବା ଅନୁସାରେ କିଡନୀ ରୋଗ ବଢ଼ିଯିବା ପରେ ତାଙ୍କ ଫୁସଫୁସ୍ ଜନିତ ରୋଗରେ ମଧ୍ୟ ଆକ୍ରାନ୍ତ ହୋଇ ପଡ଼ିଥିଲେ। ମୃତ ମେଘୁ ବିବାହିତ ହୋଇଥିବା ବେଳେ ତାଙ୍କର ସ୍ତ୍ରୀ ରିନା ମହାକୁର ଏବେ ଅସହାୟ ହୋଇ ପଡିଛନ୍ତି । ତାଙ୍କର ୪ ବର୍ଷର ଏକ ଝିଅ ମଧ୍ୟ ଅଛି। ମେଘୁ ଚାଷ କାମ ସହିତ ଝାଳ ମୁଢ଼ି ବିକ୍ରୀ କରି ପରିବାର ଚଳାଉ ଥିଲେ। ମେଘୁଙ୍କ ବାପା ସହଦେବ ଏବେ ବର୍ଦ୍ଧକ୍ୟ ଜନିତ ରୋଗରେ ଶଯ୍ୟାଶାୟୀ ଅଟନ୍ତି। ସୋମବାର ସନ୍ଧ୍ୟାରେ ତାଙ୍କ ଗ୍ରାମ ଦାଦରପାଲିକୁ ଅଣାଯିବା ପରେ ଗ୍ରାମରେ ଏକ ଶୋକାକୂଳ ପରିସ୍ଥିତି ଦେଖାଦେଇଥିଲା। ମେଘୁ ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ତାଙ୍କୁ ସରକାରୀ ସହାୟତା ପ୍ରଦାନ କରିବାକୁ ଦାବି ହେଉଛି ।
ସୂଚନା ଅନୁସାରେ କିଛି ଦିନ ପୂର୍ବରୁ ବୀରମହାରାଜପୁର ଅଞ୍ଚଳର ଉପାନ୍ତ ବହଳପଦର, ଦୁର୍ଜନତୈଳା ଓ କୋଟସମଲେଇ ପଞ୍ଚାୟତର ବିଭିନ୍ନ ଗ୍ରାମରୁ ମାସେ ମଧ୍ୟରେ ୪ ଜଣ ବ୍ୟକ୍ତିଙ୍କ କିଡନୀ ରୋଗର ମୃତ୍ୟୁ ହୋଇଥିଲ। ଏବେ ପୁଣି ଗତ ସପ୍ତାହରେ ୪ ଦିନ ମଧ୍ୟରେ ବହଳପଦର ପଞ୍ଚାୟତର ହୋତାପାଲି ( ସୁରଧାପାଲି) ଗ୍ରାମରେ ଗୋଟିଏ ପରିବାରର କକା ଓ ପୁତୁରାଙ୍କ କିଡନୀ ରୋଗର ମୃତ୍ୟୁ ହୋଇଥିଲ। ଏହାର ୪ ଦିନ ପରେ ପୁଣି ଦାଦରପାଲି ଗ୍ରାମର ମେଘୁଙ୍କ ମୃତ୍ୟୁ କିଡନୀ ରୋଗର ହେବା ଘଟଣା ଅଞ୍ଚଳରେ ଆତଙ୍କ ଖେଳାଇ ଯାଇଛି। ତେଣୁ ଜିଲ୍ଲା ପ୍ରଶାସନ ଏହି ସମୟକୁ ଗମ୍ଭୀରତା ସହିତ ନେଇ ଏଥି ପ୍ରତି ପଦକ୍ଷେପ ନେବାକୁ ଦାବି ହେଉଛି। ତୁରନ୍ତ ଅଞ୍ଚଳର କିଡନୀରେ ମୃତକଙ୍କୁ ସରକାରୀ ସହାୟତା ପ୍ରଦାନ ସହିତ କିଡନୀ ଆକ୍ରାନ୍ତଙ୍କୁ ମାଗଣା ଚିକିତ୍ସା ଓ ଔଷଧ ଯୋଗାଇ ଦେବାକୁ ଦାବି ହେଉଛି।
